58
ጾሳይ ናጋራንቻቱዋ ሙራናዳን ሺቆ ዎሳ
ዛማረቱዋ ካፖ የጸቴዳ፥ ዳዊታ ዎሳ። “ꬋይሶፓ” ጌተትያ ማዝሙርያ ዋጹዋን የጸቴዳ ዎሳ።
1 ህንተኖ ደርያ ሞድያዋንቶ፥
ቱሙዋፐ ልክያ ሃሳዪቴ?
አሳ ኡባ ግዶን ጽሉዋ ፕርዲቴ?
2 ግደና፥ ህንተ ዎዛናን ኢታባ ሀልቺታ፤
ቢታን ህንተ ኩሺ ማካላባ ኦꬄዳ።
3 ኢታ አሳይ አት ኡሉዋፐ ዶሚደ ባሌ፤
የለቶደፐ ዶሚደ፥
ባይዜነ ዎርዱዋ ሃሳዬ።
4 ኡንቱንቱ ሾሻዳን ይሻና ደኢኖ፤
ቱለ ሀሱዋዳን ሀይꬃ ቱጬድኖ።
5 ብትያዌ አይ ኬሻ ሂላንቻ ግዶፐካ፥
ሀሱ አ ሳሱከꬃ ስሰና።
6 አቤት ጾሳዉ፥ ኡንቱንቱ አቻ
ኡንቱንቱ ጋፓታ ግዶን መንꬃ፤
አቤት መꬍና ጎዳዉ፥ ጋሞቱዋ ካስልያ ꬉካ።
7 ኡንቱንቱ ጎግ ꬋይያ ሃꬃዳን ꬋይኖ።
ኡንቱንቱ ባረንቱ ዎንዳፍያ ዱክያ ዎደ፥
ፖꬃ ጼራን ጫድያ አይፊ ꬋዮ።
8 ኡንቱንቱ ሙሺደ ሳሶ ከስያ ꬋꬍያዳን ሀንኖ፤
አት ኡሉዋፐ ቦሸቲደ የለቴዳ፥
ፖኡዋ በኤና ናኣዳን ሀንኖ።
9 ኡንቱንቱ አጉንꬃ ግዲደ ዳሻናፐ ካሰ፥
ኡንቱንቱ ብሮ ፑትያን ደእሽን፥
ጾሳይ ኡንቱንታ ባረ ሀንቁዋን ꬋይሳና።
10 ሀሉዋ ከስያዋ በእያ ዎደ፥
ጽሎቱ ናሸታና።
ኢታቱዋ ሱꬃን ባረንቱ ገድያ ሜጨታና።
11 ሄ ዎደ አሳይ፥
“ቱሙካ ጽሎቶ ዎይቱ ደኤ፤
ቱሙካ ሳኣ ቦላ ፕርድያ ጾሳይ ደኤ” ያጋና።