ལེའུ་བཅུ་བཞི༌པ།
སྤུན་ཟླའི་དོན་ལ་ཁ་ཚོན་གཅོད་མི་རུང་བའི་སྐོར།
1 ཁྱོད་ཅག་གིས་དད་སེམས་ཆུང་བ་རྣམས་རང་གི་གྲས་སུ་ལོངས༌དང༌། འོན༌ཀྱང༌། བསམ་ཚུལ་མི་འདྲ་བ་ལ་རྩོད་པ་མ་བྱེད༌ཅིག
2 མི་ལ་ལ་དངོས་པོ་མཐའ་དག་ཟ་རུང་བར་ཡིད་ཆེས༌ནའང༌། དད་སེམས་ཆུང་བ་རྣམས་ཀྱིས་སྔོ་ཚལ་ལས་གཞན་ཅི་ཡང་མི༌ཟའོ།།
3 ཅི་ཡང་ཟ་བའི་མི་དག་གིས་མི་ཟ་བའི་མི་ལ་མཐོང་ཆུང་བྱེད་མི་རུང༌ལ། མི་ཟ་བའི་མི་དེ་ཡིས་ཅི་ཡང་ཟ་བའི་མི་ལ་ཁ་ཚོན་ཡང་གཅོད་མི་རུང༌སྟེ། རྒྱུ་མཚན་ནི་དཀོན་མཆོག་སྔར་ནས་མི་དེ་ལ་དགྱེས་པའི་ཕྱིར༌རོ།།
4 ཁྱོད་ནི་སུ་ཞིག་ཡིན༌འདོད་དམ། ཁྱོད་ཀྱིས་མི་གཞན་གྱི་ཞབས་ཕྱི་པ་ལ་ཁ་ཚོན་གཅོད༌དམ། ཁོ་ནི་བརྟན་པོར་སྡོད་པའམ་ས་རུ་འགྱེལ་ནའང་ཁོ་ལ་བདག་པོ་ཡོད༌པ་དང་། ཁོ་ནི་བརྟན་པོར་སྡོད་སྲིད༌དེ། གཙོ་བོས་ཁོ་རང་བརྟན་པོར་མཛད་ནུས་པས་ཁོ་ནི་བརྟན་པོར་སྡོད་ངེས༌སོ།།
5 མི་ལ་ལས་ཉིན་མོ་འདི་ནི་ཉིན་མོ་དེ་ལས་ལེགས་པར་འདོད༌ཅིང༌། ཡང་མི་ལ་ལས་ཉིན་མོ་ཐམས་ཅད་གཅིག་མཚུངས་ཡིན་པར་འདོད༌པ་རེད། འོན༌ཀྱང་མི་རེ་རེའི་སེམས་པ་བརྟན་པོ་ཡིན་དགོས།
6 ཉིན་མོ་སྲུང་མཁན་གྱིས་གཙོ་བོའི་དོན་དུ་སྲུང༌ཞིང༌། ཟས་ཟ་མཁན་གྱིས་དཀོན་མཆོག་ལ་བཀའ་དྲིན་ཞུ་བ་ཡིན་པས་གཙོ་བོའི་དོན་དུ་ཟ་བ༌དང༌། ཟས་མི་ཟ་བ་དེས་ཀྱང་གཙོ་བོའི་དོན་དུ་མི་ཟ་ཞིང་དཀོན་མཆོག་ལ་བཀའ་དྲིན་ཞུ་བའོ།།
7 བདག་ཅག་ལས་རང་གི་དོན་དུ་འཚོ་བ་ནི་གཅིག་ཀྱང་མེད༌ལ། རང་གི་དོན་དུ་འཆི་བའང་གཅིག་ཀྱང་མེད།
8 བདག་ཅག་འཚོ་ན་གཙོ་བོའི་དོན་དུ་འཚོ༌ཞིང༌། ཤི་ནའང་གཙོ་བོའི་དོན་དུ་ཤི་བ་ཡིན༌པས། བདག་ཅག་ནི་ཤི་གསོན་གང་ཡིན་ཡང་གཙོ་བོའི་མི་ཡིན་ནོ།།
9 དེའི༌ཕྱིར། གསོན་པོ་དང་གཤིན་པོ་གཉིས་ཀྱི་གཙོ་བོར་འགྱུར་བའི༌ཕྱིར། སྐྱབས་མགོན་མཱ་ཤི་ཀ་ནི་སྐུ་གྲོངས་པ་ནས་སླར་གསོན༌པ་ཡིན།
10 དེས་ན། ཁྱོད་ཀྱིས་ཅིའི་ཕྱིར་སྤུན་ཟླ་ལ་ཁ་ཚོན་གཅོད༌དམ། ཡང་ཅིའི་ཕྱིར་སྤུན་ཟླ་ལ་མཐོང་ཆུང་བྱེད༌དམ། རྒྱུ་མཚན་ནི་བདག་ཅག་ཐམས་ཅད་དཀོན་མཆོག་གི་ལེགས་ཉེས་ཀྱི་ཁྲིམས་ཐག་གཅོད་པའི་བཞུགས་ཁྲིའི་མདུན་དུ་ལངས་ནས་སྡོད་ངེས་སོ།།
11 དེ་ལ་གསུང་རབ་ཀྱི་མདོ་ལས་ཇི་སྐད༌དུ།
གཙོ་བོ་དཀོན་མཆོག་གིས་ནི་འདི་སྐད༌དུ།།
བདག་གིས་རང་གི་ཚེ་སྲོག་དཔངས་བཙུགས་ནས།།
དམ་བཅའ་འདི་ལྟར་བཞག་པ་ཡིན་ལགས་ཏེ།།
པུས་མོ་ཀུན་གྱིས་བདག་ལ་ཕྱག་འཚལ༌ཞིང༌།།
ཀུན་གྱི་ངག་ནས་བདག་ནི་ཁས་ལེན༌བྱེད།།
ཅེས༌བཀོད་པའོ།།
12 དེའི༌ཕྱིར། བདག་ཅག་མི་རེ་རེས་རང་གི་དོན་རྣམས་དཀོན་མཆོག་གི་དྲུང་དུ་རྒྱུ་མཚན་གསལ་པོར་བཤད་པར་ངེས་སོ།།
13 དེ་ལྟར་ཡིན་པས། ཕྱིན་ཆད་བདག་ཅག་གིས་ཕན་ཚུན་ལ་ཁ་ཚོན་གཅོད་མི་རུང༌ལ། སུས་ཀྱང་སྤུན་ཟླའི་མདུན་དུ་བཀག་རྒྱའམ་ས་ལ་འགྱེལ་བྱེད་ཀྱི་དངོས་པོ་ཅི་ཡང་མི་འཇོག་པར་སེམས་ཐག་ཆོད༌ཅིག
14 མི་གཙང་བའི་དངོས་པོ་གཞི་ནས་མེད་པ་ནི་བདག་གིས་གཙོ་བོ་ཡེ་ཤུར་བརྟེན་ནས་ཤེས་ཤིང་དོན་དེར་ཡིད་ཆེས་བརྟན་པོ་ཡོད་དོ།། འོན༌ཀྱང༌། སུ་ཞིག་གིས་དངོས་པོ་གང་ཞིག་མི་གཙང་བར་བསམས༌ན། མི་དེའི་རྐྱེན་གྱིས་དངོས་པོ་དེ་ནི་མི་གཙང་བ་ཡིན།
15 གལ༌ཏེ། ཁྱོད་ཀྱི་ཁ་ཟས་ཀྱིས་སྤུན་ཟླའི་ཡིད་སྐྱོ་བར་བྱེད༌ན། དེ་ནི་བྱམས་པ་བཞིན་དུ་སྤྱད་པ་སྤྱོད་པ་མ་ཡིན། སྐྱབས་མགོན་མཱ་ཤི་ཀ་ནི་ཁོའི་དོན་དུ་སྐུ་གྲོངས༌པས། ཁྱོད་ཀྱི་ཁ་ཟས་ཀྱིས་སྤུན་ཟླ་དེ་ནི་འཕུང་དུ་འཇུག་མི་རུང་ངོ༌།།
16 དེའི་ཕྱིར། མི་གཞན་ལ་ཁྱོད་ཀྱི་བཟང་དེར་དམའ་འབེབས་བྱེད་དུ་འཇུག་མི་རུང༌སྟེ།
17 དཀོན་མཆོག་གི་རྒྱལ་སྲིད་ནི་བཟའ་བཏུང་ལ་བརྟེན་པ་མིན༌པར། དེ་ནི་དྲང༌བདེན་དང་ཞི༌བདེ། དམ་པའི་ཐུགས་ཉིད་ནང་གི་དགའ་སྤྲོ་བཅས་ལ་རག་ལས་པའི་ཕྱིར༌ཡིན།
18 དོན་འདི་ལྟ་བུའི་སྟེང་ནས་སྐྱབས་མགོན་མཱ་ཤི་ཀར་ཞབས་ཕྱི་བྱས་ན། དཀོན་མཆོག་གི་ཐུགས་དགྱེས་ཤིང་མི་རྣམས་ཀྱིས་ཀྱང་ཁས་ལེན་ནོ།།
19 དེའི༌ཕྱིར། བདག་ཅག་གིས་ངེས་པར་འགྲིག་མཐུན་ཡོང་བ་དང་ཕན་ཚུན་ཡར་བསྐྱེད་པའི་དོན་དེར་བརྩོན་དགོས་པ༌ལས།
20 ཁ་ཟས་ཀྱི་དབང་གིས་དཀོན་མཆོག་གི་མཛད་འཕྲིན་ལ་གཏོར་བརླག་གཏོང་མི་རུང་ངོ༌།། དངོས་པོ་ཐམས་ཅད་གཙང་བ་ནི་སྨོས་མ་དགོས༌ཀྱང༌། སུ་ཞིག་གིས་ཁ་ཟས་ཀྱི་རྐྱེན་གྱིས་མི་གཞན་སར་འགྱེལ་དུ་འཇུག་པ་ཡིན༌ན། དེ་ནི་ཁོའི་ཉེས་སྐྱོན་ཡིན་ནོ།།
21 ཡང་ན་ཤ་ཟ་བ་དང་ཆང་འཐུང་བ་སོགས་དོན་གཞན་གང་ཡིན༌ཡང༌། སྤུན་ཟླ་སར་འགྱེལ་དུ་འཇུག་པ་ཡིན༌ན། དོན་དེ་ཐམས་ཅད་སྤང་ན་ལེགས།
22 ཁྱོད་ལ་ཡོད་པའི་དད་པ་དེ་དཀོན་མཆོག་གི་དྲུང་ནས་སེམས་སུ་ཟུངས༌ཤིག སུས་ཀྱང་རང་ཉིད་ཀྱིས་སྒྲུབ་ཆོག་པར་འདོད་པའི་དོན་གྱི་ཆ༌ནས། རང་གིས་རང་ལ་ཉེས་སྐྱོན་མི་འཛུགས་མཁན་ལ་བྱིན་རླབས་ཐོབ༌པ་ཡིན་ནོ།།
23 གལ༌ཏེ། དོགས་པ་ཅན་གྱིས་ཟོས་ན། དེ་ནི་དད་པའི་སྒོ་ནས་ཟོས་པ་མ་ཡིན་པས་ཉེས་སྐྱོན་ཡོད་ངེས༌ལ། དད་པ་ལས་བྱུང་བ་མིན་པ་ཐམས་ཅད་ནི་སྡིག་པ་ཡིན༌ནོ།།