ལེའུ་བཅུ་དྲུག༌པ།
ཕོལ་ལོལ་གྱིས་འཚམས་འདྲི་ཞུ༌བ།
1 བདག་གིས་ཁྱོད་རྣམས་ལ་ངེད་ཅག་གི་ལྕམ་སྲིང་ཕོའོ་པེ་མཚམས་སྦྱོར་བྱ་སྟེ། ཁོ་མོ་ནི་ཀེན་གྲེའི་ཆོས་ཚོགས་ཀྱི་ལས་འཛིན་མཁན་ཡིན༌ལ།
2 ཁྱོད་ཅག་གིས་དད་ལྡན་དམ་པའི་ལུགས་དང་མཐུན་པར་ཁོ་མོར་གཙོ་བོའི་ནང་དུ་སྣེ་ལེན་བྱེད་པར༌འཚལ། ཁོ་མོས་སྔར་ནས་མི་མང་པོ་དང་ང་རང་ལའང་རོགས་རམ་བྱས༌པས། ཁོ་མོར་ཕྱོགས་གང་ནས་རོགས་རམ་བྱེད་དགོས༌ན། ཁྱོད་རྣམས་ཀྱིས་ཁོ་མོར་རོགས་རམ་གྱིས༌ཤིག།
3 ཕུར་སི་ལཱ་དང་ཨ་ཀུ་ལཱ་གཉིས་ལ་འཚམས་འདྲི༌ཞུའོ།། ཁོ་གཉིས་ནི་མཱ་ཤི་ཀ་ཡེ་ཤུའི་ནང་དུ་བདག་གི་ཆོས་གྲོགས་ཡིན༌ལ།
4 ཁོ་གཉིས་ཀྱིས་བདག་གི་དོན་དུ་རང་སྲོག་བློས་གཏོང་བར་ཡང་འཛེམས་མ་མྱོང༌། བདག་གིས་ཁོ་གཉིས་ལ་བཀའ་དྲིན་ཞུ་བར་མ༌ཟད། ཕྱི་ཕྱོགས་པ་རྣམས་ཀྱི་ཆོས་ཚོགས་དག་གིས་ཀྱང་ཁོ་གཉིས་ལ་བཀའ་དྲིན༌ཞུས་སོ།།
5 དེ་ནས་ཁོ་གཉིས་ཀྱི་ཁྱིམ་དུ་ཡོད་པའི་ཆོས་ཚོགས་ལའང་འཚམས་འདྲི༌ཞུའོ།། བདག་གིས་གཅེས་སུ་འཛིན་པའི་ཨེ་པེ་ནེ་ཐུ་ལ་འཚམས་འདྲི་བྱོས་ཤིག ཁོ་རང་ནི་ཨེ་ཞི་ཡཱ་ཡུལ་ནས་སྐྱབས་མགོན་མཱ་ཤི་ཀར་དད་པ་བྱེད་མཁན་ཐོག་མ་ཡིན།
6 མིར་ཡམ་ལའང་འཚམས་འདྲི༌ཞུའོ།། ཁོ་མོས་ཁྱོད་རྣམས་ཀྱི་དོན་དུ་དཀའ་ཚེགས་མང་པོ་མྱངས༌པ་ཡིན།
7 བདག་གི་ཡུལ་མི་སྟེ་བཙོན་གྲོགས་ཨན་དྲོ་ནེ་ཀུ་དང་ཡུན་ཡཱ་གཉིས་ལའང་འཚམས་འདྲི༌ཞུའོ།། ཁོ་གཉིས་ནི་སྐུ་ཚབ་པ་རྣམས་ཀྱི་ཁྲོད་དུ་མིང་གྲགས་ཆེ༌ཞིང༌། བདག་གི་སྔོན་དུ་སྐྱབས་མགོན་མཱ་ཤི་ཀའི་ནང་དུ་ཡོད་པ་ཡིན།
8 བདག་གིས་གཙོ་བོའི་ནང་དུ་སྙིང་ནས་གཅེས་པའི་ཨམ་པིལ་ཨ་ལའང་འཚམས་འདྲི༌བྱོས་ཤིག
9 སྐྱབས་མགོན་མཱ་ཤི་ཀའི་ནང་གི་བདག་ཅག་གི་ཆོས་གྲོགས་ཨུར་པཱ་ནོ་སི༌དང༌། བདག་གིས་གཅེས་སུ་འཛིན་པའི་སིར་ཏི་གཉིས་ལའང་འཚམས་འདྲི༌ཞུའོ།།
10 སྐྱབས་མགོན་མཱ་ཤི་ཀའི་ནང་དུ་ཚོད་བགམ་ཐེག་མཁན་ཨ་པེལ་ལེ་ལའང་འཚམས་འདྲི༌ཞུའོ།། ཨ་རིས་ཏོ་བུལ་གྱི་ཁྱིམ་མི་རྣམས་ལ་འཚམས་འདྲི༌ཞུའོ།།
11 བདག་གི་ཡུལ་མི་ཧེ་རོད་ཡོན་ལའང་འཚམས་འདྲི༌ཞུའོ།། གཙོ་བོའི་ནང་དུ་ནར་ཀིས་ཀྱི་ཁྱིམ་མི་རྣམས་ལ་འཚམས་འདྲི༌ཞུའོ།།
12 གཙོ་བོའི་ནང་དུ་དཀའ་སྡུག་མྱོང་མཁན་ཏྲི་ཕེ་ནཱ་དང་ཏྲི་ཕོ་སཱ་གཉིས་ལའང་འཚམས་འདྲི༌ཞུའོ།། གཅེས་སུ་འོས་ཤིང་གཙོ་བོའི་ནང་དུ་དཀའ་ཚེགས་མང་པོ་མྱངས་མཁན་པེར་སི་ལའང་འཚམས་འདྲི༌ཞུའོ།།
13 གཙོ་བོའི་ནང་དུ་བདམས་པའི་རུ་ཕུ་དང་ཁོའི་ཡུམ་གཉིས་ལའང་འཚམས་འདྲི༌ཞུའོ།། ཁོའི་ཡུམ་ནི་བདག་གི་ཡུམ་ལྟ་བུའང་ཡིན༌ནོ།།
14 ཨ་སིན་ཀྲི་ཏི༌དང༌། ཕི་ལེ༌ཀོན། ཧུར༌མེ། པ་ཏྲོ༌པཱ། ཧེར་མཱ་བཅས༌དང༌། ཁོ་རྣམས་དང་མཉམ་དུ་ཡོད་པའི་སྤུན་ཟླ་རྣམས་ལའང་འཚམས་འདྲི༌ཞུའོ།།
15 ཕི་ལོ་ལོ་ཀི་དང་ཡུ་ལེ༌ཡཱ། ནེ་རེ་དང་ཁོའི་སྲིང༌མོ། ཨོ་ལིམ་པཱ་བཅས༌དང༌། ཁོ་རྣམས་དང་མཉམ་དུ་ཡོད་པའི་དད་ལྡན་དམ་པ་རྣམས་ལའང་འཚམས་འདྲི༌ཞུའོ།།
16 ཁྱོད་རྣམས་ཀྱིས་ཕན་ཚུན་ལ་དམ་པའི་འོ་བྱས་ནས་འཚམས་འདྲི་བྱེད་པར༌གྱིས། སྐྱབས་མགོན་མཱ་ཤི་ཀའི་ཆོས་ཚོགས་ཐམས་ཅད་ཀྱིས་ཁྱོད་རྣམས་ལའང་འཚམས་འདྲི༌ཞུ་བའོ།།
17 སྤུན་ཟླ༌རྣམས། བསླབས་པའི་བཀའ་དང་འགལ་བའི་མི་རྣམས་ཀྱིས་ཁྱོད་ཅག་ལ་དབྱེན་བྱེད་པ་དང་སར་འགྱེལ་དུ་འཇུག༌པས། ཁྱོད་ཅག་གིས་མི་དེ་རྣམས་ལ་དོགས་ཟོན་བྱས་ནས་གཡོལ་དགོས་པར་བདག་གིས་བསྐུལ༌བ་ཡིན་ནོ།།
18 རྒྱུ་མཚན་ནི་མི་དེ་ལྟ་བུ་རྣམས་ཀྱིས་བདག་ཅག་གི་སྐྱབས་མགོན་མཱ་ཤི་ཀ་ལ་ཞབས་ཕྱི་མི་བྱེད༌པར། རང་ཉིད་ཀྱི་འདོད་བློ་ཁོ་ནར་ཞབས་ཕྱི་བྱེད་ཅིང་ཁ་ཡག་ཚིག་སྙན་གྱིས་གཡོ་སྒྱུ་མེད་པ་རྣམས་བསླུ་བར་བྱེད་པ་ཡིན།
19 ཁྱོད་ཅག་གིས་བཀའ་ལ་ཉན་པའི་གཏམ་ནི་མི་ཐམས་ཅད་ལ་ཁྱབ་པར་གྱུར༌པས། བདག་ནི་ཁྱོད་ཅག་གི་ཕྱིར་སྤྲོ་བར་གྱུར་ཏོ།། འོན༌ཀྱང༌། བདག་གི་སེམས་སུ་ཁྱོད་རྣམས་དོན་བཟང་པོའི་ཆ་ནས་གྲུང་པོ༌དང༌། དོན་ངན་པའི་ཆ་ནས་བླུན་པོ་ཡིན་པར་འདོད༌དོ།།
20 ཞི་བདེ་གནང་མཁན་དཀོན་མཆོག་གིས་མི་འགྱང་བར་བདུད་སཱ་ཏན་ནི་ཁྱོད་ཅག་གི་རྐང་འོག་ཏུ་བརྫི་བར་འགྱུར༌ཞིང༌། བདག་ཅག་གི་གཙོ་བོ་ཡེ་ཤུའི་ཐུགས་རྗེ་ནི་ནམ་ཡང་ཁྱོད་ཅག་དང་མཉམ་དུ་བཞུགས་པར༌སྨོན།
21 བདག་གི་ཆོས་གྲོགས་ཐི་མོ་ཐེ༌དང༌། བདག་གི་ཡུལ་མི་ལོ་ཀེ༌ཨོ༌དང༌། ཡཱ༌སོན། སོ་སི་པཱ་ཏེར་བཅས་ཀྱིས་ཁྱོད་རྣམས་ལ་འཚམས་འདྲི༌ཞུ་བ་ཡིན་ནོ།།
22 འཕྲིན་ཡིག་འབྲི་མཁན་ཏེར་ཏི་ང་ཡིས་ཀྱང་གཙོ་བོའི་ནང་དུ་ཁྱོད་རྣམས་ལ་འཚམས་འདྲི༌ཞུ་བ་ཡིན།
23 བདག་དང་ཆོས་ཚོགས་ཡོངས་ལ་སྣེ་ལེན་བྱེད་མཁན་ཀེ་ཡུ་ཡིས་ཀྱང་ཁྱོད་ཅག་ལ་འཚམས་འདྲི༌ཞུའོ།།
24 གྲོང་ཁྱེར་ནང་གི་དངུལ་མཛོད་ལ་དོ་དམ་བྱེད་མཁན་ཨེ་རས་ཏི་དང་སྤུན་ཟླ་ཁིར་ཐི་གཉིས་ཀྱིས་ཁྱོད་རྣམས་ལ་འཚམས་འདྲི༌ཞུའོ།།
བསྟོད་པ་འབུལ༌བ།
25 དེ་ཡང་བདག་གིས་སྒྲོག་པའི་འཕྲིན་བཟང་དང་ཡེ་ཤུ་མཱ་ཤི་ཀ་སྒྲོག་པ་བཞིན་དང་། གནའ་ནས་གབ་པའི་གསང་བ་དེ་ཉིད་བསྟན་པ་བཞིན། དཀོན་མཆོག་ཁོང་ཉིད་ཀྱིས་ཁྱོད་ཅག་གི་སེམས་ཀྱང་བརྟན་པོར་མཛད་ནུས༌པ་དང་།
26 གསང་བ་དེ་ནི་ད་ལྟ་མངོན་པར་གྱུར་པ༌དང༌། ཐོག་མཐའ་མེད་པའི་དཀོན་མཆོག་གི་བཀའ་བཞིན་དང་ལུང་སྟོན་པ་དག་གི་མདོ་རྣམས་བརྒྱུད་ནས་མི་རིགས་ཀུན་ལ་བསྟན༌ཞིང༌། དེ་ནི་མི་རིགས་དེ་རྣམས་ཀྱིས་དད་པའི་ཁས་ལེན་བྱེད་དགོས་པའི་ཕྱིར༌རོ།།
27 ཡེ་ཤུ་མཱ་ཤི་ཀ་བརྒྱུད་ནས་ཀུན་མཁྱེན་དཀོན་མཆོག་ཁོ་ན་ལ་ཇི་སྲིད་བར་དུ་བསྟོད་བསྔགས་བརྗོད་པར༌སྨོན། ཨ༌མེན།། །།