ጌሻ ማጻፋ ማዝሙርያ 56

ጾሳን ዘምፑዋ ዎሳ

ዛማረቱዋ ካፖ የጸቴዳ፥ ፕልስጼማ አሳቱ አ ጋተ ግያ ካታማን ኦሞዴዳ ዎደ፥ ዳዊታ ማዝሙርያ። ሃኮ ሳን ዎላ ቦላን ኡቴዳ ዶጎማትስ ጌተቲደ ሱሱልያን የጸቴዳ ማዝሙርያ።

1 አቤት ጾሳዉ፥ አሳቱ ታና የደርስያ ድራዉነ

ጋላሳ ኡባንካ ታ ሞርከቱ ታና ኡንኤꬄዳ ድራዉ፥

ታዉ ቃረታ።

2 ታ ሞርከቱ ጋላሳ ኡባን

ታና የደርሲኖ፤

ጮራቱ ኦቶሩዋን ታና ኡንኤꬂኖ።

3 ታን ያዬዳ ዎደ፥

ኔናን አማነታይ።

4 ታን ጾሳን አማነታይ፤

ታን አ ቃላ ጋላትያ ጾሳን

አማነታይነ ያይከ።

አሳይ ታና አያ ኦꬃኔ?

5 ጋላሳ ኡባን ታ ሞርከቱ፥

ታዉ መቱዋ መꬊኖ፤

ኡንቱንቱ ኡባ ገደ ታዉ ኢታባ ቆፒኖ።

6 ኡንቱንቱ ታ ቦላ ማቀቲኖ፤

ኩኩሊደ ዎቺኖነ

ታ ኦግያ ናጊኖ፤

ታና ዎꬋናዉ ኮዪኖ።

7 ኡንቱንቱ ኢታተꬃ ድራዉ፥ ኡንቱንታ የዶፓ፤

ነ ሀንቁዋን ሄ አሳቱዋ ዝቂ ኦꬃ።

8 ኔን ታን ቶይላካቶዋ ፓይዳዳ።

ታን ዎይሳ አፎꬃ ጉሳድታንቶ፥ ኔን ኤራሳ።

ኡንቱንቱ ነ ማዝጎብያን ደእክኖ?

9 ታን ኔና ጼስያ ዎደ፥

ታ ሞርከቱ ጉየ ስማና።

ጾሳይ ታ ባጋ ግድያዋ ታን ኤራይ።

10 ታን አ ቃላ ጋላትያ ጾሳይ፥

ታን አ ቃላ ጋላትያ መꬍና ጎዳ፥

11 ታን ሄ ጾሳን አማነታይ፤ ያይከ።

አሳይ ታና አይ ኦꬃኔ?

12 አቤት ጾሳዉ፥ ታን፥

ነዉ ሺቀቴዳዋ ኦꬃና፤

ሄዋ ጋላታ ያርሹዋ ታን ነዉ እማና።

13 አያዉ ጎፐ፥ ኔን ታና ሀይቁዋፐ፥

ታ ገድያ ኩንደꬃፐ አሻዳ።

ሄዋ ድራዉ፥ እ ፓጻ ደእያዋንቱ ቦላን ፖእስያ ፖኡዋን

ጾሳ ስንꬃን ታን ሀመታይ። +