ལེའུ་བདུན༌པ།
ཁྱོ་ཤུག་གི༌དཔེ།
1 སྤུན་ཟླ༌རྣམས། བདག་གིས་ད་ལྟ་བཀའ་ཁྲིམས་ཀྱི་དོན་རྟོགས་མཁན་རྣམས་ལ་སྨྲ་བར་བྱ༌སྟེ། བཀའ་ཁྲིམས་ཀྱིས་མི་གསོན་པའི་དུས་སུ་བདག་སྐྱོང་མཛད་པ་ནི་ཁྱོད་ཅག་གིས་མི་ཤེས༌སམ།
2 དཔེར༌ན། བུད་མེད་ཅིག་ལ་ཁྱོ་ག་ཡོད་པ་དང་ཁྱོ་ག་གསོན་པའི་དུས༌སུ། ཁོ་མོ་ནི་བཀའ་ཁྲིམས་ཀྱིས་གཅུན་པ་དང༌། གལ་ཏེ་ཁྱོ་ག་ཚེ་ལས་འདས༌ན། བུད་མེད་དེ་ནི་ཁྱོ་གའི་སྐོར་གྱི་བཀའ་ཁྲིམས་དང་ཁ་བྲལ་བ་དང་འདྲའོ།།
3 དེའི༌ཕྱིར། ཁྱོ་ག་གསོན་པའི་དུས་སུ་ཁོ་མོ་སྐྱེས་པ་གཞན་དང་འགྲོགས༌ན། བུད་མེད་དེ་ལ་གཡེམ་མ་ཟེར། གལ༌ཏེ་ཁྱོ་ག་ཚེ་ལས་འདས་ན་ཁོ་མོ་ནི་ཁྱོ་གའི་སྐོར་གྱི་བཀའ་ཁྲིམས་དང་ཁ་བྲལ་བས་སྐྱེས་པ་གཞན་དང་འགྲོགས༌ནའང༌། བུད་མེད་དེ་ལ་གཡེམ་མ་མི་ཟེར༌རོ།།
4 དེའི་ཕྱིར། བདག་གི་སྤུན་ཟླ༌རྣམས། དེ་ལྟར་སྨྲས༌ན། སྐྱབས་མགོན་མཱ་ཤི་ཀའི་སྐུ་ལུས་ལ་བརྟེན་ནས་ཁྱོད་རྣམས་ཀྱང་བཀའ་ཁྲིམས་ཀྱི་ཆ་ནས་ཤི༌བ་ཡིན་ནོ།། དེ་ནི་ཁྱོད་རྣམས་གཞན་ལ་གཏོགས་པ་དང་། ངེད་ཅག་ལ་འབྲས་བུ་བྱུང་ནས་དཀོན་མཆོག་ལ་འབུལ་བའི༌ཕྱིར། སྐུ་གྲོངས་པ་ནས་སླར་གསོན་པ་དེ་ཉིད་ལ་གཏོགས་སོ།།
5 ཅིའི་ཕྱིར་ཞེ་ན། བདག་ཅག་ནི་ཤ་གཟུགས་ཀྱི་ཕུང་བོར་གཏོགས་པའི་དུས༌སུ། བཀའ་ཁྲིམས་ཀྱི་རྒྱུ་རྐྱེན་ལས་བྱུང་བའི་འདོད་ངན་གྱིས་བདག་ཅག་གི་ཡན་ལག་ལ་སྐུལ་སློང་བྱས་ཏེ་འཆི་བའི་འབྲས་བུ་བསྐྱེད༌པའི་ཕྱིར་ཡིན།
6 འོན༌ཀྱང༌། བདག་ཅག་འཆིང་བར་བྱེད་པའི་བཀའ་ཁྲིམས་སྟེང་ནས་ཤི་བར་གྱུར༌ཏེ། ད་ལྟ་བཀའ་ཁྲིམས་ལས་གྲོལ་བ་ཡིན༌པས། བདག་ཅག་གིས་དམ་པའི་ཐུགས་ཉིད་ཀྱི་སྲོལ་གསར་པ་ལྟར་ཞབས་ཕྱི་བསྒྲུབ་པ༌ལས། ཁྲིམས་ཡིག་གི་སྲོལ་རྙིང་པ་ལྟར་ཞབས་ཕྱི་བསྒྲུབ་པར་མི༌བྱའོ།།
སྡིག་པར་འཐབ་པ།
7 དེས་ན་ངེད་ཅག་གིས་ཅི་ཞིག༌སྨྲའམ། བཀའ་ཁྲིམས་ནི་སྡིག་པ་ཡིན་ནམ་ཞེ༌ན། གཏན་ནས་མིན༌ནོ།། འོན་ཀྱང་བཀའ་ཁྲིམས་མེད་ན་ངས་སྡིག་པ་ནི་ཅི་ཞིག་ཡིན་པ་མི་ཤེས། བཀའ་ཁྲིམས་ལས་ཇི་སྐད༌དུ། འདོད་ཧམ་བཅང་མི་རུང་ཞེས་གསུངས་པ་མིན༌ན། བདག་གིས་འདོད་ཧམ་ནི་ཅི་ཞིག་ཡིན་པ་མི་ཤེས་སོ།།
8 འོན༌ཀྱང༌། སྡིག་པས་གོ་སྐབས་དང་བསྟུན་ཞིང་བཀའ་དེ་ལ་བརྟེན༌ནས། བདག་གི་སེམས་ནང་དུ་འདོད་ཧམ་སྣ་ཚོགས་སྐྱེ་བར་སྐུལ་སློང་བྱས་པ་ཡིན། ཅིའི་ཕྱིར་ཞེ་ན། བཀའ་ཁྲིམས་མེད་ན་སྡིག་པ་ནི་ཤི༌བ་ཡིན་པའི་ཕྱིར་རོ།།
9 སྔོན་ཆད་བཀའ་ཁྲིམས་མེད་པའི་དུས་སུ་བདག་ནི་གསོན་པོར་འཚོ༌ཡང༌། བཀའ་དེ་ཉིད་བྱུང་བ་དང་སྡིག་པ་ནི་གསོན་པར་གྱུར་པ་དང་། བདག་ནི་ཤི༌བར་གྱུར།
10 མ་གཞི་མི་གསོན་དུ་འཇུག་པའི་བཀའ་དེ་ཡིས་བདག་ནི་འཆི་བར་མཛད་དོ།།
11 རྒྱུ་མཚན་ནི་སྡིག་པས་གོ་སྐབས་དང་བསྟུན་ཞིང་བཀའ་དེ་ལ་བརྟེན་ནས་ང་རང་བསླུས་ཏེ་བསད༌པ་ཡིན།
12 དེ་ལྟར་བལྟས༌ན། བཀའ་ཁྲིམས་ནི་དམ་པ་ཡིན༌ལ། བཀའ་དེ་ཡང་དམ་པ༌དང༌བདེན༌དྲང༌། ལེགས་པོ་བཅས་ཡིན༌ནོ།།
13 དེ་འདྲ་ཡིན༌ན། ལེགས་པོ་ཡིན་པ་དེ་ཉིད་ནི་ང་རང་འཆི་བའི་རྒྱུ་རྐྱེན་ཡིན་ནམ་ཞེ༌ན། གཏན་ནས་མིན༌ཏེ། ང་རང་འཆི་བར་བྱེད་པའི་རྒྱུ་རྐྱེན་ནི་སྡིག་པ་ཡིན་ནོ།། འོན༌ཀྱང༌། སྡིག་པས་ལེགས་པོ་ཡིན་པ་དེ་ཉིད་བརྒྱུད་ནས་ང་རང་འཆི་བར་བྱས༌པས། དེ་ནི་སྡིག་པ་ཡིན་པ་དངོས་སུ་བསྟན༌ཞིང༌། བཀའ་དེ་ཡིས་སྔར་ལས་ཀྱང་སྡིག་པ་ནི་ཤིན་ཏུ་ངན་པ་ཡིན་པར་མཚོན༌པའོ།།
14 བདག་ཅག་གིས་བཀའ་ཁྲིམས་ནི་ཐུགས་ཉིད་ལ་གཏོགས་པ་ཤེས༌ནའང༌། བདག་ནི་ཤ་གཟུགས་ཀྱི་ཕུང་བོར་གཏོགས་ཤིང་སྡིག་པའི་བྲན་གཡོག་ཏུ་བཙོངས་པ་ཡིན་ནོ།།
15 རྒྱུ་མཚན་ནི་ངས་ཅི་བྱེད་པ་རང་གིས་ཀྱང་མི་ཤེས༌ཏེ། ངས་རང་གིས་བྱེད་འདོད་པའི་ལས་དེ་མི་བྱེད༌པར། རང་ཉིད་སྡང་བའི་ལས་དེ་བྱེད་དོ།།
16 གལ༌ཏེ། ངས་བྱས་པའི་ལས་དེ་ནི་རང་གིས་བྱེད་མི་འདོད་པ་ཡིན༌ན། ངས་བཀའ་ཁྲིམས་ནི་ལེགས་པོ་ཡིན་པ་ཁས་བླངས༌པ་ཡིན།
17 དེ་བས། དེ་ལྟར་བྱེད་མཁན་ནི་ང་རང་མིན༌ཏེ། ངའི་སེམས་ནང་དུ་གནས་པའི་སྡིག་པས་བྱས་པ་ཡིན་ནོ།།
18 ངས་དོན་བཟང་བསྒྲུབ་པའི་སེམས་ཐག་གཅོད་ནུས་ཀྱང་དེ་ལྟར་བསྒྲུབ་མི་ཐུབ༌པས། ངའི་ཤ་གཟུགས་ཀྱི་ཕུང་བོའི་ནང་དུ་ལེགས་པོ་ཅི་ཡང་མེད་པ་བདག་གིས་ཤེས་སོ།།
19 དེའི༌ཕྱིར། ངས་རང་གིས་བསྒྲུབ་འདོད་པའི་དོན་བཟང་མི་བསྒྲུབ༌པར། བསྒྲུབ་མི་འདོད་པའི་དོན་ངན་བསྒྲུབ་པར་བྱེད།
20 གལ༌ཏེ། ངས་རང་གིས་བསྒྲུབ་མི་འདོད་པའི་ལས་ཤིག་བསྒྲུབས༌ན། ལས་དེ་ནི་བདག་གིས་བྱས་པ་མ་ཡིན༌པར། ངའི་སེམས་ནང་དུ་གནས་པའི་སྡིག་པས་བྱས་པ་ཡིན༌ནོ།།
21 དེའི༌ཕྱིར། ངས་ཆོས་ཉིད་ཅིག་ཡོད་པ་ཤེས༌ཏེ། ངས་དོན་བཟང་བསྒྲུབ་འདོད་པའི་དུས༌སུ། ངན་པའང་བདག་དང་མཉམ་དུ་གནས་སོ།།
22 ངའི་ནང་གི་བསམ་པ་ལྟར༌ན། བདག་ནི་དཀོན་མཆོག་གི་ཆོས་ཉིད་ལ༌དགའ་བ་ཡིན།
23 འོན༌ཀྱང༌། བདག་གི་ཡན་ལག་ཁྲོད་དུ་ཆོས་ཉིད་གཞན་ཞིག་ཡོད༌དེ། ངའི་སེམས་ནང་གི་ཆོས་ཉིད་དང་འཐབ་སྟེ། ང་ནི་ཡན་ལག་ནང་གི་སྡིག་པའི་ཆོས་ཉིད་ཀྱི་དབང་དུ་གྱུར་པ་དང་། དེས་ང་རང་བཙན་བཟུང་བྱས་པ་བདག་གིས་ཤེས་སོ།།
24 བདག་ནི་ཇི་འདྲའི་ཐ་ཤལ་བ་ཞིག་རེད་ཨང་། སུ་ཞིག་གིས་ང་རང་འཆི་བར་འགྱུར་བའི་ལུས་པོ་འདི་ལས་སྐྱོབ་པར་བྱེད༌དམ་ཞེ་ན།
25 བདག་ཅག་གི་གཙོ་བོ་ཡེ་ཤུ་མཱ་ཤི་ཀར་བརྟེན་ནས་དཀོན་མཆོག་ལ་ཐུགས་རྗེ༌ཆེ་ཞུའོ།། མདོར་ན། བདག་གི་སེམས་སུ་དཀོན་མཆོག་གི་ཆོས་ཉིད་ལ་བསྟུན་ན་ཡང༌། བདག་གི་ཤ་གཟུགས་ཀྱི་ཕུང་བོས་སྡིག་པའི་ཆོས་ཉིད་ལ་བསྟུན་པའོ།།