ལེའུ་དགུ༌པ།
དཀོན་མཆོག་ལ་ཐག་གིས་གཅོད་པའི་དབང་ཐམས་ཅད་མངའ་བ།
1 བདག་གིས་སྐྱབས་མགོན་མཱ་ཤི་ཀའི་ནང་དུ་བདེན་གཏམ་བརྗོད་པ་ལས་རྫུན་མི་སྨྲ༌ཞིང༌། བདག་གི་སེམས་ཀྱིས་དམ་པའི་ཐུགས་ཉིད་ལ་བརྟེན་ནས་བདག་ལ་བདེན་དཔང་བྱེད་པ་ཡིན་ཏེ།
2 བདག་གི་སེམས་སུ་སྡུག་བསྔལ་ཆེ་ཞིང་རྟག་ཏུ༌སྐྱོའོ།།
3 བདག་དང་རིགས་རྒྱུད་གཅིག་པའི་སྤུན་ཟླའི་དོན༌དུ། རང་ཉིད་ལ་དམོད་པ་ཐེབས་ཞིང་སྐྱབས་མགོན་མཱ་ཤི་ཀ་དང་བྲལ་ནའང་བདག་ལ་འགྱོད་པ་མེད༌དེ།
4 མི་དེ་རྣམས་ནི་ཡེས་ར་ཨེལ་གྱི་མི་རིགས་ཡིན༌ཞིང༌། བུ་སྐལ་གྱི་མིང་དང་། གཟི༌བརྗིད། ཞལ༌ཆད་རྣམས། བཀའ༌ཁྲིམས་གཏན་ལ་འབེབས་པ། གུས་སྲོལ། ཞལ་བཞེས་ཐམས་ཅད་དེ་དག་གི་ཡིན༌ལ།
5 མེས་པོ་རྣམས་ཀྱང་དེ་དག་གི་མེས་པོ་ཡིན། ལུས་ཕུང་གི་ཆ་ནས་སྨྲས༌ནའང༌། སྐྱབས་མགོན་མཱ་ཤི་ཀ་ཡང་དེ་རྣམས་ལས་བྱུང༌ཞིང༌། ཁོང་ནི་ཀུན་ལས་བླ་ན་འཕགས་པ་དང་དུས་རྟག་ཏུ་བསྔགས་པར་འོས་པའི་དཀོན་མཆོག་ལགས༌སོ། །ཨ༌མེན།
6 དེ་ལྟར་སྨྲས་པ་ནི་དཀོན་མཆོག་གི་བཀའ་སྟོང་བར་གྱུར་པ་མ་ཡིན་ནོ།། རྒྱུ་མཚན་ནི་ཡེས་ར་ཨེལ་ནས་སྐྱེས་པ་ཐམས་ཅད་ཡེས་ར་ཨེལ་གྱི་མི་ཡིན་པའི་ངེས་པ་མེད༌ལ།
7 ཨབ་ར་ཧམ་གྱི་རིགས་རྒྱུད་ཡིན་པ་ཐམས་ཅད་ཀྱང་ཁོང་གི་བུ་ཕྲུག་ཡིན་པར་མ་ངེས་པའི་ཕྱིར༌རོ། །དེ་ལ་ཇི་སྐད༌དུ། ཨི་སཱག་བརྒྱུད་ནས་ཁྱོད་ཀྱི་རིགས་རྒྱུད་ཀྱི་མིང་ཐོན་པར་འགྱུར་ཞེས་གསུངས་སོ།།
8 དེ་ནི་ལུས་ཕུང་ལས་སྐྱེས་པའི་བུ་དང་བུ་མོ་རྣམས་དཀོན་མཆོག་གི་བུ་ཕྲུག་མ་ཡིན༌ཞིང༌། ཞལ་བཞེས་ཐོབ་པ་རྣམས་ནི་ད་གཟོད་རིགས་རྒྱུད་དུ་བརྩིས༌པ་ཡིན།
9 ཅིའི་ཕྱིར་ཞེ་ན། ཞལ་བཞེས་གནང་བའི་བཀའ་ནི་འདི་ལྟ༌སྟེ། སང་ལོའི་དུས་འདི༌ལ་ང་རང་ཡོང་ངེས༌ཤིང༌། སཱ་ར་ལ་བུ་ཞིག་སྐྱེ་བར་འགྱུར་ཞེས་གསུངས་པའི་ཕྱིར༌རོ།།
10 གཞན༌ཡང༌། རིབ་ཀཱ་ནི་བདག་ཅག་གི་མེས་པོ་ཨི་སཱག་གཅིག་པུ་ལས་མངལ་ཆགས༌ཏེ།
11 སྐབས་དེར་བུ་མཚེ་མ་སྐྱེས་མེད་ཅིང་ལས་བཟང་ངན་གང་ཡང་མ་བྱས་པའི་སྔོན་ལ། དཀོན་མཆོག་གིས་བདམས་པར་མཛད་པའི་ཐུགས་དགོངས་མངོན་ཞིང་བརྟན་པོར་གནས་པའི༌ཕྱིར། མིའི་བྱ་སྤྱོད་ལ་འབྲེལ་བ་མེད་ཅིང་མི་ལ་ཞལ་འབོད་གནང་མཁན་དཀོན་མཆོག་ལ་རག་ལས༌པ་ཡིན་ལ།
12 དཀོན་མཆོག་གིས་རིབ་ཀཱ་ལ་འདི་སྐད༌དུ། མ་འོངས་པར་བུ་ཆེ་བས་བུ་ཆུང་བ་ལ་ཞབས་ཕྱི་བྱེད་པར་འགྱུར་ཞེས་གསུངས་སོ།།
13 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཡ་ཀོབ་ནི་བདག་གིས་གཅེས་སུ་འཛིན་པ༌དང༌། ཨེ་སཱབ་ནི་བདག་གིས་འཁོན་དུ་འཛིན་པ་ཡིན་ཞེས་བཀོད་ཡོད་པ་བཞིན༌ནོ།།
14 དེས་ན་ངེད་ཅག་གིས་ཅི་ཞིག་སྨྲའམ། དཀོན་མཆོག་ལ་དྲང་བདེན་མ་ཡིན་པ་ཡོད་དམ་ཞེ༌ན། གཏན་ནས་མེད་དོ།།
15 ཅིའི་ཕྱིར་ཞེ་ན། དཀོན་མཆོག་གིས་མོ་ཤེ་ལ་འདི་སྐད༌དུ། ངས་སུ་ཞིག་ལ་སྙིང་རྗེ་བར་འདོད་ན་དེ་ལ་སྙིང་རྗེ་བར༌བྱའོ།། ཡང་སུ་ཞིག་ལ་བརྩེ་བར་བསམ་ན་དེ་ལ་བརྩེ་བར་བྱའོ་ཞེས་གསུངས་པས༌སོ།།
16 དེའི༌ཕྱིར། དོན་དེ་ནི་ཐུགས་རྗེ་གནང་མཁན་དཀོན་མཆོག་ལ་རག་ལས་པ༌ལས། མིའི་འདོད་པའམ་རྩོལ་བ་ལ་རག་མི་ལས་པ་ཡིན།
17 རྒྱུ་མཚན་ནི་གསུང་རབ་ཀྱི་མདོ༌ལས། ཕཱར་ཨོལ་ལ་འདི་སྐད༌དུ། ཁྱོད་ཀྱི་སྟེང་ནས་བདག་གི་མཐུ་སྟོབས་མངོན་པར་བྱེད༌ཅིང༌། བདག་གི་མིང་ནི་གནམ་འོག་ཀུན་ཏུ་བསྒྲག་པའི་ཕྱིར་བདག་གིས་ཁྱོད་དར་བར་བྱས༌པ་ཡིན་ཞེས་གསུངས་པའི་ཕྱིར༌རོ།།
18 དེ་བས༌ན། དཀོན་མཆོག་གིས་སུ་ཞིག་ལ་ཐུགས་རྗེ་གནང་བར་དགོངས་ན་དེ་ལ་ཐུགས་རྗེ་གནང་བ༌དང༌། སུ་ཞིག་གི་སེམས་རྒྱུད་གྱོང་པོར་མཛད་པར་དགོངས༌ན་དེའི་སེམས་རྒྱུད་གྱོང་པོར་མཛད༌པའོ།།
19 དེ་ལྟར༌ཡིན་ན། དཀོན་མཆོག་གིས་ཅིའི་ཕྱིར་ད་དུང་མི་ལ་སྐྱོན་བརྗོད་གནང་བ་ཡིན༌ནམ། སུ་ཞིག་གིས་ཁོང་གི་ཐུགས་དགོངས་ལ་རྒོལ་ནུས་སམ་ཞེས་ཁྱོད་ཀྱིས་བདག་ལ་སྨྲ་ངེས་པ་ཡིན་ནོ།།
20 འོན་ཀྱང་། ཁྱོད་ནི་མི་སུ་ཞིག་ཡིན༌འདོད་དམ། ཁྱོད་ཀྱིས་དཀོན་མཆོག་ལ་ཚིག་ལོག་བརྗོད་ནུས༌སམ། དཔེར་ན། བསྐྲུན་པའི་དངོས་པོ་དེས་སྐྲུན་མཁན༌ལ། ཁྱེད་ཀྱིས་ཅིའི་ཕྱིར་ང་རང་འདི་ལྟར་བཟོས་སམ་ཞེས༌སྨྲའམ།
21 ཡང་ན་རྫ་ཆས་བཟོ་མཁན་གྱིས་འདམ་ཉུང་ཙམ་བླངས་ནས་སྣོད་ཆས་བཟོས་ཏེ་མཆོག་དམན་གང་ཞིག་ཏུ་བཀོལ་བའི་དབང་ཆ་ཁོ་ལ་མེད༌དམ།
22 འོན་ཀྱང་། དཀོན་མཆོག་གིས་རང་ཉིད་ཀྱི་ཐུགས་ཁྲོ་དང་ནུས་མཐུ་མངོན་པར་དགོངས༌ན། ཐུགས་ཁྲོ་བར་རུང་ཞིང་འཇིག་པར་འགྱུར་བར་སྟ་གོན་མཛད་པའི་སྣོད་ཆས་དག་ལ་ངང་རྒྱུད་རིང་པོས་བཟོད་སྒོམ་ཆེན་པོ་གནང་བ༌དང༌།
23 ཡང་ཁོང་གིས་ཕུན་སུམ་ཚོགས་པའི་གཟི་བརྗིད་དེ་ནི་ཐུགས་རྗེ་འཐོབ་པར་འགྱུར་བའི་སྣོད་ཆས་དག་གི་སྟེང་དུ་མངོན་པའི་ཕྱིར་དེ་ལྟར་མཛད༌ཅིང༌། ཁོང་གིས་སྔ་མོ་ནས་དེ་དག་གཟི་བརྗིད་ལྡན་པར་འགྱུར་བའི་ཕྱིར་སྟ་གོན་མཛད༌པ་ཡིན་ཏེ།
24 སྣོད་ཆས་དེ་ནི་དཀོན་མཆོག་གིས་ཡ་ཧུ་དཱ་པ་ཙམ་མ༌ཟད། ཕྱི་ཕྱོགས་ཀྱི་མི་རིགས་དག་ལས་བདག་ཅག་ལ་ཞལ་འབོད་གནང་བ་ཡིན༌པས། དེ་ལ་མི་རུང་བ་ཅི་ཡོད་དམ་ཞེ༌ན།
25 དཀོན་མཆོག་གིས་ཧོ་ཤེ་ཨ་ཡི་མདོ་ལས་འདི་སྐད༌དུ།
གཞི་ནས་བདག་གི་མི་སྡེ་མིན༌པ་རྣམས།།
བདག་གི་མི་སྡེ་ཡིན་ཞེས་བདག་གིས༌སྒྲོག །
གཞི་ནས་བརྩེ་བ་མེད་པའི་ཁོ་མོ༌ལ།།
བདག་གིས་བརྩེ་བས་སྐྱོང་ཞེས་བདག་ནི༌སྨྲ།།
26 ཁྱོད་རྣམས་བདག་གི་མི་སྡེ་མ་ཡིན༌ཞེས།།
སྔོན་ཆད་ཡུལ་སྡེ་གང་ནས་སྨྲས་གྱུར་ན།།
རྟག་བརྟན་དཀོན་མཆོག་ཁོང་གི་བུ་ཡིན༌ཞེས།།
མ་འོངས་པར་ཡང་ཡུལ་དེར་དེ་ལྟར༌སྨྲ།།
ཞེས༌པའོ།།
27 དེ་ཡང་ཡེ་ཤ་ཡཱ་ཡིས་ཡེས་ར་ཨེལ་གྱི་མི་རྣམས་ལ་སྐད་ཆེན་པོས་འདི་སྐད༌དུ། ཡེས་ར་ཨེལ་གྱི་བུ་རྒྱུད་ནི་མཚོ་འགྲམ་གྱི་བྱེ་མ་ལྟར་མང༌ནའང༌། དེ་རྣམས་ལས་ཐར་པ་ཐོབ་མཁན་ནི་ལྷག་འཕྲོ་ཙམ༌ཡིན།
28 ཅིའི་ཕྱིར་ཞེ་ན། གཙོ་བོས་འཇིག་རྟེན་སྟེང་དུ་རང་ཉིད་ཀྱི་བཀའ་ཡོངས་སུ་རྫོགས་ཤིང་མྱུར་བ་མྱུར་དུ་ལག་བསྟར་མཛད༌ངེས་ཡིན་ཞེས་གསུངས་པའི་ཕྱིར༌རོ།།
29 དེ་ལ་ཡང་ཡེ་ཤ་ཡཱ་ཡིས་དེ་སྔར་འདི་སྐད༌དུ།
དཔུང་ཚོགས་ཀུན་གྱི་གཙོ་བོས་བདག་ཅག༌ལ།།
རྒྱུད་ཀྱི་ས་བོན་བསྐྱུར་བ་མ་ཡིན༌ན།།
སཱ་དོམ་དང་ནི་གཱ་མོ་ར་ཇི་བཞིན།།
བདག་ཅག་ཀྱང་ནི་དེ་བཞིན་གྱུར་པ༌ཡིན།།
ཞེས་གསུངས༌པའོ།།
ཡེས་ར་ཨེལ་མི་རིགས་ཀྱི་དད༌པ།
30 དེས་ན་ངེད་ཅག་གིས་ཅི་ཞིག་སྨྲའམ། གཏན་ནས་རྣམ་དག་ལ་བརྩོན་པར་མི་བྱེད་པའི་ཕྱི་ཕྱོགས་པ་རྣམས་ལ་དད་པ་ལས་བྱུང་བའི་རྣམ་དག་ཐོབ༌ཀྱང༌།
31 ཡེས་ར་ཨེལ་གྱི་མི་རིགས་ཀྱིས་བཀའ་ཁྲིམས་ཀྱི་རྣམ་དག་དེ་ཉིད་བརྩོན་ལེན་བྱས་ནའང་རྣམ་དག་དེ་ཉིད་མ་ཐོབ་བོ།།
32 རྒྱུ་མཚན་ཅི་ཞེ༌ན། དེ་དག་གིས་དད་པ་ལ་བརྟེན་ནས་བརྩོན་ལེན་མི་བྱེད༌པར། མིའི་ལས་ཁོ་ནར་བརྟེན་ནས་བརྩོན་ལེན་བྱེད་པ་ཡིན༌པས། མི་དེ་རྣམས་ཀྱི་རྐང་པ་ནི་འདྲེད་པའི་རྡོ་དེར་ཐོགས༌པ་ཡིན་ནོ།།
33 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ལྟོས་དང་།
བདག་གིས་ཛ་ཡན་ཡུལ་དུ་རྡོ་ཞིག༌བཞག །
དེ་ནི་རྐང་པ་འདྲེད་པའི་རྡོ་ཞིག༌དང༌།།
ས་ལ་སྒྱེལ་བའི་ཕ་བོང་ཡང་ཡིན་ཏེ།།
ཁོང་ལ་བརྟེན་ཅིང་དད་པ་བྱེད་མཁན༌ཀུན།།
ཁ་ནི་མི་སྐྱེངས་ངོ་ཡང་མི་གནོང༌ངོ༌།།
ཞེས་བཀོད་པ་བཞིན༌ནོ།།