10
1 Ili ya atakaci i ɗa a kubana wa aza a na a̱ tsu kpa̱ɗa̱ kuzuwa wila̱ mejege,
koɓolo n aza a na e ci neke wila̱ wa atakaci,
2 a̱ sa̱nka̱ aza a unambi ili i na yi i le,
ka̱ta̱ a isa kasingai a̱ ubuta̱ u uma a̱ va̱ a na i a̱ ka̱tsuma̱ ka atakaci,
o bonoko agapa a̱ a̱ma̱ci ilikulyaꞋa i le
ka̱ta̱ kpamu a̱ fa̱ba̱na̱ ili yi mkpan.
3 Yiɗa̱i va kuyaꞋan a kanna ka atakaci,
kawuya kuta̱ baci daꞋin ɗa ka̱ ta̱wa̱i?
U yayi va kusuma va bana va̱ la̱nsa̱ uɓa̱nki?
Te ɗai va kuka̱sukpa̱ uciyi u nu?
4 Va kubuwa n ili i na va kuyaꞋan ba, sai vu kuɗa̱ngu koɓolo n agbashi
ko vu yikpa̱ a̱ ubuta̱ wa aza a na a unai ɗe.
N nannai va dem, wupa u ni u kotso ba,
kukiye ku ni ku buwa ta̱ uɗengushi an wa lapa.
Afada a̱ Ka̱shile a kubana wa aza a Asiriya
5 Ili ya atakaci i ɗa a kubana wa aza a Asiriya
kalangu ka wupa ka̱ va̱, aza a na kukiye ku le ku ɗa ma̱gba̱la̱mgba̱la̱m ma wupa ma̱ va̱.
6 N suku ta̱ aza a Asiriya a banka iɗika i na i yevei Ka̱shile ba n kuvon,
u uma a na a tsu zuwa mu wupa.
N suku le ta̱ a bana a̱ pura̱ ucanuku u le,
a dasasa le an kopoti ka na ka ci yaꞋan a uye.
7 Ama ili i nampa i ɗa u sheshei ba,
i ɗaɗa ili i na wi n i ɗa a̱ ka̱ɗu ba,
ama kusheshe ku ni ku ɗaɗa wu una,
u yawaka iɗika n a̱bunda̱i uteku.
8 U danai,
<<Ovonshi a̱ va̱ ra̱ka̱ ngono n ɗa ba?
9 Tsu la̱nga̱sa̱ ta̱ Kaluno uteku tsu na ci yaꞋin n Kakemishi.
Ɗa Hamatu u nekei utan uteku tsu Apada,
ɗa tsu la̱nga̱sa̱i Samariya uteku tsu na ci yaꞋin n Dimaska.
10 Tsu na kukiye ku va̱ kisai tsugono tsu na a̱ma̱li i a kulyaꞋa,
tsugono tsu na ululu a laꞋi a̱ma̱li a Urishelima koɓolo n a̱ma̱li a Samariya,
11 mi a̱ kula̱nga̱sa̱ Urishelima n a̱ma̱li a̱ ni
tsu na n la̱nga̱sa̱i Samariya n a̱ma̱li a̱ ni ba?>>
12 Ayin a na baci Vuzavaguɗu u kotsoi ulinga u ni a Kusan u Sihiyona n Urishelima, wi ta̱ a kudana, mi ta̱ e kuneke mogono ma aza a Siriya atakaci adama a̱ a̱ra̱ɗi a gbani-gbani koɓolo n ugbamukaci u gbasa u na wi a̱ a̱shi a̱ ni.
13 Adama a na u dana ta̱,
<<N utsura we ekiye u va̱ u ɗa n yaꞋin ili i nampa,
n ugboji u va̱ adama a na mi ta̱ n kuyeve.
N takpai uteku u ka̱buza̱ wi iɗika kakau,
m pura̱i uciyi u le,
an kovonshi vu utsura n yawakai ngono n le uteku.
14 Kukiye ku va̱ ku gaꞋakai n uciyi
wi iɗika n a̱bunda̱i tsu na vuza u tsu uka kukiye ku ni a cikinda
ka̱ta̱ u pura̱ okowo a na a̱ ka̱sukpa̱i,
ta m ɓolongi iɗika kakau nannai,
babu vuza na u ɗengusa̱ka̱i mu kuvelyu
ko u ɓa̱yuwa̱ una̱ u keɓece mu.>>
15 Kogovu ki ta̱ a kuyaꞋan a̱ra̱ɗi u laꞋa vuza na wi a̱ kuɓa̱na̱ yi,
ko ugangafu u yaꞋan a̱ra̱ɗi u laꞋa a̱yi na wi a̱ kuɓa̱na̱ yi?
Ko kalangu ka ci yaꞋan ta̱ malapuka babu kukiye?
Ba kukiye kuɗa ki uremi n kalangu ka ba?
16 Adama a nannai Vuzavaguɗu, Vuzavaguɗu MalaꞋimili,
a̱yi wi ta̱ a̱ kusuku ma̱dukpa̱ ma gbani-gbani a kubana wa osoji a̱ a̱ra̱ɗi a aza a Siriya,
ka̱ta̱ a̱ ka̱tsuma̱ ku utsura u ni a tasuku akina a̱ usuɗukpi
o yongo a̱ kukula̱ n usuɗukpi ka̱u.
17 Kutashi ka aza a Isaraila ki ta̱ o kokpo akina,
Vuza Ciɗa wi ta̱ o kubono ka̱vusa̱ ka akina.
Wi ta̱ e kuleɓece
awana m mita̱ ma gbani-gbani n akina a kanna ke te.
18 UgaꞋin u mura̱ta̱i u ni koɓolo n iɗika i tsuta̱ i ni
wi ta̱ a̱ kula̱nga̱sa̱ ka̱ɗu n ikyamba dem,
tsu na vuza vu mɓa̱la̱ u tsu na̱mgba̱.
19 Nɗanga m mura̱ta̱i n nanlo ma kubuwa n a̱bunda̱i ba, kenu ɗa o kokpo
ali tsu na maku ma kufuɗa me kece le.
Aza a Isaraila a na a buwai
20 A kanna ka nanlo uma a na a kubuwa a Isaraila, n aza a na a laꞋakai a kpaꞋa ku Yakubu o kudoku a zuwaka vuza na u kuna le katsura ba, ama i ta̱ a kuzuwaka Vuzavaguɗu, Vuza Ciɗa vi Isaraila katsura.
21 Aza a na a buwai va i ta̱ o kubono, aza a na a laꞋakai a kpaꞋa ku Yakubu i ta̱ o kubono u Ka̱shile MalaꞋimili.
22 Ko uma a̱ ɗa̱ aza a Isaraila a yimkpa an kayala ka mala, aza a na a buwai ɗa koci o kubono. O foɓuso ta̱ ɗe munuka a kubana u uma a̱ ni, munuka ma na ma yaꞋin derere n ele.
23 Vuzavaguɗu, Ka̱shile MalaꞋimili, a̱yi ɗa u kula̱nga̱sa̱ iɗika dem tsu na u foɓusoi ɗe kuyaꞋan.
24 Adama a nannai, na ɗa ili i na Vuzavaguɗu, Vuzavaguɗu MalaꞋimili u danai, <<A̱ɗa̱ uma a̱ va̱ aza a na i a̱ ida̱shi a Sihiyona, ka̱ta̱ i pana wovon wa aza a Asiriya ba, aza a na a tsu lapa ɗa̱ n alangu koɓolo n kuyaꞋan ko oɓolo adama a̱ ɗa̱ tsu na aza a Masar a yaꞋin.
25 M megeshe ba, wupa u va̱ a kubana wa̱ ɗa̱ wi ta̱ o kukotso, ka̱ta̱ u ɗa u bono ili i na i kula̱nga̱sa̱ le.
26 Vuzavaguɗu MalaꞋimili wi ta̱ a kufaba le m mashawuri, tsu na u lapai aza a Midiya a kakpanlai ko Orebu, ka̱ta̱ u ɗengusa̱ kalangu ka̱ ni a gaɗi vu mala tsu na u yaꞋin a Masar.
27 A kanna ka nanlo a̱miki e le i ta̱ a kuyaꞋan utakpi a avangatsu a̱ ɗa̱, kogboro ke le ki ta̱ a kuyaꞋan utakpi e kuɗeku ku nu. Maɗanga ma anaka ma a vicimba va vi ta̱ a kuyaꞋan ukoɗi adama a na vi yaꞋan ta̱ ikyamba ka̱u.>>
28 U yawai a Aita,
u walai m Miguro,
ɗa u foɓoi ucanuku u ni a Mikamasha.
29 A pasai upashi ɗaɗa a danai,
Ci ta̱ a kasa a Geba.
Ɗaɗa aza a Rama a panai wovon,
aza a Gibiya likuci i Shawulu a sumai.
30 Lapai una̱ ka̱u a̱ɗa̱ uma a Galima,
panai a̱ɗa̱ aza a Laishaha,
n a̱ɗa̱ aza a Anato.
31 Aza a Madamena a suma ta̱,
aza a na i ida̱shi a Gebi a̱ la̱nsa̱i ubuta̱ u kusheɗeku.
32 A̱ ka̱tsuma̱ ka ayin a nanlo i ta̱ a̱ kutsura̱ngu o Nobu,
wi ta̱ e kuveɗece ka̱kuꞋun ka̱ ni
a Kusan ku Sihiyona,
a kaginda ka Urushelima.
33 Ama indana Vuzavaguɗu, Vuzavaguɗu MalaꞋimili
wi ta̱ a kugbatya maɗanga ma gbayin ma aza a Asiriya n utsura u gbayin.
Nɗanga n ɗa̱nga̱-ɗa̱nga̱ mi ta̱ a̱ kuyikpa̱,
ka̱ta̱ mu ugaɗi-ugaɗi n yaꞋan ugbati.
34 Wi ta̱ a kukapa ubuta̱ u na wi tukpa m mura̱ta̱i n kogovu,
Lebano wi ta̱ a̱ kuyikpa̱ e kelime ka MalaꞋimili.