3
1 Echiriꞌ kinchꞌaꞌt chwi ri chak uyaꞌom ri Dios chiqe, na e ta re kantakꞌabꞌaꞌ qaqꞌij. Ma ¿kajawax nawi kanya juna carta chiwach alaq, kꞌutubꞌal re ri chak qaꞌanom? ¿Kajawax nawi kantzꞌonoj che alaq katzꞌibꞌaj alaq juna carta kubꞌiꞌij we utz ri chak qaꞌanom? Laj kꞌo jujun kajawax waꞌ chike, pero riꞌoj na kajawax ta chiqe;
2 ma e ralaq ri alaq qacarta, alaq kꞌutubꞌal re ri qachak qaꞌanom. Lik tzꞌibꞌital kꞌu pa qanimaꞌ janipa ri uꞌanom ri Dios ukꞌ alaq quma riꞌoj, yey wa chak lik kaqꞌalajin chikiwach konoje ri tikawex ruma ri kꞌakꞌ bꞌinik silabꞌik alaq.
3 Lik kꞌut qꞌalaj e alaq kꞌutubꞌal re ri qachak qaꞌanom, e pachaꞌ alaq jun carta tzꞌibꞌital ruma ri Cristo. Yey waꞌ wa carta na rukꞌ ta tinta tzꞌibꞌital wi, e ruma ri Ruxlabꞌixel ri Dios kꞌaslik; y na chwa ta ne jutaq peraꞌj abꞌaj xtzꞌibꞌax wi pachaꞌ uꞌanom ojertan, ma tzꞌibꞌital chupa ri kanimaꞌ ri tikawex.
4 Ruma kꞌu ri uꞌanom ri Cristo qukꞌ, kaqajikibꞌaꞌ uwach ri kaqabꞌiꞌij puwi ri qachak yey ri Dios retaꞌam lik qatzij waꞌ.
5 We ta e laꞌ xa qatukel, na kaqachꞌij ta uꞌanik wa chak, ma qetaꞌam xew rukꞌ ri Dios petinaq wi ri qanaꞌoj y qachuqꞌabꞌ che uꞌanik ruchak Rire.
6 Ekꞌu ri Dios mismo ri xyaꞌw wa chak chiqe, uyaꞌom qanaꞌoj y qachuqꞌabꞌ re kaqaqꞌalajisaj chi utz ri kꞌakꞌ tzij kuꞌan Rire kukꞌ ri tikawex. Yey na kuꞌan ta waꞌ ruma qataqem taqanik, ma e ruma ri kuꞌan ri Ruxlabꞌixel ri Dios pa qanimaꞌ. Ma ri taqanik kukꞌam lo qꞌatbꞌal tzij re kamik paqawiꞌ, noꞌj ri kuya ri Ruxlabꞌixel ri Dios chiqe e kꞌaslemal.
Ri kꞌakꞌ tzij
7 Ri taqanik tzꞌibꞌital kan chwa abꞌaj kukꞌam lo kamik, pero lik kꞌo uchomalil. Ma lik xwon rupalaj ri Moisés echiriꞌ xukꞌul wa taqanik, kꞌutubꞌal re ruchomalil Rutzij ri Dios. Yey ri e aj Israel na utz ta xkitzuꞌ uwach ri Moisés ruma waꞌ wa wonibꞌal, yey waꞌ xa xikꞌowik.
8 We kꞌo kꞌu uchomalil ri taqanik xuya lo ri Dios ojertan, ¡janipa kꞌu lo riꞌ ruchomalil ruchak ri Ruxlabꞌixel ri Dios kuꞌan qukꞌ!
9 We kꞌo kꞌu uchomalil wa taqanik, ri xuqꞌalajisaj ri qꞌatbꞌal tzij re ri Dios pakiwi ri tikawex ruma ri kimak, ¡janipa kꞌu lo riꞌ ruchomalil ri jun chik tzij, ri kukꞌut chiqe suꞌanik kojuꞌan jusukꞌ chwach ri Dios!
10 Ri taqanik xuya ri Dios ojertan kꞌo uchomalil, pero ruchomalil waꞌ na kajunimax ta kꞌana rukꞌ ri kꞌakꞌ tzij.
11 Rupalaj ri Moisés xwon xa pa joqꞌotaj ruma ruchomalil ri Tzij xuya ri Dios che; pero ¡más kꞌo uchomalil riꞌ ri kꞌakꞌ tzij, ma waꞌ na kasach taj!
12 Ruma lik kubꞌul qakꞌuꞌx che wa na kasach taj, riꞌoj lik kaqaqꞌalajisaj chi utz ri kꞌakꞌ tzij y na jinta kaqewaj che.
13 Na e ta pachaꞌ rojertan echiriꞌ ri Dios xuya ri taqanik che ri Moisés, ma rire xuchꞌuq rupalaj ruma lik xwonik, chaꞌ ri e aj Israel na kakitzutzaꞌ ta ruwonibꞌal, ri xa kikꞌowik.
14 Ekꞌu rike na xkaj ta kakimaj usukꞌ Rutzij ri Dios y kꞌa e ne waqꞌij ora echiriꞌ kakajilaj wa Tzij Pixabꞌ xuya ri Dios ojertan, na kakimaj ta usukꞌ; e pachaꞌ chꞌuqutal ri kiwach. Yey waꞌ wa chꞌuquyum ri kiwach, xew ri Cristo kesan re chike.
15 Kꞌa waqꞌij ora nenareꞌ echiriꞌ kakajilaj wa Tzij Pixabꞌ tzꞌibꞌital kan ruma ri Moisés, e pachaꞌ chꞌuqutal ri kiwach y ruma laꞌ na kaqꞌalajin ta ri Qꞌijsaq chikiwach.
16 Noꞌj echiriꞌ junoq kutzelej utzij chwach ri Qanimajawal, kesax na kꞌu riꞌ ri chꞌuquyum ruwach.
17 Ri Qanimajawal e junam rukꞌ ri Ruxlabꞌixel ri Dios; y china ri kꞌo ri Ruxlabꞌixel ri Qanimajawal pa ranimaꞌ, na jinta chi chuxeꞌ rutaqanik junoq chik.
18 Qonoje riꞌoj na chꞌuqutal ta chi ri qawach. E uwariꞌche, kaqil chi utz ruchomalil ri Qanimajawal y kojwolqꞌin che uqꞌalajisaxik waꞌ rukꞌ ri qabꞌinik qasilabꞌik. Ma jalan katajin qajalkꞌatixik chaꞌ jelaꞌ kojuꞌana pachaꞌ ri Qanimajawal. Yey ri Ruxlabꞌixel Rire e ri kaꞌanaw re waꞌ qukꞌ.