6
1 mɑnɑ wunɛn kĩnɑsi wi, u dɑ,
wunɛ wi ɑ kurɔbu kpuro burɑm kere.
Berɑ mɑnɑ u gɛre, kpɑ su kɑ nun wi kɑsu.
Kurɔ u nɛɛ,
2 nɛn kĩnɑsi u dɑwɑ win dɑ̃ɑ gbɑɑrɔ,
mi turɑre bii wɑ̃ɑ yi yi kpiibu wee,
u kɑ win sɑbenu kpɑrɑ kpɑ u biibii bɔɔri.
3 Nɑ sɑ̃ɑwɑ nɛn kĩnɑsigii, mɑ u mɑɑ sɑ̃ɑ nɛgii.
U win sɑbenu kpɑrɑmɔ biibiin suunu sɔɔ.
Nge mɛ kurɔ win wɑsi sɑ̃ɑ
Durɔ u nɛɛ,
4 ɑ girimɑ mɔ nge wuu ge bɑ mɔ̀ Tirisɑ.
Nɛn kĩnɑsi, ɑ wɑ̃ nge Yerusɑlɛmu.
A nɑnum mɔ nge tɑbu sĩɑ kɑ yen gidi bɔrɑ.
5 A ku mɑɑ mɑn mɛɛri.
Domi wunɛn nɔni yi nɛn kĩru seeyɑmɔ.
Wunɛn seri yi sɑ̃ɑ nge boo wuuru
te tɑ sɑrɑmɑmɔ Gɑlɑdin guurun wɔllun di.
6 Wunɛn donnu nu buriri nge yɑ̃ɑ nìn sɑnsu bɑ bɔɔrɑ
nu nim nɔrum wee, nu mɑɑ nɔɔ nɛwɑ swɛɛ swɛɛ, nin gɑrɑ kun kɑnde.
7 Wunɛn bɑɑnu nu bɑllimɔwɑ nge dire sɔnsɔm biɑ wunɛn sɔnditiɑn wɛ̃rin di.
8 Sinɑnibun geerɑ sɑ̃ɑwɑ wɑtɑ,
sinɑ kurɔbu mɑɑ wɛnɛ.
Wɔndiɑbɑn geerɑ kun nɔru mɔ be.
9 Adɑmɑ nɛn kĩnɑsi wi, u ǹ bɑu mɔ,
u sɑ̃ɑwɑ nɛnɛm be sɔɔ.
U sɑ̃ɑwɑ win mɛron bii wɔndiɑ teereru te u kĩ too.
Wɔndiɑ be bɑ nùn wɑ, bɑ nɛɛ,
u sɑ̃ɑwɑ domɑrugii.
Sinɑnibu kɑ bɑn sinɑ kurɔbu bɑ mɑɑ nùn siɑrɑ bɑ nɛɛ,
10 wɑrɑ u yɑrimɑm wee nge buruku sɔ̃ɔ.
Wɑrɑ u wɑ̃ mɛ nge suru.
Wɑrɑ u bɑllimɔ nge sɔ̃ɔ.
U nɑnum mɔ nge tɑbu sĩɑ kɑ yen gidi bɔrɑ.
11 Nɑ dɑ dɑ̃ɑ gbɑɑrɔ mi dɑ̃ɑ mɑrum wɑ̃ɑ,
n kɑ wɑ yɑkɑsu sù n kpiɑ wɔwɑɔ,
kpɑ n wɑ resɛm tɔ̃kɑ yɑ̀ n kpɑrɑ,
kpɑ n mɑɑ wɑ dɑ̃ɑ te bɑ mɔ̀ gerenɑdi tɑ̀ n wɛ̃su sɑ̃ɑ.
12 Nɑ ǹ kɑ bɑɑru nɛn bwɛ̃rɑ mɑn suɑ,
yɑ mɑn doke nɛn tɔmbun tɑbu kɛkɛbɑn suunu sɔɔ yi dumi gɑwe.
Kurɔbu kɑ wɔndiɑbɑ bɑ nɛɛ,