ལེའུ་བཅོ་ལྔ༌པ།
རང་ཉིད་དགའ་བར་བྱེད་མི་འོས་པའི༌སྐོར།
1 དེ་ཡང་བདག་ཅག་བརྟན་པོ་རྣམས་ཀྱིས་བརྟན་པོ་མིན་པ་རྣམས་ཀྱི་ཉམས་ཞན་ལ་བཟོད་བསྲན་བྱེད་འོས་པ༌ལས། རང་ཉིད་དགའ་བར་མི༌བྱའོ།།
2 བདག་ཅག་མི་རེ་རེས་རང་གི་ཁྱིམ་མཚེས་ལ་ཕན་འདོགས་པ་དང་ཡར་སྐྱེད་ཡོང་བའི༌ཕྱིར། ཁྱིམ་མཚེས་དགའ་བར་གྱིས༌ཤིག
3 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀས་ཀྱང་རང་ཉིད་དགའ་བར་མ་མཛད་པའི་ཕྱིར༌རོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱོད་ལ་དམའ་འབེབས་བྱེད་མཁན་གྱི་སྨྲ་བརྗོད་མཐའ་དག་ནི་བདག་ལ་ཕོག་པ་ཡིན་ཞེས་བཀོད་པ༌བཞིན་ནོ།།
4 རྒྱུ་མཚན་ནི་སྔོན་ཆད་ཡི་གེར་བཀོད་པ་ཐམས་ཅད་བདག་ཅག་ལ་བསླབ་བྱ་གནང་བའི་ཕྱིར་ཡིན༌ཏེ། བཟོད་པ་དང་གསུང་རབ་ལས་བྱུང་བའི་སེམས་གསོ་བརྒྱུད་ནས་བདག་ཅག་ལ་རེ་བ་ཐོབ་པའི་ཕྱིར༌རོ།།
5 དེ་ཡང་བཟོད་པ་དང་སེམས་གསོ་གནང་མཁན་དཀོན་མཆོག་གིས་མཱ་ཤི་ཀ་ཡེ་ཤུ་བཞིན་དུ་ཁྱོད་རྣམས་ཕན་ཚུན་མཐུན་པར་མཛད་པར༌སྨོན།
6 དེ་ནི་ཁྱོད་ཅག་གིས་ཁ་ཞེ་གཉིས་མེད་སྒོས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་བསྔགས་བརྗོད་པའི་ཕྱིར༌རོ།།
7 དེའི༌ཕྱིར། སྐྱབས་མགོན་མཱ་ཤི་ཀས་ཁྱོད་རྣམས་བསུས་པ༌བཞིན། ཁྱོད་ཅག་གིས་ཀྱང་ཕན་ཚུན་བསུས་ནས་དཀོན་མཆོག་གི་གཟི་བརྗིད་མངོན་པར༌བྱའོ།།
8 བདག་གིས་སྨྲ་བར་བྱ༌སྟེ། སྐྱབས་མགོན་མཱ་ཤི་ཀ་ནི་དཀོན་མཆོག་གི་བདེན་པ་ཉིད་ཀྱི༌ཆེད་དུ། མཚན་སྐྱི་བཅད་པ་རྣམས་ལ་ཞབས་ཕྱི་སྒྲུབ་མཁན་དུ་གྱུར་ཅིང་། དེ་ནི་ཕ་མེས་ཡང་མེས་རྣམས་ལ་གནང་བའི་ཞལ་བཞེས་ཀྱི་བཀའ་རྣམས་ལ་བདེན་དཔང་མཛད༌པའི་ཕྱིར་དང་།
9 ཕྱི་ཕྱོགས་པ་རྣམས་ཀྱིས་དཀོན་མཆོག་གི་ཐུགས་རྗེའི་རྐྱེན་གྱིས་ཁོང་ལ་བསྟོད་བསྔགས་བརྗོད་པའི་ཕྱིར་ཡང་ཡིན་ནོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ།
དེ་ཡི་ཕྱིར་ན་བདག་གིས༌ནི།།
ཕྱི་ཕྱོགས་པ་ཡི་ནང་ཁུལ༌དུ།།
ཁྱོད་ལ་བསྔགས་བརྗོད་བྱེད་པ་དང་།།
ཁྱོད་མཚན་བསྟོད་དབྱངས་འབུལ་བར་བྱ།།
10 ཡང་ཇི་སྐད༌དུ།
ཁྱོད་ཅག་ཕྱི་ཕྱོགས་མི་རྣམས༌ནི།།
གཙོ་བོ་དཀོན་མཆོག༌ཁོང་ཉིད་ཀྱི།།
འབངས་མི་རྣམས་དང་ལྷན་ཅིག༌ཏུ།།
དགའ་ཞིང་སྤྲོ་བར་གྱུར་ཅིག༌གུ།།
11 ཡང་ཇི་སྐད༌དུ།
ཕྱི་མི་ཚང་མས་གཙོ་བོ༌ལ།།
བསྟོད་ཅིང་བསྔགས་པར་འོས་སོ༌ལོ།།
མི་རིགས་ཀུན་གྱིས་གཙོ་བོ༌ལ།།
བསྟོད་ཅིང་བསྔགས་པར་འོས་སོ༌ལོ།།
12 ཡང་ཡེ་ཤ་ཡཱ་ཡིས་འདི་སྐད༌དུ།
མ་འོངས་པ་ན་ཡེ་སེ༌ཡི།།
རྩ་བ་དེ་ཡིས་ཕྱི་ཕྱོགས༌པར།།
དབང་སྒྱུར་བྱེད་ཅིང་དེ་རྣམས༌ཀྱིས།།
ཁོང་ལ་རེ་བ་འཛིན་པར༌ངེས།།
ཞེས༌གསུངས་པའོ།།
13 ཁྱོད་ཅག་ལ་དམ་པའི་ཐུགས་ཉིད་ཀྱི་མཐུ་སྟོབས་བརྒྱུད་ནས་རེ་བ་ཆེན་པོ་འཐོབ་པའི༌ཕྱིར། ད་ནི་རེ་བ་གནང་མཁན་དཀོན་མཆོག་གིས་ཁྱོད་རྣམས་ཀྱི་དད་པ་བརྒྱུད་ནས་ཁྱོད་ཅག་ལ་དགའ་སྤྲོ་དང་ཞི་བདེ་ཕུན་སུམ་ཚོགས་པ་གནང་བར༌སྨོན།
ཕོལ་ལོལ་ཁོང་ཉིད་ཕྱི་ཕྱོགས་པ་རྣམས་ཀྱི་ཞབས་ཕྱི་པར་གྱུར༌པ།
14 སྤུན་ཟླ༌རྣམས། ཁྱོད་ཅག་ནི་བཟང་པོས་བལྟམས་ཤིང་། ཤེས་ཡོན་ཀུན་གྱིས་ཁྱབ་པ་དང་། ཕན་ཚུན་ལ་སྐུལ་མའང་གཏོང་ཐུབ་པར་བདག་ལ་ཡིད་ཆེས་བརྟན་པོ་ཡོད༌མོད།
15 འོན་ཀྱང་ངས་ཁྱོད་ཅག་ལ་དྲན་སྐུལ་བྱེད་པའི༌ཕྱིར། དོན་ཁ་ཤས་ཀྱི་ཆེད་དུ་སྤོབས་པ་བསྐྱེད་ནས་འཕྲིན་ཡིག་འདི་བྲིས་པ༌དང༌། ཁྱད་པར་དཀོན་མཆོག་གིས་ང་རང་ལ་ཐུགས་རྗེ་གནང་བ་བཞིན༌དུ།
16 མཆོད་དཔོན་ལྟར་དཀོན་མཆོག་གི་འཕྲིན་བཟང་ལ་ཞབས་ཕྱི་བྱས་ནས། བདག་ནི་ཕྱི་ཕྱོགས་པ་རྣམས་ཀྱི་དོན་དུ་མཱ་ཤི་ཀ་ཡེ་ཤུའི་ཞབས་ཕྱི་པ་ཡིན་ལ། དེ་ནི་ཕྱི་ཕྱོགས་པ་རྣམས་དམ་པའི་ཐུགས་ཉིད་ཀྱི་སྒོ་ནས་དམ་པར་མཛད༌དེ། དཀོན་མཆོག་ཐུགས་མཉེས་པའི་མཆོད་རྫས་སུ་འགྱུར་བའི་ཕྱིར་རོ།།
17 དེ་བས་དཀོན་མཆོག་གི་མཛད་དོན་སྐོར་གླེང༌ན། མཱ་ཤི་ཀ་ཡེ་ཤུའི་ནང་དུ་བདག་ལ་ངོམ་ཆོག་པ་ཞིག་ཡོད་ལ།
18 སྐྱབས་མགོན་མཱ་ཤི་ཀས་ང་རང་བརྒྱུད་ནས་མཛད་པའི་དོན་དག་ལས༌གཞན། ངས་ཅི་ཡང་གླེང་མི་ཕོད༌དེ། ཁོང་གིས་ངའི་སྨྲ་བརྗོད་དང་བྱ་སྤྱོད་བརྒྱུད༌ནས།
19 གྲུབ་རྟགས་དང་ངོ་མཚར་ཅན་གྱི་དོན་རྣམས་ཀྱི་ནུས་མཐུ་དང༌། དམ་པའི་ཐུགས་ཉིད་ཀྱི་ནུས་མཐུའི་སྒོ་ནས། ཕྱི་ཕྱོགས་པ་རྣམས་དཀོན་མཆོག་གི་བཀའ་ལ་བསྟུན་པར་མཛད། ཐ་ན་བདག་གིས་ཡེ་རུ་སཱ་ལེམ་ནས་ཨིལ་ལི་རི་ཀུམ་ཡུལ་བར་དུ་སྐྱབས་མགོན་མཱ་ཤི་ཀའི་འཕྲིན་བཟང་ཡོངས་སུ་བསྒྲགས་སོ།།
20 ཡང་མི་གཞན་གྱིས་བཙུགས་པའི་རྨང་གཞིའི་སྟེང་དུ་མི་བརྩིག་པའི༌ཕྱིར། བདག་གིས་སྐྱབས་མགོན་མཱ་ཤི་ཀའི་མཚན་ཐོས་མ་མྱོང་བའི་ཡུལ་གྲུར་འཕྲིན་བཟང་བསྒྲག་རྒྱུའི་བློ་ཐག་བཅད་པ་ཡིན།
21 དེ་ལ་གསུང་རབ་ཀྱི་མདོ་ལས་ཇི་སྐད༌དུ།
ཁོང་ལ་རྒྱུས་མེད་རྣམས་ཀྱིས་མཐོང་འགྱུར༌ཞིང༌།།
གོ་ཐོས་མེད་པ་རྣམས་ཀྱིས་རྟོགས་པར༌འགྱུར།།
ཞེས་བཀོད་པ་བཞིན༌ནོ།།
22 ང་རང་ཐེངས་མང་པོར་བཀག་བྱུང་བས། ཁྱོད་ཅག་གི་མདུན་དུ་གཏན་ནས་འགྲོ་མ་ནུས༌སོ།།
རོ་མཱ་གྲོང་ཁྱེར་དུ་འགྲོ་བའི་འཆར༌གཞི།
23 འོན་ཀྱང་། ད་ལྟ་ཡུལ་འདི་དག་ཏུ་ང་ལ་ལས་དོན་སྒྲུབ་ས་གཞན་མེད༌དེ། ལོ་དུ་མའི་རིང༌ལ། བདག་ནི་སི་ཕེན་ཡཱ་ཡུལ་དུ་འགྲོ་བའི་དུས་སུ་ཁྱོད་ཅག་གི་མདུན་དུ་ཡོང་འདོད་པ༌དང༌།
24 ཁྱོད་ཅག་གི་ཡུལ་དེ་བརྒྱུད་ནས་ཁྱོད་རྣམས་ལ་འཕྲད་པར་འགྱུར་བ་དང༌། ཐོག་མར་ཕན་ཚུན་འབྲེལ་འདྲིས་བྱས་ཏེ་ཅུང་ཙམ་ཡིད་ཚིམས༌རྗེས། ཁྱོད་རྣམས་ཀྱིས་ང་རང་ལ་སྐྱེལ་མ་བྱེད་པར་རེ་བ་བྱེད།
25 འོན༌ཀྱང༌། ད་ནི་ང་རང་ཡེ་རུ་སཱ་ལེམ་དུ་དད་ལྡན་དམ་པ་རྣམས་ལ་རོགས་རམ་བྱེད་དུ༌འགྲོའོ།།
26 ཅིའི་ཕྱིར་ཞེ་ན། མ་ཀེ་དོན་ཡཱ་དང་ཨ་ཀ་ཡཱ་ཡུལ་གཉིས་ཀྱི་མི་རྣམས་ཀྱིས་ཡེ་རུ་སཱ་ལེམ་དུ་ཡོད་པའི་དད་ལྡན་དམ་པ་རྣམས་ཀྱི་ཁྲོད་ནས་དབུལ་པོ་རྣམས་ལ་སྦྱིན་པ་གཏོང་འདོད་པའི་ཕྱིར༌རོ།།
27 དེ་ནི་ཁོ་རྣམས་དགའ་བར་གྱུར་པ་སྨོས་མ་དགོས༌ཏེ། དོན་ལ་དེ་ནི་བུ་ལོན་ལྟ་བུའང་ཡིན། ཅིའི་ཕྱིར་ཞེ་ན། ཕྱི་ཕྱོགས་པ་རྣམས་ལ་ཡ་ཧུ་དཱ་པའི་སེམས་ཉིད་ཀྱི་བགོ་སྐལ་བཟང་པོ་ཐོབ་ཡོད༌ན། དེ་ཚོས་ཀྱང་ཡ་ཧུ་དཱ་པ་རྣམས་ལ་འཚོ་བྱེད་ཀྱི་དངོས་པོ་སྦྱིན་པ་གཏོང་འོས་སོ།།
28 དེའི༌ཕྱིར། བདག་གིས་དོན་འདི་བསྒྲུབས་ཏེ་ཞལ་འདེབས་འདི་ཁོ་རྣམས་ལ་རྩིས་གསལ་པོར་སྤྲད༌རྗེས། ང་རང་ཁྱོད་ཅག་གི་ཡུལ་བརྒྱུད་ནས་སི་ཕེན་ཡཱ་ཡུལ་དུ་འགྲོ་བར༌བྱ།
29 ང་རང་ཁྱོད་ཅག་གི་ཡུལ་དེར་ཡོང་བའི་དུས༌སུ། སྐྱབས་མགོན་མཱ་ཤི་ཀའི་ཕུན་སུམ་ཚོགས་པའི་བྱིན་རླབས་དང་བཅས་ཏེ་ཡོང་ངེས་པ་ནི་བདག་གིས་ཤེས༌སོ།།
30 སྤུན་ཟླ༌རྣམས། ངས་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་དང་དམ་པའི་ཐུགས་ཉིད་ཀྱི་བྱམས་པར་བརྟེན༌ནས། ཁྱོད་རྣམས་ཀྱིས་བདག་གི་དོན༌དུ། བདག་དང་ལྷན་དུ་དཀོན་མཆོག་ལ་གསོལ་བ་འདེབས་པར་བརྩོན་དགོས་ཞེས་བསྐུལ༌ཏེ།
31 བདག་ནི་ཡ་ཧུ་དཱའི་ཡུལ་གྱི་བཀའ་ལ་མི་ཉན་པའི་མི་རྣམས་ལས་ཐར་བ༌དང༌། ངས་ཡེ་རུ་སཱ་ལེམ་གྱི་དོན་དུ་བསྡུས་པའི་ཞལ་འདེབས་དེ་དད་ལྡན་དམ་པ་རྣམས་ཀྱིས་དགའ་སྤྲོའི་ངང་ནས་ལེན་པ༌དང༌།
32 བདག་ནི་དཀོན་མཆོག་གི་ཐུགས་དགོངས་བཞིན༌དུ། དགའ་དགའ་སྤྲོ་སྤྲོའི་ངང་ཁྱོད་ཅག་གི་ཡུལ་དེར་ཡོང་སྟེ། ཁྱོད་རྣམས་དང་མཉམ་དུ་ངལ་གསོ་འཐོབ་པ་བཅས་ཀྱི་ཕྱིར་གསོལ་བ་འདེབས་པར༌གྱིས།
33 ཞི་བདེ་གནང་མཁན་དཀོན་མཆོག་ནི་ཁྱོད་ཅག་ཐམས་ཅད་དང་མཉམ་དུ་བཞུགས་པར༌སྨོན། ཨ༌མེན།