ལེའུ་བརྒྱད༌པ།
དམ་པའི་ཐུགས་ཉིད་ལ་བརྟེན་པའི་ཚེ༌སྲོག
1 དེ་བས་ན། ད་ལྟ་མཱ་ཤི་ཀ་ཡེ་ཤུའི་ནང་དུ་གནས་པ་རྣམས་ལ་ཉེས་ཆད་ཕོག་པ་ཅི་ཡང་མེད་དོ།།
2 ཅིའི་ཕྱིར་ཞེ་ན། མཱ་ཤི་ཀ་ཡེ་ཤུའི་ནང་དུ་ཡོད་པའི་ཚེ་སྲོག་གནང་མཁན་ཏེ་དམ་པའི་ཐུགས་ཉིད་ཀྱི་ཆོས་ཉིད་ཀྱིས། ཁྱོད་རང་ སྡིག་པ་དང་འཆི་བའི་ཆོས་ཉིད་ལས་ཐར་བར་མཛད་པའི་ཕྱིར༌ཡིན།
3 ཤ་གཟུགས་ཀྱི་ཕུང་བོའི་ནུས་ཤུགས་ཞན་པའི་དབང་གིས་བཀའ་ཁྲིམས་ཀྱིས་བསྒྲུབ་མ་ཐུབ་པ་དེ་དཀོན་མཆོག་གིས་བསྒྲུབས་ཏེ། ཁོང་གིས་རང་གི་སྲས་ནི་སྡིག་པའི་ལུས་ཀྱི་རྣམ་པ་དང་འདྲ་བའི་སྡིག་པའི་བཤགས་མཆོད་དུ་མངགས༌ཤིང་། ཤ་གཟུགས་ཀྱི་ཕུང་བོའི་ནང་དུ་སྡིག་པར་ཉེས་ཆད་བཅད་དོ།།
4 དེ་ནི་བཀའ་ཁྲིམས་ཀྱིས་བཏོན་པའི་རྣམ་པར་དག་པའི་བླང་བྱ་ནི་བདག་ཅག་གིས་ཤ་གཟུགས་ཀྱི་ཕུང་བོ་དང་མི་བསྟུན་པར། དམ་པའི་ཐུགས་ཉིད་ལ་བསྟུན་ནས་སྐྱོད་མཁན་རྣམས་ཀྱི་སྟེང་དུ་འགྲུབ་པར་མཛད་པའི་ཕྱིར༌ཡིན།
5 ཅིའི་ཕྱིར་ཞེ་ན། ཤ་གཟུགས་ཀྱི་ཕུང་བོར་བསྟུན་མཁན་གྱིས་ཤ་གཟུགས་ཀྱི་ཕུང་བོའི་དོན་བསམ༌ཞིང༌། དམ་པའི་ཐུགས་ཉིད་ལ་བསྟུན་མཁན་གྱིས་དམ་པའི་ཐུགས་ཉིད་ཀྱི་དོན་བསམ་པས༌སོ།།
6 ཡང་ཤ་གཟུགས་ཀྱི་ཕུང་བོ་བསམ་པའི་མཇུག་འབྲས་ནི་འཆི་བ༌དང༌། དམ་པའི་ཐུགས་ཉིད་བསམ་པའི་མཇུག་འབྲས་ནི་ཚེ་སྲོག་དང་ཞི་བདེ་ཡིན།
7 མ་གཞི་ཤ་གཟུགས་ཀྱི་ཕུང་བོ་བསམ་པ་རྣམས་ཀྱིས་དཀོན་མཆོག་གི་བཀའ་ཁྲིམས་ལ་མི་བསྟུན་པ་དང་བསྟུན་ཡང་མི་ནུས་པས་དཀོན་མཆོག་ནི་དགྲ་རུ་བཟུང༌བ་ཡིན་ནོ།།
8 དེར་མ༌ཟད། ཤ་གཟུགས་ཀྱི་ཕུང་བོར་གཏོགས་པ་རྣམས་ཀྱིས་དཀོན་མཆོག་གི་ཐུགས་དགྱེས་པར་བྱ་མི་ནུས་སོ།།
9 འོན་ཀྱང་། དཀོན་མཆོག་གི་ཐུགས་ཉིད་ནི་དངོས་གནས་ཁྱོད་ཅག་གི་ནང་དུ་བཞུགས་པ་ཡིན༌ན། ཁྱོད་ཅག་ཤ་གཟུགས་ཀྱི་ཕུང་བོར་མི་གཏོགས་པར་དམ་པའི་ཐུགས་ཉིད་ལ་གཏོགས༌ཤིང་། མི་ཞིག་ལ་སྐྱབས་མགོན་མཱ་ཤི་ཀའི་ཐུགས་ཉིད་མི་ལྡན༌ན། མི་དེ་ནི་ཁོང་ལ་མི་གཏོགས༌པ་ཡིན་ནོ།།
10 སྐྱབས་མགོན་མཱ་ཤི་ཀ་ཁྱོད་ཅག་གི་ནང་དུ་བཞུགས༌ན། ཁྱོད་ཅག་གི་ལུས་པོ་ནི་སྡིག་པའི་རྐྱེན་གྱིས་ཤི་ཡང༌། ཁྱོད་ཅག་གི་སེམས་ནི་རྣམ་པར་དག་པའི་དབང་གིས་གསོན༌པ་ཡིན་ནོ།།
11 འོན༌ཀྱང༌། མཱ་ཤི་ཀ་ཡེ་ཤུ་སྐུ་གྲོངས་པ་ནས་སླར་གསོན་པར་མཛད་མཁན༌དཀོན་མཆོག་གི་ཐུགས་ཉིད་ནི་ཁྱོད་ཅག་གི་ནང་དུ་བཞུགས་པ་ཡིན༌ན། ཁོང་གིས་ཀྱང་ཁྱོད་ཅག་གི་ནང་དུ་བཞུགས་པའི་དམ་པའི་ཐུགས་ཉིད་བརྒྱུད༌ནས། ཁྱོད་ཅག་གི་འཆི་བར་འགྱུར་བའི་ལུས་པོ་དེ་སླར་ཡང་གསོན་པར་མཛད་ངེས༌སོ།།
12 སྤུན་ཟླ༌རྣམས། འདི་ལྟར་བལྟས༌ན། བདག་ཅག་གིས་ཤ་གཟུགས་ཀྱི་ཕུང་བོར་བུ་ལོན་ཆད་པ་མ་ཡིན་ལ་དེར་བསྟུན་ནས་འཚོ་བའང་མིན་ནོ།།
13 གལ༌ཏེ། ཁྱོད་རྣམས་ཤ་གཟུགས་ཀྱི་ཕུང་བོར་བསྟུན་ནས་འཚོ་བ་ཡིན་ན་ངེས་པར༌འཆི་བ་དང་། གལ༌ཏེ། དམ་པའི་ཐུགས་ཉིད་ལ་བརྟེན་ནས་ལུས་པོའི་སྤྱོད་ངན་བཅོམ་ན་གསོན་པར་འགྱུར་རོ།།
14 རྒྱུ་མཚན་ནི་དཀོན་མཆོག་གི་ཐུགས་ཉིད་ཀྱིས་ཁྲིད་པར་མཛད་པའི་མི་ཐམས་ཅད་ནི་དཀོན་མཆོག་གི་བུ་དང་བུ་མོ་ཡིན་པའི་ཕྱིར༌རོ།།
15 ཁྱོད་རྣམས་ལ་སྔར་བཞིན་འཇིགས་སྣང་དུ་འཇུག་པའི་བྲན་གཡོག་གི་སེམས་ཐོབ་པ་མ་ཡིན་པས། ཁྱོད་རྣམས་ལ་དཀོན་མཆོག་གི་བུ་སྐལ་དུ་གྱུར་པའི་སེམས་ཐོབ་ཅིང་དེ་ལ་བརྟེན་ནས། བདག་ཅག་གིས་དཀོན་མཆོག་ལ་ཨབ་བཱ་ལགས། ཡབ་ལགས་ཞེས་འབོད་པའོ།།
16 དམ་པའི་ཐུགས་ཉིད་ཀྱིས་བདག་ཅག་གི་སེམས་དང་མཉམ་འབྲེལ་བྱས་ནས་བདག་ཅག་ནི་དཀོན་མཆོག་གི་བུ་ཕྲུག་ཡིན་པར་བདེན་དཔང་མཛད།
17 ཡང་བུ་ཕྲུག་ཡིན་ན་ཕྱིས་སུ་རྒྱུན་འཛིན་མཁན་ཡང་ཡིན་ཏེ། དཀོན་མཆོག་གི་རྒྱུན་འཛིན་མཁན་ཡིན༌ཞིང་། སྐྱབས་མགོན་མཱ་ཤི་ཀ་དང་མཉམ་དུ་རྒྱུན་འཛིན་མཁན་ཡིན། བདག་ཅག་ལ་ཁོང་དང་མཉམ་དུ་གཟི་བརྗིད་འཐོབ་པར་འགྱུར་ན། བདག་ཅག་གིས་ཁོང་དང་མཉམ་དུ་སྡུག་བསྔལ་མྱང་དགོས་སོ།།
མ་འོངས་པའི་གཟི༌བརྗིད།
18 བདག་གིས་བསམས༌ན། ད་ལྟའི་སྡུག་བསྔལ་འདི་ནི་མ་འོངས་པའི་དུས་སུ་བདག་ཅག་ལ་མངོན་པར་འགྱུར་བའི་གཟི་བརྗིད་དང་བསྡུར་མི་འོས་སོ།།
19 བསྐྲུན་པའི་དངོས་པོ་ཐམས་ཅད་ཀྱིས་དཀོན་མཆོག་གི་བུ་ཕྲུག་རྣམས་མངོན་པར་རེ་བ་ཆེན་པོས་སྒུག་འདུག
20 རྒྱུ་མཚན་ནི་བསྐྲུན་པའི་དངོས་པོ་རྣམས་སྙིང་པོ་མེད་པའི་དབང་དུ་ཚུད་པ་ནི་རང་ཉིད་ཀྱི་འདོད་པ་ལྟར་མ་ཡིན༌པར། དེ་ལྟར་མཛད་མཁན་དཀོན་མཆོག་གི་ཐུགས་དགོངས་བཞིན་ཡིན་པས༌སོ།།
21 འོན༌ཀྱང༌། བསྐྲུན་པའི་དངོས་པོ་དག་གིས་ངན་རུལ་གྱི་དབང་ཤེད་ལས་ཐར་ནས། དཀོན་མཆོག་གི་བུ་ཕྲུག་རྣམས་ཀྱི་ཐར་པའི་གཟི་བརྗིད་ལོངས་སུ་སྤྱོད་ཐུབ་པར་རེ་སྒུག་བྱེད༌དོ།།
22 ད་ལྟའི་བར་དུ་དངོས་པོ་བསྐྲུན་པ་ཐམས་ཅད་ཀྱིས་ལྷན་དུ་དབུགས་རིང་ཕྱུང་ཞིང་དཀའ་སྡུག་མྱངས་པ་བདག་ཅག་གིས་ཤེས་སོ།།
23 དེར་མ༌ཟད། དམ་པའི་ཐུགས་ཉིད་ཀྱི་འབྲས་བུ་ཐོག་མ་ཡོད་པ་བདག་ཅག་གིས་ཀྱང་སེམས་སུ་དབུགས་རིང་འབྱིན༌པ་དང༌། བུ་སྐལ་འཐོབ་པར་རེ་སྒུག་བྱེད་ཅིང་། དེ་ནི་བདག་ཅག་གི་ལུས་པོ་ཐར་བ་ཡིན་ནོ།།
24 ཡང་བདག་ཅག་ནི་རེ་བ་ལ་བརྟེན་ནས་ཐར༌ཞིང་། མིག་གིས་མཐོང་བའི་རེ་བ་ནི་རེ་བ་མིན༌ཏེ། སུ་ཞིག་གིས་མིག་གིས་མཐོང་བ་དེ་ལ་རེ་བ་བྱེད༌དམ།
25 འོན༌ཀྱང༌། བདག་ཅག་གིས་མིག་གིས་མི་མཐོང་བ་དེ་ལ་རེ་བ་བྱེད༌ན། ངང་རྒྱུད་རིང་པོས་སྒུག་པ་ཡིན་ནོ།།
26 དེ་བཞིན༌དུ། དམ་པའི་ཐུགས་ཉིད་ཀྱིས་བདག་ཅག་གི་ཉམས་ཞན་ཡིན་པའི་ཆ་ལ་རོགས་སྐྱོར་གནང༌སྟེ། བདག་ཅག་གིས་ཅི་ལྟར་གསོལ་བ་འདེབས་པ་མི་ཤེས༌ཀྱང་། དམ་པའི་ཐུགས་ཉིད་ཀྱིས་དངོས་སུ་སྨྲ་མི་ནུས་པའི་དབུགས་རིང་ལ་བརྟེན་ནས་བདག་ཅག་གི་ཚབ་ཏུ་གསོལ་བ་འདེབས་པ་ཡིན་ནོ།།
27 དམ་པའི་ཐུགས་ཉིད་ཀྱིས་དཀོན་མཆོག་གི་ཐུགས་དགོངས་བཞིན་དུ་དད་ལྡན་དམ་པ་རྣམས་ཀྱི་ཚབ་ཏུ་གསོལ་བ་བཏབ༌པས། མིའི་སེམས་ལ་རྟོག་དཔྱོད་མཛད་མཁན་གྱིས་དམ་པའི་ཐུགས་ཉིད་ཀྱི་དགོངས་པ་མཁྱེན༌ནོ།།
རྣམ་པར་རྒྱལ་བ་ལས་ལྷག་པ།
28 དཀོན་མཆོག་ལ་གཅེས་པའི་མི་སྟེ་ཁོང་གི་ཐུགས་དགོངས་བཞིན་ཞལ་འབོད་ཐོབ་པའི་མི་རྣམས་ཀྱི་དོན་ཐམས་ཅད་ནི། དཀོན་མཆོག་གིས་ཕན་ཚུན་ལ་ཕན་ཐོགས་པར་མཛད་ཡོད་པ་བདག་ཅག་གིས་ཤེས་སོ།།
29 རྒྱུ་མཚན་ནི་དཀོན་མཆོག་གིས་སྔར་ནས་མཁྱེན་པའི་མི་རྣམས་རང་གི་སྲས་ཀྱི་སྣང་བརྙན༌དང་འདྲ་བར་འགྱུར༌ཆེད་སྔ་མོ་ནས་ཐག་གིས་བཅད་ཅིང༌། སྲས་དེ་ཉིད་སྤུན་ཟླ་མང་པོའི་ཁྲོད་དུ་སྐྱེས་འགོ་རུ་མཛད་པའི་ཕྱིར༌ཡིན།
30 ཡང་སྔ་མོ་ནས་ཐག་གིས་བཅད་པ་རྣམས་ལའང་ཞལ་འབོད་གནང༌ཞིང༌། ཞལ་འབོད་གནང་བ་རྣམས་ཀྱང་རྣམ་པར་དག་པར་བརྩིས་པ༌དང༌། རྣམ་པར་དག་པར་བརྩིས་པ་རྣམས་ཀྱང་གཟི་བརྗིད་དང་ལྡན་པར་མཛད༌དོ།།
31 དེ་འདྲ་ཡིན༌ན། ད་དུང་ཅི་ཞིག་སྨྲ་བར༌བྱའམ། དཀོན་མཆོག་ནི་བདག་ཅག་གི་ཕྱོགས་ཡིན༌ན། སུ་ཞིག་གིས་བདག་ཅག་ལ་རྒོལ་ནུས༌སམ།
32 དཀོན་མཆོག་གིས་རང་ཉིད་ཀྱི་སྲས་ལ་མ་ཕངས་པར་བདག་ཅག་ཐམས་ཅད་ཀྱི་ཆེད་དུ་བློས་བཏང་བས་ན། དངོས་པོ་ཐམས་ཅད་དང་སྲས་ཁོང་ཉིད་དང་བཅས་པ་བདག་ཅག་ལ་ཕངས་མེད་དུ་གནང་བར་འགྱུར་བ་མ་ཡིན༌ནམ།
33 སུ་ཞིག་གིས་དཀོན་མཆོག་གི་བདམས་པ་རྣམས་ཁྲིམས་ལ་སྦྱོར་ནུས༌སམ། དཀོན་མཆོག་ནི་མི་རྣམ་དག་ཏུ་བརྩི་མཁན་ཡིན་ནོ།།
34 མཱ་ཤི་ཀ་ཡེ་ཤུ་སྐུ་གྲོངས་པར་མ་ཟད། སླར་ཡང་གསོན༌ཞིང༌ད་ལྟ་དཀོན་མཆོག་གི་གཡས་ཕྱོགས་སུ་བཞུགས༌ཏེ། བདག་ཅག་གི་དོན་དུ་གསོལ་བ་འདེབས་བཞིན་ཡོད༌པས། སུ་ཞིག་གིས་བདག་ཅག་ལ་ཉེས་ཆད་གཅོད་ནུས༌སམ།
35 ཡང་སུ་ཞིག་གིས་བདག་ཅག་སྐྱབས་མགོན་མཱ་ཤི་ཀའི་བྱམས་པ་དང་ཕྲལ་ནུས༌སམ། དེ་ནི་དཀའ་སྡུག་ཡིན༌ནམ། ཡང་ན་སེམས་ཁྲལ་ཡིན༌ནམ། ཡང་ན་བཙན་གནོན་ཡིན༌ནམ། ཡང་ན་བཀྲེས་ལྟོགས་ཡིན༌ནམ། ཡང་ན་གོས་མེད་གཅེར་བུ་ཡིན༌ནམ། ཡང་ན་ཉེན་ཁ་ཡིན༌ནམ། ཡང་ན་རལ་གྲི་ཡིན་ནམ།
36 དེ་ལ་གསུང་རབ་ཀྱི་མདོ་ལས་ཇི་སྐད༌དུ།
ཁྱེད་ཀྱི་རྐྱེན་གྱིས་ངེད་རྣམས་ཉིན་རྒྱུན་གསོད༎
གཞན་གྱིས་ངེད་རྣམས་བཤས་ལུག་ལྟ་བུར་བརྩིས།།
ཞེས་བཀོད་པ་བཞིན༌ནོ།།
37 འོན༌ཀྱང༌། བདག་ཅག་གཅེས་སུ་འཛིན་མཁན་ཁོང་ཉིད་ལ་བརྟེན་ནས། དོན་འདི་ཐམས་ཅད་ཀྱི་སྟེང་ནས་བདག་ཅག་རྣམ་པར་རྒྱལ༌བ་ལས་ཀྱང་ལྷག་པ་ཡིན་ནོ།།
38 ཅིའི་ཕྱིར་ཞེ་ན། བདག་ལ་ཡིད་ཆེས་བརྟན་པོ་ཡོད་པ༌ནི། འཆི་བ༌དང༌། གསོན༌པ། ནམ་མཁའི་ཕོ༌ཉ། དབང་འཛིན༌མཁན། ད་ལྟའི༌དོན་རྣམས། མ་འོངས་པའི༌དོན་དག མཐུ་སྟོབས༌ཅན།
39 མཐོ་སར་གནས༌པ། དམའ་སར་གནས༌པ། བསྐྲུན་པའི་དངོས་པོ་གཞན་གང་གིས༌ཀྱང༌། བདག་ཅག་དཀོན་མཆོག་གི་བྱམས་པ་དང་ཕྲལ་མི་ནུས༌ཏེ། བྱམས་པ་འདི་ནི་བདག་ཅག་གི་གཙོ་བོ་མཱ་ཤི་ཀ་ཡེ་ཤུའི་ནང་དུ་གནས་པས་སོ།།