4
Ri Pablo kuqꞌalajisaj ri chomilaj Qꞌijsaq re ri Dios
1 Ruma kꞌu waꞌ na kapax ta qakꞌuꞌx che uꞌanik wa chak, ma waꞌ yaꞌtal chiqe ruma ri rutzil ukꞌuꞌx ri Dios.
2 Riꞌoj na jinta kꞌo kaqaꞌan xa xeꞌlaqꞌay y kꞌixbꞌal uwach, na keqasok tane ri tikawex yey na kaqakoj tane uwiꞌ ri kubꞌiꞌij Rutzij ri Dios. Ma e kaqakꞌut pa saqil wi ri Qꞌijsaq chaꞌ jelaꞌ konoje ri ketaw re, kaketaꞌmaj lik jusukꞌ ri kaqaꞌano.
3 Yey we kꞌo kakichꞌobꞌo na qꞌalaj ta ri Utzilaj Tzij, waꞌ e chike ri katajin usachik kiwach.
4 Rike na kakikoj ta ri Utzilaj Tzij ma sachisam ri kinaꞌoj ruma ri jun kataqan che ruwachulew; waꞌ e ritzel winaq, ri xuꞌan pachaꞌ potzꞌ chike chaꞌ na kakil ta ri chomilaj Qꞌijsaq re ri Cristo, ri kukꞌutubꞌej uwach ri Dios.
5 Na e ta kꞌu kaqatzijoj qibꞌ riꞌoj; ri kaqatzijoj e ri Jesucristo e Taqanel pakiwi konoje yey riꞌoj xa oj nimanel e alaq, ma e karaj riꞌ ri Jesús chiqe.
6 Ma ri Dios ri xtaqan che xwon ri qꞌijsaq chupa ri qꞌequꞌm, e Rire ri xwon chupa ri qanimaꞌ chaꞌ rukꞌ laꞌ kaqetaꞌmaj runimal uchomalil Rire, ri kaqꞌalajin ruma ri Cristo.
Mapax qakꞌuꞌx tobꞌ kojikꞌow pa kꞌaxkꞌobꞌik
7 Ri Qꞌijsaq re ri Dios e jun nimalaj bꞌeyomalil, yey uqꞌalajisam waꞌ chiqe tobꞌ riꞌoj xa oj ulew poqlaj. Jelaꞌ xuꞌano chaꞌ kaqꞌalajin waꞌ: Ri unimal chuqꞌabꞌ kꞌo qukꞌ, na qe ta riꞌoj, ma rukꞌ ri Dios kape wi.
8 Tobꞌ kape kꞌu ukꞌiyal uwach kꞌaxkꞌobꞌik paqawiꞌ, kojel na chupa. Tobꞌ kꞌo ubꞌis qakꞌuꞌx, na kapax ta qakꞌuꞌx che.
9 Tobꞌ kojternabꞌex rukꞌ kꞌax, ri Dios na oj roqꞌotam taj. Tobꞌ ne kojmachꞌax pulew, na kakisach ta qawach.
10 Pa taq kojꞌek wi, ri qacuerpo xaqi chwach ri kamik kꞌo wi, jelaꞌ pachaꞌ ri xukꞌulumaj ri Jesús; yey kojikꞌow chupa waꞌ chaꞌ rukꞌ ri qabꞌinik qasilabꞌik kaqꞌalajin rukꞌaslemal ri Jesús.
11 Wa oj kꞌo wara che ruwachulew, xaqi katewun ri kamik paqawiꞌ ruma oj aj chak re ri Jesús; yey kojikꞌow chupa waꞌ chaꞌ kilitaj rukꞌaslemal ri Jesús che ri qacuerpo, tobꞌ ri qacuerpo na jinta ukowil ma xa kakamik.
12 Jelaꞌ kꞌu riꞌ ri kamik kꞌo paqawiꞌ riꞌoj; yey ruma waꞌ, ralaq riqom alaq ri chomilaj kꞌaslemal re ri Dios.
13 Ekꞌu Rutzij Upixabꞌ ri Dios kubꞌiꞌij:
Xkubꞌiꞌ nukꞌuꞌx rukꞌ ri Dios,
e uwariꞌche xinqꞌalajisaj Rutzij Rire. Sal. 116:10
Jekꞌulaꞌ riꞌoj kubꞌul qakꞌuꞌx rukꞌ ri Dios; e uwariꞌche kaqatzijoj rubꞌiꞌ.
14 Qetaꞌam kꞌut e ri xkꞌastajisan lo re ri Qanimajawal Jesús chikixoꞌl ri ekaminaq, jelaꞌ kuꞌan chiqe riꞌoj; kojukꞌastajisaj y junam ukꞌ alaq kojukꞌam bꞌi rukꞌ Rire.
15 Ronoje kꞌu wa qikꞌowibꞌem e uma ralaq, chaꞌ jelaꞌ kakꞌiyar kiwach ri kekꞌuluw re ri unimal rutzil ukꞌuꞌx ri Dios. Yey waꞌ e re yakbꞌal uqꞌij ri Dios, ma jelaꞌ lik e kꞌi ri kakitioxij ri unimal rutzil ukꞌuꞌx ri Dios pakiwiꞌ.
16 E uwariꞌche na kapax ta qakꞌuꞌx, tobꞌ ne wa qacuerpo katajin uriꞌjobꞌik; noꞌj rukꞌuꞌxibꞌal ri qakꞌaslemal na je ta laꞌ uꞌanom, ma jalan kakꞌojiꞌ ne más qachuqꞌabꞌ ri jujun qꞌij.
17 Janipa taq wa kꞌax kaqatij che ruwachulew xa kikꞌowik, yey waꞌ lik kꞌo kutiqoj che ri qabꞌinik qasilabꞌik y che ri chomilaj qakꞌaslemal chilaꞌ chikaj, ri na jinta utaqexik y na jinta kꞌana kajunimax wi.
18 Ekꞌu riꞌoj na kaqaya ta qakꞌuꞌx che ri kilitaj wara che ruwachulew, e kaqaya qakꞌuꞌx che ri na kilitaj taj; ma ronoje ri kilitaj uwach xa kakꞌisik, noꞌj ri na kilitaj ta uwach na jinta utaqexik rukowil.