1 “ታ ሸምፓታ ከሳዉ፤ ታ ላይꬃይ ቃሜዳ፤ ታዉ ዱፉ ጊግ ኡቴዳ። 2 ታና ቅሊጭያዋንቱ ቱሙዋፐ ታ ዩሹዋን ደኢኖ፤ ኡንቱንቱ ታዉ ሀንቀትያ ሀንቁዋ ኡባ ገደ ታን በአይ።

3 “አቤት ጾሳዉ፥ ኔፐ ሀራይ ታና ማድያዌ ባይና ድራዉ፥ ኔን ነ ሁጲያን ታዉ ዋሰ ግዳ። 4 ኡንቱንቶ ገለናዳን፥ ኔን ታ ላገꬃቱዋ ዎዛና ዶንጭልሳዳ። ሄዋ ድራዉ፥ ኔን ኡንቱንቶ ጾኑዋ እሞፓ። 5 ሚሻ ደማና ጊደ፥ ባረ ላገቱዋ አꬅ እምያ አሳ ናጋራይ አ ናናቱዋ ካአና።

6 “ጾሳይ ታና አሳ ኡባዉ ቅሊጭያዋ ከሴዳ፤ አሳይ ሶምኡዋን ጩችያ አሳ ታን ግዳድ። 7 ታን ዳሮ ካዮቴዳ ድራዉ፥ ታ አይፊካ ጋልጄዳ፤ ታ ኩመንꬃ አሳተꬃይ ላፊደ፥ ጽንቁዋ ኬሻ ግዴድኖ። 8 ኬካ አሳቱ ታና በኢደ ዳጋሜድኖ፤ ሱረቱካ ጾሳ ካድያዋንቱ ቦላ ይሎቴድኖ። 9 ግዶፐነ፥ ጽሎቱ ባረንቱ ኦግያፐ ያካ ሃካ ስምክኖ፤ ሱረቱ ዎልቃ ጉጅ ጉጅ ቢኖ። 10 ሽን ሀእ ኡባይካ አነ ታኮ ሃ ዪተ! ይንቶካ፥ ታን ህንተ ግዶን እት አꬌዳ ኤራንቻ አሳካ ደምከ።

11 “ታ ደኡዋ ላይꬃይ ዉሬዳ፤ ታ ሀልቼዳ ሀልቹካ ታ ዎዛና አሙካ ጮ አቴዳ። 12 ታ ላገቱ ቃማ ጋላሳ ጊኖ፤ ꬉም ኡት ደእሽን፥ ‘ፖአና ሀኔ’ ያጊኖ። 13 ታን ህዶታን ናግያ ታ ጎሊ ዱፉዋ፤ ታ ሂጻካ ያን ꬉማን ሂጻና። 14 ዱፉዋ ታን፥ ‘ኔን ታ አዉዋ’ ያጋና፤ ጉጹንያካ፥ ‘ኔን ታ አቶ’ ዎይ ‘ታ ምቻቶ’ ያጋና። 15 ያትና፥ ታ ህዶታይ ሀቃኔ? ኦን አ በኤዴ? 16 ታ ህዶታይ ታናና ዱፉዋ ባንዴ? ኑን ላኡ እትፐ ቢታን ዱገ ዎꬋኔሻ?” ያጌዳ።