9
A matsaka tsu ta̱ maku
1 N nannai dem, babu ka̱yimbi kpamu adama a aza a na i a̱ ka̱tsuma̱ ka atakaci. A ayin a na a lazai ɗe o goyo ta̱ iɗika i Zabalun koɓolo n iɗika i Nafutali, ama na kelime wi ta̱ a kucikpa Ga̱lili va aza a̱ ka̱yimbi, n uye u mala u na u walai n upashi u kuyene ku Urudu.
2 Uma a na i a nwalu a̱ ka̱yimbi,
e ene ta̱ kutashi ku gbayin,
aza a na i o kuyongo a̱ kulu ki iɗika ya̱ a̱kpisa̱,
we le kutashi ki ta̱ a ku akana.
3 Yi ta̱ a kuzuwa iɗika ya aza a Isaraila i gbonguro,
ka̱ta̱ uma a̱ ni a yaꞋan ma̱za̱nga̱ ka̱u.
I ta̱ a kuyaꞋan ma̱za̱nga̱ a kubana wa̱ nu,
tsu na uma a ci yaꞋan ma̱za̱nga̱ a ayin a vikyaꞋa,
n tsu na kpamu osoji a ci yaꞋan ma̱za̱nga̱ i baci e kupece ili i na a̱ pura̱i gbani a̱ ubuta̱ u kuvon.
4 Tsu na vi yaꞋin ɗa vu unai osoji a Midiya, tsu nanlo tsu ɗa va kuyaꞋan ka̱ta̱ vu koɗo
maɗanga ma kaburakpatsu ka tsugbashi ke le,
ka̱ta̱ vu takpa ucanuku wa̱ a̱miki u na wi a avangatsu e le.
Vi ta̱ o kukoɗo kalangu ka vuza na u ci neke atakaci.
5 I songu ataka dem o kovonshi a na a yaꞋankai ulinga a̱ ubuta̱ u kuvon koɓolo m
motogu ma na ma saꞋwai mpasa,
wo okpo an maniꞋin ma akina.
6 A matsaka tsu ta̱ maku, wa̱ tsu u ɗa e nekei maku, tsugono ci ta̱ a kushamgba a kaci ka̱ ni.
I ta̱ e kuɗeke yi vuza va
odoki vi ili i Mereve, Ka̱shile MalaꞋimili,
Dada vu uteku n uteku, Mogono ma̱ ma̱ta̱na̱.
7 Tsugono ci ni m ma̱ta̱na̱ ma̱ ni
mi o kukotso ba.
Wi ta̱ a kulyaꞋa tsugono ci ni tsu na tsu uta̱i a̱ ubuta̱ wa akaya a̱ ni Dawuda,
u ka̱na̱ tsu ɗa ka̱ta̱ u la̱na̱ tsu ɗa,
n ugaꞋin m ma̱ta̱na̱ kpamu
ali sai uteku n uteku. Ucikali u Vuzavaguɗu MalaꞋimili wi ta̱ a kushatangu ili i nanlo.
Wupa u Vuzavaguɗu adama a aza a Isaraila
8 Vuzavaguɗu u suku ta̱ kadanshi ka na ka̱ kpa̱ɗa̱i kuyokpo u Yakubu,
ka ɗa ki ta̱ ta na a̱ kuta̱wa̱ wa aza a Isaraila.
9 Uma ra̱ka̱ i ta̱ e kuyeve kaꞋa,
Ifirayimu n aza a na i ida̱shi a Samariya,
ele na i a kadanshi n a̱ra̱ɗi koɓolo n a̱ɗu a gbani-gbani,
10 <<Iputa̱ ya i yikpa̱ ta̱ a iɗika,
ama ci ta̱ a kumaꞋasaka i ɗa n atali a na e sheꞋwei mayin,
maɗanga ma zaitu ma yaꞋan ta̱ uvakangi,
ama ci ta̱ o kubono tsa̱ shikpa̱ punu nɗanga ma akawu a una̱ u nanlo wa.>>
11 Ama ɗa Vuzavaguɗu u ɗengusa̱i irala i le aza e Rezin a̱ shilika̱i n ele,
ɗa u kushangi irala i le ya.
12 Aza a Siriya a̱ uta̱i a kasana, A̱filisiya̱ a̱ uta̱i a̱ ka̱livi
ɗa a kambuki aza a Isaraila n anga e le uɓa̱yuwi.
Ama n nannai dem wupa u Vuzavaguɗu u kotso ba.
Ka̱kuꞋun ka̱ ni ka buwa ta̱ ukuꞋunki an wa lapa.
13 Ama uma a o bono u vuza na wu unai le ba,
ko a̱ la̱nsa̱ Vuzavaguɗu MalaꞋimili vu na u takacikai le.
14 A kanna ke te Vuzavaguɗu wi ta̱ a kugbatya kaci n winja wa aza a Isaraila dem,
koɓolo n kacaka ke kekeme ka mashuwa ka singai ka m mita̱ dem,
15 nkoshi m gba̱ra̱-gba̱ra̱ n aza a gbagbaꞋin ele ɗa kaci ka,
eneki a na a yaꞋin kuyotsongu ka aꞋuwa ele ɗa winja.
16 Aza a na o tonoi n uma a nampa a vakangu le ta̱,
ɗa aza a na a vakangi va a̱ puwa̱nka̱i.
17 Adama a nannai Vuzavaguɗu wi a kupana uyoꞋo n a̱ɗa̱nga̱ni ba,
wi kpamu a kupana asuvayali a mkpaꞋan n agapa ba,
adama a na yaba dem wi n asuvu a singai ko n ukuna u singai a kubana a̱ ubuta̱ u Ka̱shile ba,
una̱ u yaba dem wi ta̱ a kudansa ili i gbani-gbani.
N nannai dem, wupa u ni u kotso ba,
kukiye ku ni ku buwa ta̱ uɗengushi an wa lapa.
18 Mayun kawuya ka̱ tsu kula̱ ta̱ tsa akina,
ko tsu songu ta̱ awana n kapanɗalala,
ka̱ta̱ kpamu ke leɓece kakamba ka gbayin n akina
ali ka̱nga̱ kuta̱ a̱gusu-a̱gusu.
19 N wupa u Vuzavaguɗu MalaꞋimili
iɗika yi ta̱ a̱ kuciya̱ uva̱li,
ka̱ta̱ uma e leɓece a akina,
babu vuza na u kisa vuza ni.
20 A usingai i ta̱ a kuminjarangu, ama kambulu ko kukotso le ba,
a ugula̱ i ta̱ a a kulyaꞋa, ama i a̱ kucuwa̱ ba.
Yaba dem wi ta̱ a kutakuma inyama yi muku n na u matsai.
21 Manasa wi ta̱ a kulyaꞋa Ifirayimu, ka̱ta̱ feu Ifirayimu u lyaꞋa Manasa.
Dem vi le o bono a tsurala n Yahuda.
N nannai dem, wupa u ni wi o kukotso ba,
kukiye ku ni kpamu ku buwa ta̱ uɗengushi an wa lapa.