10
Gusunɔ turowɑ sɑ̃ɑ Yinni
1 I Yinni Gusunɔ kɑnɔ u bɛɛ tom buruku gurɑ kɛ̃.
U koo de guru woo gu nɑ
kpɑ guru bɑkɑ yu nɛ.
Kpɑ yɑkɑsu su kpi bɑɑmɑ.
2 Domi bũu nìn bwɑ̃ɑrokunu bɑ mɔ̀ Terɑfimu nu weesu mɔ̀.
Sɔrobu bɑ kɑ̃si weesuginu wɑɑmɔ.
Ben dosusu su sɑ̃ɑwɑ weesu.
Sin nuku yɛmiɑsiɑbu sɑ̃ɑwɑ kɑm dirum.
Yen sɔ̃nɑ bɑ sirenɛ nge yɑɑ sɑbenu.
Bɑ wɔnwɔndu soore,
domi bɑ ǹ kpɑro mɔ.
Yinni Gusunɔ
u koo win tɔmbu yɑkiɑ
3 Yinni Gusunɔ u nɛɛ,
nɑ kɑ kpɑro tuko be bɑ nɛn tɔmbu kpɑre mɔru mɔ̀.
Be, be bɑ sɑ̃ɑ nge bonu mi, kon bu wɔrimɑ.
Domi nɛ, Gusunɔ wɔllu kɑ tem Yinni
nɑ nɛn tɔmbu Yudɑbɑ nɑɑwɑ.
Kon bu dendiwɑ tɑbu sɔɔ nge dum girimɑgiɑ.
4 Ben min diyɑ sinɑmbu bɑ koo yɑri.
Kpɑ bɑ n dɑm mɔ nge gɑni gɔmburun kperu,
ǹ kun mɛ nge kuu bekurugirun gbere,
ǹ kun mɛ nge tɛn te bɑ rɑ kɑ tɑbu de.
5 Bɑ ko n sɑ̃ɑwɑ nge tɑbu durɔ dɑmgii
be bɑ ben yibɛrɛbɑ tɑɑkumɔ swɛɛ sɔɔ nge pɔtɔkɔ.
Bɑ koo tɑbu ko yèn sɔ̃ nɛ, Yinni Gusunɔ ko nɑ n kɑ bu wɑ̃ɑ.
Ben yibɛrɛ be bɑ dumi yɔɔwɑ bɑ koo sekuru wɑ.
6 Kon Yudɑbɑ tɑ̃sisiɑ,
kpɑ n Isirelibɑ wɔrɑ.
Kon kɑ bu wurɑmɑ,
domi nɑ ben wɔnwɔndu mɔ.
Bɑ ko n sɑ̃ɑwɑ nge be nɑ ǹ dɑɑ biru kisi.
Domi nɛnɑ nɑ sɑ̃ɑ Gusunɔ ben Yinni.
Kon ben kɑnɑru mwɑ.
7 Efɑrɑimubɑ bɑ ko n sɑ̃ɑwɑ nge tɑbu durɔ dɑmgibu.
Bɑ ko n nuku dobu mɔ nge wi u tɑm nɔrɑ.
Ben bibu bɑ koo ye wɑ kpɑ bu nuku dobu ko.
Bɑ koo nuku dobu ko nɛ, Yinni Gusunɔn sɔ̃.
8 Kon wiɑ ko bu kɑ mɛnnɑmɑ.
Domi nɛnɑ nɑ bu yɑkiɑmɔ.
Bɑ koo dɑbiɑ nge yellu.
9 Kpɑ n de bɑ n pusɑ bwesenun suunu sɔɔ.
Mi bɑ wɑ̃ɑ n tomɑ mi,
bɑ ko n dɑ mɑn yɑɑye min di.
Kpɑ bɑ n wɑ̃ɑ mi kɑ ben bibu.
Yen biru, bɑ koo wurɑmɑ.
10 Kon de bu wurɑmɑ sɑɑ Egibitin di.
Kon bu mɛnnɑmɑ sɑɑ Asirin di.
Kpɑ n de bu wurɑmɑ Gɑlɑdiɔ kɑ Libɑniɔ.
Bɑtumɑ kun bu turi.
11 Bɑ koo nim wɔ̃ku tɔburɑ mi bɑ nuku sɑnkirɑru wɑ.
Gusunɔ u koo gen nim kurenu so,
kpɑ Nilun dɑɑrun nim mu gberɑ.
Asirigibun tii suɑbu koo kpe.
Kpɑ Egibitigibun bɑndu tu nɔru ko.
12 Kon nɛn tɔmbu tɑ̃sisiɑ.
Kpɑ bɑ n sĩimɔ kɑ nɛn yĩsiru.
Nɛ, Yinni Gusunɔwɑ nɑ yeni geruɑ.