8
Yinni Gusunɔ u koo
Yerusɑlɛmu wesiɑ nge yellu
1 Gusunɔ wɔllu kɑ tem Yinni u geruɑ u nɛɛ,
2 nɛn nisinu kpɑ̃ Yerusɑlɛmun sɔ̃.
Domi nɑ ye kĩ gem gem.
3 Yen sɔ̃nɑ nɑ nɛɛ, kon wurɑ Yerusɑlɛmu ye sɔɔ
kpɑ nɑ n wɑ̃ɑ mi.
Bɑ koo ye soku wuu gemguu.
Kpɑ bu mɑɑ nɛ, Gusunɔ wɔllu kɑ tem Yinnin guu te soku guu dɛɛrɑru.
4 Durɔ tɔkɔnu kɑ kurɔ tɔkɔnu
nu koo kɑ dɛki sĩimɑ
kpɑ nu nɑ nu sinɑ yen bɑtumɑbɑ sɔɔ.
5 Bii ɑluwɑɑsibɑ kɑ bii wɔndiɑbɑ
bɑ koo yibu yen bɑtumɑ be sɔɔ
bɑ n dweebu mɔ̀.
6 Isireli be bɑ tien nɔni sɔɔ,
yɑ ko n sɑ̃ɑ nge ye yɑ kun kpɛ̃ yu koorɑ.
Adɑmɑ nɛ, Gusunɔ wɔllu kɑ tem Yinni,
kon kpĩ n mɑɑmɑɑki ye ko.
Nɛnɑ nɑ yeni geruɑ.
7 Wee nɑ nɛn tɔmbu fɑɑbɑ mɔ̀
be bɑ wɑ̃ɑ sɔ̃ɔ yɑri yerɔ kɑ sɔ̃ɔ duu yerɔ.
8 Kon kɑ bu wurɑmɑ kpɑ bu sinɑ Yerusɑlɛmuɔ
bɑ n sɑ̃ɑ nɛn tɔmbu
kpɑ nɑ n mɑɑ sɑ̃ɑ ben Yinni gemgii
wi u nɑɑnɛ mɔ.
9 Wee ye nɛ, Gusunɔ wɔllu kɑ tem Yinni nɑ geruɑ.
Nɑ nɛɛ, i wɔrugɔru koowo
bɛɛ be i nuɑ gisɔ ye nɛn sɔmɔbu bɑ geruɑ
sɑnɑm mɛ bɑ nɛn sɑ̃ɑ yee ten kpɛɛkpɛɛku swĩi.
10 Domi yellu, goo ku rɑ win sɔmburun kɔsiɑru wɑ.
Goo ku rɑ mɑɑ yɑɑ sɑbe ni nu nùn sɔmburu kuɑn kɔsiɑru wɛ̃.
Sɑɑ ye sɔɔ, goo ku rɑ yɑri.
Goo ku rɑ mɑɑ du kɑ bɔri yɛndu yibɛrɛbɑn sɔ̃.
Domi nɑ tɔmbu yɔ̃suwɑ bu kɑ wɔrinɑ.
11 Adɑmɑ tɛ̃, nɑ ǹ mɑɑ Isireli be bɑ tie kuɑmmɛ nge mɛ nɑ kuɑ yellu.
Nɛ, Gusunɔ wɔllu kɑ tem Yinniwɑ nɑ yeni geruɑ.
12 Kon de bɔri yɛndu tu duwɑ tem sɔɔ kpuro.
Resɛm yɑ koo mɑ.
Gurɑ yɑ koo nɛ
kpɑ tem mu dĩɑnu ko.
Domɑ nini kpurowɑ kon Isireli be bɑ tie kuɑ.
13 Bɛɛ Yudɑbɑ kɑ Isirelibɑ,
wee i kuɑ bwese te nɑ bɔ̃rusi bwesenun suunu sɔɔ.
Adɑmɑ tɛ̃, kon bɛɛ fɑɑbɑ ko
kpɑ i n sɑ̃ɑ domɑrugibu tɔmbun suunu sɔɔ.
Yen sɔ̃, i ku bɛrum ko.
I de i n wɔrugɔru mɔ.
14 Amɛniwɑ nɛ, Gusunɔ wɔllu kɑ tem Yinni nɑ geruɑ.
Nɑ nɛɛ, nɑ rɑɑ gɔ̃ru doke n bɛɛ kɔ̃sɑ kuɑ
yèn sɔ̃ bɛɛn bɑɑbɑbɑ bɑ nɛn mɔru seeyɑ.
Nɑ ǹ dɑɑ gɔ̃ru gɔsie n ye kɔbiɑ.
15 Adɑmɑ tɛ̃, nɑ gɔ̃ru doke
n Yerusɑlɛmu kɑ Yudɑn tem kpuro geɑ kuɑ.
Yen sɔ̃, i ku bɛrum ko.
16 I kɑ gɑri yini sɔmburu koowo.
Yiyɑ, bɑɑwure u n dɑ win winsim gem sɔ̃.
Kpɑ i n dɑ bɑɑwure siri gem sɔɔ
i n kɑ wɑ̃ɑ bɔri yɛndu sɔɔ.
17 I ku goo kɔ̃sɑ kuɑ.
I ku bɔ̃ri weesugii ko.
Domi yenibɑ kpurowɑ nɑ tusɑ.
Nɛ, Yinni Gusunɔwɑ nɑ yeni geruɑ.
Nɔɔ bɔkurun tɔ̃ru tɑ koo
gɔsirɑ nuku dobun tɔ̃ru
18 Gusunɔ wɔllu kɑ tem Yinni u nɛɛ,
19 nɔɔ bɔku ni i rɑ ko suru nnɛse sɔɔ kɑ suru nɔɔbuse sɔɔ kɑ suru nɔɔbɑ yiruse sɔɔ kɑ suru wɔkuruse sɔɔ, nu koo gɔsirɑ nuku dobun tɔ̃nu Yudɑɔ. Ni sɔɔrɑ bɑ ko n dɑ tɔ̃ɔ bɑkɑnu di.
Adɑmɑ yebɑ kpuro sɔɔ, i de i gem kɑ bɔri yɛndu kĩɑ.
20 Nɑ mɑɑ wure nɑ nɛɛ,
tɔmbu bɑ koo nɑ Yerusɑlɛmuɔ
sɑɑ wusu dɑbinun di.
21 Wusu gɑsun tɔmbu bɑ koo gɑsun tɔmbu sɔ̃ bu nɛɛ,
bu dɑ bu nɛ, Gusunɔ wɔllu kɑ tem Yinnin durom kɑsu Yerusɑlɛmuɔ
kpɑ bu mɑn sɑ̃.
22 Geemɑ, bwese dɑbinu kɑ mɑɑ bwese ni nu dɑm mɔ
nu koo nɑ nu nɛn durom mɛ kɑsu
kpɑ nu mɑn sɑ̃.
23 Nɛ, Gusunɔ wɔllu kɑ tem Yinni nɑ nɛɛ,
yen tɔ̃ɔ te, bweseru bɑɑtere sɔɔ,
tɔmbu wɔku wɔkubu bɑ ko n Yuu turon yɑbe soo nɛni
bɑ n mɔ̀, bɑ koo kɑ nùn dɑ.
Domi bɑ nuɑ mɑ nɛ, Gusunɔ nɑ wɑ̃ɑ kɑ wi.