11
Kacaka ka na kuta̱i a kumaci ku Jesi
1 Kumi ku Jesi ki ta̱ o kutopo,
ka̱ta̱ kacaka punu a utopi wa ka matsa umaci.
2 Ayinviki a Vuzavaguɗu i ta̱ o kuyongo n a̱yi.
Ayinviki e kuyeve n cicoꞋo,
ayinviki e kuneke kadanshi n utsura,
ayinviki e kuneke kuyeve n kupana wovon u Vuzavaguɗu.
3 UyoꞋo wi ida̱shi u ni wi ta̱ o kuyongo n wovon u Vuzavaguɗu.
A̱yi wa kuyaꞋan afada a ili i na wi e kene n a̱shi a̱ ni,
ko u yaꞋan ulinga n i na u panai uma a kudansa n atsuvu a̱ ni ba.
4 Ama n usuɓi u ɗa u kuyaꞋanka aza a yali afada.
N kasingai kpamu ka̱ta̱ u ɓa̱nka̱ aza a unambi a aduniyan a nampa,
n kadanshi ku una̱ ka̱ ni ɗa u voɗotsoi a̱ɗu a uma,
n ayinviki a una̱ u ni a ɗaɗa u kunaka aza a na a ci yaꞋan kawuya.
5 Usuɓi u ɗa u kokpo maganda ma̱ kuyun ma̱ ni,
ka̱ta̱ ukuna u mayun wo okpo maganda me melengeɗi ma̱ ni.
6 A kanna ka nanlo meshe ma kakamba mi ta̱ o kuyongo m maku mo mokyon,
kanama kpamu ko yongo m maku ma maraɗika.
Medendem kpamu ma yaꞋan kalina n kawu,
maku me kenu maꞋa ma kuguɓa le.
7 Kanaka ki ta̱ a kulina m manama ma na e ci ɗeke ma̱kunzukunzu,
muku n le kpamu n vaku a̱ ubuta̱ u te,
ka̱ta̱ kawu kpamu u takuma ijanu an kanaka.
8 Mereɓu mi ta̱ a kuyaꞋan ugulani e kpenle ku keyenku babu i na i kusaꞋwa yi.
Maku ma na a kasai mani mi ta̱ a kuzuwa kukiye ku ni a kangu ka kagbaturu ama u kuluma yi ba.
9 Babu ili i na i kuforo ko yuna vuza
a nsasan n ciɗa n va̱ ra̱ka̱,
adama a na aduniyan i ta̱ a kushana n uyevi u Vuzavaguɗu,
tsu na mini ma tsu pala mala.
10 A kanna ka nanlo vuza yoku a̱ ka̱tsuma̱ ka ntsukaya n Jesi wi ta̱ o kokpo an urotu u kakashi a aduniyan dem. Aduniyan dem i ta̱ a kuzuwa katsura wa̱ ni, ka̱ta̱ iɗika i na wi ida̱shi yo okpo n tsugbayin.
11 A kanna ka nanlo Vuzavaguɗu wi ta̱ o kudoku kpamu wa̱ ba̱rukpa̱ kukiye ku ni ire adama a na wi isa uma a̱ ni a na a buwai a Asiriya, n Ɗaka vu Masar, m Masar vu gaɗi, m Patoro, n Kush, n aza a na i Elim n Shinar kpamu a Babila, n Hamata, n kotogu ka na ki a mala.
12 Wi ta̱ a̱ kuɗa̱ngusa̱ urotu u kakashi adama a aduniyan,
ka̱ta̱ u ɓolongu aza a Isaraila a na o lokoi,
ka̱ta̱ u ɓolongu aza a Yahuda
a na a wacuwai a uɓon u na̱shi wa aduniyan.
13 A ayin a nanlo cisheꞋe tsa aza a Ifirayimu ci ta̱ o kukotso,
ka̱ta̱ aza a na i a tsurala n Yahuda a zuwa uteku.
Ifirayimu u kuyaꞋan cisheꞋe n Yahuda ba,
Yahuda feu u kuyaꞋan tsurala n Ifirayimu kpamu ba.
14 Koɓolo kaꞋa a kugasa ka̱ta̱ a̱ shilika̱ n aza a A̱filisiya̱ a na i a̱ ka̱livi,
ka̱ta̱ a̱ pura̱ ucanuku gbani wa aza a na i ida̱shi a uɓon u kasana.
I ta̱ a kulyaꞋa aza e Edom m Mowabu,
ka̱ta̱ aza a Amona a panaka le.
15 Vuzavaguɗu wi ta̱ e kuɗekpetengu
ubuta̱ wu uga̱vi u mala ma shili,
wi ta̱ a kuzuwa kukiye ku ni kulapa ka̱ta̱ kuɗekpetengu mala ma Yufiretus.
Wi ta̱ a̱ kusuku wunla̱i wu utsura
ka̱ta̱ u zuwa kuyene ka ku pecuku ali ugboku u cindere
tsu na uma a kufuɗa a pasa ku ɗa n ene.
16 Wi ta̱ a kuzuwa uye u gbayin
adama a uma a̱ ni a na a buwai a Asiriya,
tsu na yaꞋankai aza Isaraila
a ayin a na a̱ uta̱i a Masar.