16
ኢዮብ ዛሪደካ ሃሳዬ
1 ኢዮብ ሀዋዳን ያጊደ ዛሬዳ፤
2 “ሀዋ ማላ ሃሳያ ዳሩዋ ስሳድ፤ ህንተ ምንꬄቶ ጊደ፥ ታና መትያዋንታ።
3 ሀ ጎአይ ባይና ህንተ ሃሳያዉ ዉርሰꬅ ባዌ? ታናና ህንተና ሀዋ ኬሻ ፓሉምስያ ጋሱ አዬ?
4 ህንተ ታ ሳኣን ደእና፥ ታን ህንተ ሳኣን ደኤዳዋ ግድንቶ፥ ታንካ ታ ሁጲያ ካꬍያን ቃꬃደ፥ ሀእ ህንተ ግያዋ ኡባ ህንተ ቦላ ሎይꬃደ ሃሳያና ሽን!
5 ሄዋዳንካ፥ ታ ዞርያን ታን ህንተና ምንꬃና ሽን! ታ ዶናፐ ከስያ ሃሳያይካ ህንተና ምንꬃና ሽን!
6 “ሽን ታን ሃሳይንቶካ፥ ታ ሳኩ ኬከና፤ ታን ጮኡ ጋደ ዳንዳይንቶካ፥ ታፐ ክቼና።
7 አቤት ጾሳዉ፥ ኔን ታና ድፕ ኦꬃዳ፤ ታ ጎልያ አሳ ኡባካ ꬋይሳዳ።
8 ኔን ታ ጋልባ መልሳዳነ ጉንድሳዳ፤ ታ ቦላካ ግልቂሳዳ። ሄዋ ድራዉ፥ አሳይ ታና በኢደ፥ ‘ሀዌ እ ናጋራንቻ ግድያዎ ማርካ’ ያጌ።
9 ጾሳይ ባረ ሀንቁዋን ታና ዱሰረꬅ የጌዳ፤ ባረ አቻካ ታ ቦላ ጋርጬዳ፤ እ ታ ሞርኪ ታና ደረቄ።
10 አሳቱ ታ ዩሹዋን ሺቄድኖ፤ ታ ቦላ ቅሊጪደ፥ ታ ቅንጻልያ ባቄድኖ።
11 ጾሳይ ኢታ ኦꬅያ አሳቶ ታና አꬂደ እሜዳ፤ ጌላቱዋ ኩሽያንካ እ ታና ኦሌዳ።
12 “ታን ካሰ ዎፑ ጋደ ደኣድ፤ ሽን ጾሳይ ታና ክንቼሬꬄዳ፤ ታ ሙርጋጭያ ኦይቂደ፥ እ ታና መንሬꬄዳ። ቃይ እ ታና ጾንግ ደቻናዉ ማላ ኦꬄዳ፤
13 አ ዎንዳፍያ ፖꬃይ ታና ያና ሃና ሙዴድኖ። ቃረት ባይናን እ ታ ክላሁዋ ጫዲደ፥ ታ ጭሽያ ታ ትርያፐ ሳኣን ጉሴ።
14 ኦላናዉ ዎጽያ ኦላንቻዳን፥ እ ታና ዛር ዛሪደ ማዱꬄ።
15 ታን ካዮታደ፥ ማቃ ማያድ፤ ታ ዎልቃይካ ባናን ኦለቴዳ።
16 ታን ዬክያ ዬኩዋ ዳሩዋን ታ አይፊ ጋልጄዳ፤ አፎꬃፐ ደንዶዋን ታ አይፊካ ዞኤዳ።
17 ሽን ሀ ኡባንካ ታን ባይዜዳዌ ባዋ፤ ታ ዎሳይካ ጌሻ።
18 “ቢታዉ፥ ቢታዉ፥ ታ ሱꬃ ካሞፓ፤ ታን ዋሳናዋ ድጎፓ።
19 ሀእካ ታ ማርካይ ሳሉዋና፤ ታዉ ጻባቃትያዌ ቦላ ꬎቃና።
20 ታ ላገቱ ታና ካꬊደ ጼሊኖ፤ ታ አይፊ ጾሳ ስንꬃን አፎꬃ ትጌ።
21 አሳይ ባረ ላገꬃዉ ጋናትያዋዳን፥ ታና ጾሳና ስገꬅያ አሳይ ደኤዳ ግዴረኔሻ!
22 አያዉ ጎፐ፥ አማሬዳ ላይꬃቱ አꬌዳዋፐ ጉይያን፥ ታን ስመናሳ ባና።