5
1 nɑ duɑ nɛn dɑ̃ɑ gbɑɑru sɔɔ,
nɛn sesu, nɛn kurɔ.
Nɑ nɛn turɑre ye bɑ mɔ̀ mirun dɑ̃ɑ yorimɔ kɑ kiki si su nuburu do.
Nɑ nɛn tim bɑun tim dimɔ.
Nɑ nɛn tɑm kɑ nɛn bom nɔrumɔ.
Yerusɑlɛmun wɔndiɑbɑ bɑ nɛɛ,
i dio, bɛɛ be i kĩɑnɛ.
I nɔruo kpɑ i n kĩru bɑrɔ.
Kurɔ u gɑmbo wukiɑ
ɑdɑmɑ n dɑ̃kuru kuɑ
Kurɔ u nɛɛ,
2 nɑ dò ɑdɑmɑ nɛn bwɛ̃rɑ yɑ ǹ kpĩ.
Nɑ kɑ nɛn kĩnɑsi dosimɔ u gɑmbo soomɔ.
Durɔ u nɛɛ,
ɑ mɑn kɛniɔ, nɛn sesu, nɛn kĩnɑsi.
Wunɛ wi ɑ sɑ̃ɑ nge sɑ̃kusɑ̃, ɑ yibɑ.
Nɛn wirɑ nikererɑ.
Mɑ nɛn seri nim sɛ̃ɛrɑ.
Kurɔ u nɛɛ,
3 wee nɑ nɛn yɑberu potɑ.
Kon mɑɑ kpĩ n se n tu sebe?
Nɑ nɛn kɔ̃ri kpɑkiɑ kɔ, yerɑ kon mɑɑ se n yi disinu ko?
4 Yerɑ nɛn kĩnɑsi wi, u win nɔmu kpɛ̃ɛmɑ gɑmbon wem di,
mɑ nɛn bwɛ̃rɑ wurɑ win mi.
5 Nɑ seewɑ n kɑ nùn kɛniɑ.
Turɑre ye bɑ mɔ̀ miru yɑ dɑ̃ɑkumɔ nɛn nɔmɑn di gɑmbon nɛnutiɑ sɔɔ.
6 Nɑ nɛn kĩnɑsi kɛniɑ,
ɑdɑmɑ nɑ deemɑ u doonɑ.
Nɛn bwɛ̃rɑ rɑɑ wurɑ win mi, sɑnɑm mɛ nɑ win nɔɔ nuɑ.
Nɑ nùn kɑsu kɑsu, nɑ ǹ nùn wɑ.
Nɑ nùn sokɑ, u ǹ wure.
7 Wuu gen kɔ̃sobu bɑ kɑ mɑn yinnɑ.
Bɑ mɑn so bɑ mɛɛrɑ kuɑ.
Be bɑ gbɑ̃rɑru kɔ̃su, bɑ nɛn sɔnditiɑ mwɑ.
8 Bɛɛ Yerusɑlɛmun wɔndiɑbɑ, nɑ bɛɛ kɑnɑmɔ,
ì n nɛn kĩnɑsi wɑ, i nùn sɔ̃ɔwɔ win kĩrɑ mɑn bɑrɔ kuɑ.
Yerusɑlɛmun wɔndiɑbɑ bɑ nɛɛ,
9 wunɛ wi ɑ kurɔbu kpuro burɑm kere,
mbɑ wunɛn kĩnɑsi wi, u mɔ ye goo kun mɔ ɑ kɑ sun sɔ̃ɔmɔ mɛ.
Kurɔ u nɛɛ,
10 nɛn kĩnɑsi, tɔn swɑ̃ɔwɑ, win wuswɑɑ bɑllimɔ.
Tɔmbu nɔrɔbun subɑ wɔkuru (10.000) sɔɔ, wiyɑ kɑɑ wɑɑbu gbi.
11 Win wuswɑɑ yɑ bɑllimɔ nge wurɑ geɑ.
Win seri yi tĩriwɑ nge gunɔ mɔrɑn sɑnsu.
12 Win nɔni yi sɑ̃ɑwɑ nge wɑɑ bɑkɑgii ye yɑ wɑ̃ɑ dɑɑrɔ.
Win nɔni kpiki yi sɑ̃ɑwɑ nge bom bekum.
Nɔni yi, yi kɑ kpee gobiginu weenɛ ni bɑ doke tɑɑbu sɔɔ.
13 Win bɑɑnu nu wɑ̃wɑ nge turɑre bii yi yi kpiibu wee.
Win nɔɔ gɑ sɑ̃ɑwɑ nge biibii yèn min di turɑre yɑ dɑ̃ɑkumɔ.
14 Win nɔmɑ yɑ kɑ wurɑn sumɑ weenɛ ye bɑ kpee gobiginu dokeɑ.
Win wɑsi yi wɔru nge suunu don te bɑ wɔriɑsiɑ
bɑ burɑru koosi kɑ kpee burɑnu ni nu nɔni boogu mɔ.
15 Win kɔ̃ri yi sɑ̃ɑwɑ nge gbere yiru ye bɑ kuɑ kɑ kpee kpikiru.
Mɑ bɑ ye girɑ wurɑ geɑn wɔllɔ.
À n nùn mɛɛrɑ, u sɑ̃ɑwɑ nge Libɑnin dɑ̃ɑ ni bɑ mɔ̀ sɛduru.
16 Win nɔɔn gɑri do.
Wi sɔɔrɑ nɛn bwɛ̃rɑ rɑ n wɑ̃ɑ mɑm mɑm.
Bɛɛ Yerusɑlɛmun wɔndiɑbɑ, mɛ nɛn bɔrɔ kĩnɑsi wi, u sɑ̃ɑwɑ mi.
Yerusɑlɛmun wɔndiɑbɑ bɑ nɛɛ,