ISIRELIBA KA BWESE TUKUNU
9
Yinni Gusunɔ
u koo bwese ni nu tie siri
1 Amɛniwɑ Yinni Gusunɔ u geruɑ Hɑdɑrɑkin tem sɔ̃ u nɛɛ,
kon wuu ge bɑ mɔ̀ Dɑmɑsi siri.
Domi nɛn nɔni wɑ̃ɑ tɔmbu sɔɔ
nge mɛ yi wɑ̃ɑ Isirelibɑn bwese kɛri kpuro sɔɔ.
2 Kon mɑɑ Hɑmɑti ye yɑ wɑ̃ɑ Dɑmɑsin tem nɔɔ burɑ yerɔn tem siri
kɑ Tiri kɑ sere mɑɑ Sidoni,
bɑɑ mɛ wuu sin tɔmbu bɑ bwisi mɔ.
3 Tiri ye, yɑ wɑ̃ɑ gbɑ̃rɑ dɑmgirun suunu sɔɔ.
Mɛyɑ yɑ gobi gurɑmɔ nge tuɑ.
Mɑ yɑ wurɑ gurɑmɔ nge pɔtɔkɔ.
4 Adɑmɑ nɛ, Yinni Gusunɔ, kon ye kpuro mwɑ.
Kon yen dɑm sure nim wɔ̃ku sɔɔ
kpɑ n de yu dɔ̃ɔ mwɑɑrɑ.
5 Asikɑlonigibu bɑ koo ye wɑ
kpɑ bu bɛrum duurɑ.
Kon de tem yiiri bɑkɑbu bu Gɑsɑ wɔri,
kpɑ Ekoronigibun yĩiyɔbu kpuro bu kɑm ko.
Gɑsɑ yɑ koo sunɔ biɑ.
Goo kun ko n mɑɑ wɑ̃ɑ Asikɑloniɔ.
6 Sɔbu bɑ koo nɑ bu sinɑ Asidɔduɔ.
Kpɑ n Filisitibɑn tii suɑbu kpeerɑsiɑ.
7 Bɑ ǹ mɑɑ yɛm dimɔ.
Bɑ ǹ mɑɑ bũu yɑ̃ku dĩɑnu dimɔ.
Bɑ koo kowɑ nɛ, Gusunɔn tɔmbu nge Yudɑbɑ
kpɑ Ekoronigibu bɑ n mɑɑ sɑ̃ɑ nɛn tɔmbu
nge mɛ Yebusibɑ bɑ kuɑ.
8 Kon nɛn sɑnsɑni girɑ n kɑ nɛn sɑ̃ɑ yeru sikerenɑ.
Kpɑ yibɛrɛ be bɑ dɑɑmɔ bɑ wurɑmɑmɔ bu ku rɑɑ ye wɔri.
Dɑm diobɑ kun mɑɑ sɑrɔ mi.
Domi nɛn nɔni wɑ̃ɑ mi.
Sunɔ wi u kɑ bɔri yɛndu sisi
9 Bɛɛ Siɔnigibu, i nuku dobun kuuki koowo.
Bɛɛ Yerusɑlɛmugibu, i yɛ̃ɛrio nuku dobun sɔ̃.
Wee bɛɛn sinɑ boko u sisi bɛɛn mi.
U sɑ̃ɑwɑ gemgii kɑ fɑɑbɑ kowo.
U ǹ tii sue.
Kɛtɛku buuwɑ u sɔni.
10 Kon de tɑbu kɛkɛ yi kpe Efɑrɑimun temɔ
kpɑ dumi kɑ tɛn ni bɑ rɑɑ kɑ tɑbu kuɑ yu kpeerɑ Yerusɑlɛmuɔ.
Sunɔ wi, u koo kɑ bwesenu bɔri yɛndu nɑɑwɑ.
U ko n bɑndu diiwɑ nim wɔ̃ku geen di
sere kɑ nim wɔ̃ku giɔ,
sɑɑ mɑɑ dɑɑ te bɑ mɔ̀ Efɑrɑtin di n kɑ dɑ hɑnduniɑn goonu nnɛ sɔɔ.
Pirisɔmbɑn kɑrɑbu
11 Yinni Gusunɔ u nɛɛ,
nɛn ɑrukɑwɑni ye nɑ kɑ bɛɛ bɔkuɑn sɔ̃,
mɑ i ye sire kɑ yɑ̃ku yɑɑ yɛm,
kon bɛɛn yobu yɑrɑ dɔkɔ kpirirun di te tɑ ǹ nim mɔ.
12 Bɛɛ yobu, bɛɛ be i yĩiyɔ bɑkɑbu mɔ,
i wuro bɛɛn wusɔ si su gbɑ̃rɑnu mɔ.
Nɑ mɑɑ bɛɛ nɔɔsiɑmɔ mɑ kon bɛɛ domɑru kuɑ
nge yellugirun nɔn yiru.
13 Kon Yudɑ dendi nge tɛndu.
Kpɑ Efɑrɑimu yɑ n sɑ̃ɑ ten sɛ̃ɛnu.
Yerusɑlɛmu, kon wunɛn bibu suɑ bu Gɛrɛkibɑ tɑbu wɔri.
Kon bu kowɑ nge tɑbu durɔ dɑmgiin tɑkobi.
14 Nɛ, Yinni Gusunɔ, kon tii sɔ̃ɔsi wɔllɔ.
Nɛn sɛ̃u gɑ koo doonɑ nge guru mɑɑkinu.
Kon kɔbɑ so,
kpɑ n sɑrɑmɑ guru woo bɔkɔ sɔɔ,
ge gɑ wee sɑɑ sɔ̃ɔ yɛ̃sɑn nɔm dwɑru giɑn di.
15 Nɛ, Gusunɔ, wɔllu kɑ tem Yinni, kon nɛn tɔmbu kɔ̃su.
Bɑ koo ben yibɛrɛbɑ kɑmiɑ bu ben kpurɑntɛɛnun kpenu kɔsuku.
Kon de yibɛrɛ ben yɛm mu yɑri nge tɑm,
ǹ kun mɛ nge yɑ̃ku yɑɑ yɛm mɛ mu rɑ gbɛ̃ɛru yibu
bu yɛ̃kɑ yɑ̃ku yerun kɑ̃ɑnɔ.
16 Yen tɔ̃ɔ te, kon nɛn tɔmbu fɑɑbɑ ko
nge mɛ yɑ̃ɑ kpɑro u rɑ win yɑ̃ɑnu fɑɑbɑ ko.
Bɑ koo bɑlli ben temɔ nge kpee gobigii
ni bɑ mɑni sinɑ furɔ sɔɔ.
17 Tem miyɑ doo nɔɔru kɑ burɑm mu ko n wɑ̃ɑ.
Alikɑmɑ kɑ tɑm koo de ɑluwɑɑsibɑ kɑ wɔndiɑbɑ bɑ n dɑm mɔ.