7
1 ɑ gɔsirɑmɑ, ɑ gɔsirɑmɑ, Sunɛmun bii,
ɑ gɔsirɑmɑ su nun mɛɛri.
Mbɑn sɔ̃nɑ i nɛ Sunɛmun bii mɛɛrɑ
nge wi u yɑɑmɔ tɔn wuunu yirun bɑɑ sɔɔ.
Durɔ u nɛɛ,
2 wɔndiɑ bɛɛrɛgii, wunɛn nɑɑsu su wɑ̃ sɑlubɑtɑ sɔɔ.
Wunɛn pɔrɑ yɑ wɑ̃wɑ nge sɑbɑ.
Wi u ye kuɑ mɔmɔn tiiwɑ.
3 Wunɛn bwĩirun girɑ yerɑ sɑ̃ɑwɑ bwɛrɛrɛ nge nɔrɑn nɔɔ
ye yɑ ku rɑ tɑm kpe.
Wunɛn bɔsɔ gɑ swɛ̃ri nge ɑlikɑmɑ ye bɑ kɑ biibii sikerenɛ.
4 Wunɛn bwɑ̃su sɑ̃ɑwɑ nge yɑɑ kpikun binu yiru.
5 Wunɛn wĩiru tɑ buririwɑ nge suunu donnu.
Wunɛn nɔni yi dɛɛrewɑ nge Hɛsibonin yɛru
si su wɑ̃ɑ wuu bɔkɔ gen kɔnnɔn bɔkuɔ.
Wunɛn wɛ̃ru tɑ dɛndewɑ mɑm mɑm nge Libɑnin kɔ̃su yeru
te tɑ Dɑmɑsi mɛɛrɑ.
6 Wunɛn wirɑ suɑrewɑ nge guu te bɑ mɔ̀ Kɑɑmɛli.
Mɑ wunɛn tɑrɑ yɑ bɑllimɔ nge beku gobigiru
sere yɑ sinɑ bokon bwɛ̃rɑ kpuro mwɑ.
7 Wunɛn burɑm bɑndɑ, ɑ mɑn wɛ̃re too.
Wunɛ sɔɔrɑ nɛn kĩru kpuro wɑ̃ɑ.
8 Wunɛn wɑsi yi dɛndewɑ nge kpɑkpɑ bɑ̃ɑ.
Wunɛn bwɑ̃su su sɑ̃ɑwɑ nge dɑ̃ɑ mɑrum swɑɑru.
9 Nɑ nɛɛ, kon kpɑkpɑ yɔwɑ kpɑ n yen mɑrum nɛnɛ.
Wunɛn bwɑ̃su su sɑ̃ɑwɑ nge resɛm swɑɑru.
Wunɛn wɛ̃siɑru tɑ nuburu do nge dɑ̃ɑ mɑrum mɛ bɑ mɔ̀ pɔmu.
10 Nɑ̀ n nun sɔ̃su, nɑ rɑ n nuku dobu mɔ nge wi u tɑm durom nɔrɑ.
Kurɔ u nɛɛ,
tɑm mɛ, mu kokuo nɛn kĩnɑsin sɔ̃
mu du win nɔɔ sɔɔ ù n dweeyɑmɔ.
11 Nɑ sɑ̃ɑwɑ nɛn kĩnɑsigii,
mɑ win kĩru kpuro wɑ̃ɑ nɛ sɔɔ.
Kĩɑnɑ sɔɔrɑ nuku dobɑ wɑ̃ɑ
Kurɔ u nɛɛ,
12 nɛn kĩnɑsi, ɑ yɑrimɑ su dɑ bɑru kpɑɑnɔ kpɑ sɑ n wɑ̃ɑ mi.
13 Bururu sɑ ko se su dɑ dɑ̃ɑ gbɑɑrɔ,
su wɑ resɛm tɔ̃kɑ kɑ dɑ̃ɑ te bɑ mɔ̀
gerenɑdi yɑ̀ n kpɑre yɑ wɛ̃su sɑ̃ɑ.
Miyɑ kon nun kĩru sɔ̃ɔsi.
14 Dɑ̃ɑ te bɑ mɔ̀ mɑndɑrɑgore tɑ ten turɑre yɛ̃kɑmɔ.
Bɛsɛn yɛnu kɔnnɔwɔ, sɑ dɑ̃ɑ mɑrum kpuro mɔ mɛ mu dobu bo,
ginɑkugim kɑ gisɔku gegim.
Nɑ mɛ kpuro yii wunɛn sɔ̃ nɛn kĩnɑsi.