1 ሄዋፐ ጉይያን፥ ሹሀ ቢታፐ ዬዳ ብልዳደ ሀዋዳን ያጊደ ዛሬዳ፤ 2 “ኢዮባ፥ ኔን ሀ ሃሳያ አዉደ ዉርሳይ? አነ አኬካ። ያቶፐ ኑን ሃሳያና። 3 ኑና አያዉ ሚዛ ከሳይ? አያዉ ኑና ዶንጭሎዋንታ ከሳይ? 4 ኔን ነ ሀንቁዋን ኔና ቆሃሳ። ነ ሀንቁዋን ቢታይ መላ ግዳኔ? ዎይ ዛላቱ ባረንቱ ሳኣፐ ꬎቆለታኔ?

5 “ናጋራንቻቱዋ ደኡ ጾምፒ ቶእያዋዳን ቶአናዌ ጌሻ፤ እ ላኤንꬆ ሙለካ ኤጸና። + 6 እ ጾምፒ ባይና ጎልያ ማላ፤ አ ማታን ደእያ ጾምፒካ ቶኤ። 7 እ ታንግያ ታንጉካ ቃሜ፤ እ ሀራቱዋ ዞርያ ዞሪ አ ኡንጌ።

8 “አ ሀመታይ አ አፊደ፥ ጲርያን ገልሴ፤ ዲዛ ግዶን እ ሀመቴ። 9 ጵሪ አ ግንድያ ኦይቄ፤ አ ቃꬁዋ ድጌ። 10 አዉ ዩርዶ ዎዶሩ ጌማን ሳኣን ሂጸት ኡቴ፤ እ ሀመትያ ኦግያንካ ግቲ ዎꬍ ኡቴ።

11 “ዳጋማይ አ ዶዴ፤ አ ጉየናካ የደርሴ፤ 12 አ ዎልቃይ ኮሻን ዳቡሬዳ፤ ባሻይ አ ማታን ናጌ። 13 ዎꬍያ ሀርጊ አ ቦላን ኡባን ዶዴ፤ አ ኩሽያነ አ ገድያ ዱሽሴ። 14 እ ህርግ ባይናን ደእያ ባረ ጎልያፐ የደርሴቴ፤ ኡንቱንቱ አሳ ኡባ ሞድያ ሀይቁዋ ግያ ካትያኮ፥ አ አፊኖ። 15 ሀርግያ የደርሳነው ዲንያ ላሎዋፐ ጉይያን፥ ኦንነ አ ጎልያን ደአና። 16 እ ጻጱ ጋርሳና መልያነ ቃንካቱካ ቦላና ቆቆፈትያ ምꬃ ማላ ግዴ። 17 አ ዎሪ ቢታፐ ꬋዬ፤ አ ሱንꬃይካ ሳኣን ሀሳየተናን አቴ። 18 እ ፖኡዋፐ ꬉማዉ የደርሰታና፤ አሳይ ደእያ ቢታፐካ እ ꬋያና። 19 አዉ ናአይ ዎይ ዛሪ ꬋያና፤ እ ደኤዳ ሳኣን እት አሳይነ ፓጻ ደኤና። 20 አዋይ ዶልያ ባጋ አሳይ አ ጋኬዳዋን ዳጋሜ፤ አዋይ ዉልያ ባጋ አሳይካ ያሻን ኮኮሬ። 21 አዉደካ ኢታ አሳቱዋ ዉርሰꬃይ ሄዋ ማላ፤ ጾሳ ኤረናዋንቱ ካጫይካ ሄዋ ማላ” ያጌዳ።