2
1 Ruma kꞌu laꞌ, xinchꞌobꞌo na kinopon ta tanchi ukꞌ alaq, ma na xuaj taj kanya alaq pa bꞌis.
2 Ma we riꞌin kanya alaq pa bꞌis, ¿china chi kꞌu riꞌ kayaꞌw kiꞌkotemal chwe riꞌin? Na jinta kꞌu nukiꞌkotemal riꞌ we nuyaꞌom alaq pa bꞌis.
3 Ruma kꞌu riꞌ xintzꞌibꞌan pan che alaq, chaꞌ we xinopon ukꞌ alaq, na kinya ta alaq pa bꞌis, ma kiꞌkotemal ri kanwoyꞌej che alaq. Lik kꞌut kubꞌul nukꞌuꞌx ukꞌ onoje alaq, ma wetaꞌam e janipa ri kuya kiꞌkotem chwe riꞌin, kuya kiꞌkotem che ralaq.
4 Na xa ta jubꞌiqꞌ ri kꞌax y ri paxibꞌal kꞌuꞌx xinikꞌow wi echiriꞌ rukꞌ oqꞌej xintzꞌibꞌan pan che alaq. Na xinꞌan ta kꞌu waꞌ chaꞌ kanya alaq pa bꞌis, ma e xinꞌano chaꞌ ketaꞌmaj alaq lik nim ri rutzil nukꞌuꞌx che alaq.
Kuyu alaq umak ri jun xutzelej utzij
5 Xintzꞌibꞌan kꞌu pan puwi ri jun xinuya riꞌin pa bꞌis ruma rumak uꞌanom. Y na xew ta riꞌin, ma laj ne uyaꞌom onoje ralaq pa bꞌis. (Kambꞌiꞌij “Laj” chaꞌ na lik ta kꞌax katataj wa nuchꞌaꞌtem.)
6 Kuꞌan na kꞌu laꞌ janipa ri xꞌan alaq che wa jun tikawex echiriꞌ xqꞌat alaq tzij puwiꞌ, ma rukꞌ waꞌ xutzelej utzij.
7 Ekꞌu ri taqal che kaꞌan alaq woꞌora e kuyu alaq umak y bꞌochiꞌij alaq ukꞌuꞌx chaꞌ jelaꞌ na kasach ta ruma runimal ubꞌis.
8 Kantzꞌonoj kꞌu ko che alaq kꞌutu tanchi alaq ri rutzil kꞌuꞌx alaq che.
9 Ri xuaj riꞌin rukꞌ wa carta e kanwilo we kok alaq il che ronoje ri nupixabꞌanik.
10 We ralaq kakuy alaq umak junoq, jelaꞌ riꞌin kankuy umak. We kꞌo kꞌu kajawax wi kakuy umak, riꞌin nukuyum chi umak uma ralaq y chupa rubꞌiꞌ ri Cristo.
11 Kanꞌan kꞌu waꞌ chaꞌ ri Satanás na kumaj ta uchuqꞌabꞌ paqawiꞌ, ma lik qetaꞌam chi runoꞌjibꞌal chiqij.
Ri Pablo xraj kuto saꞌ uꞌanom riglesia kꞌo Corinto
12 Echiriꞌ xinopon chupa ri tinamit Troas che utzijoxik ri Utzilaj Tzij re ri Cristo, lik chom ri jeqebꞌal re ri nuchak xuya ri Qanimajawal chwe;
13 na rukꞌ ta kꞌu riꞌ, na xkubꞌiꞌ ta ri wanimaꞌ, ma na xinriq ta ri hermano Tito chilaꞌ. Ruma kꞌu riꞌ, xebꞌenuya kan ri hermanos e kꞌo Troas y ximpe Macedonia chaꞌ koꞌlnutzukuj.
Ri chomilaj chak uyaꞌom ri Dios chiqe
14 ¡Xa maltiox kꞌu che ri Dios! Ma kojel pan chi utz chwa ronoje ruma ri Cristo, yey yaꞌtal chiqe kaqaqꞌalajisaj rukꞌuꞌx Rire. Ma quma riꞌoj keꞌek utzijoxik ri Cristo che ronoje luwar, e pachaꞌ kunabꞌal kiꞌ ruxlabꞌ kamuyuyik.
15 Oj kꞌu pachaꞌ kunabꞌal lik kiꞌ ruxlabꞌ kamuyuyik kopon chwach ri Dios, ma quma riꞌoj kaqꞌalajin rukꞌuꞌx ri Cristo chikiwach ri kekolobꞌetajik y chikiwach ri katajin kisachik.
16 Ekꞌu rutzijoxik kaqaꞌano e pachaꞌ utewul kamik chikiwach ri na kakaj ta kakito, ma kukꞌam lo kamik pakiwiꞌ. Noꞌj chikiwach ri kekꞌuluw re, e pachaꞌ kunabꞌal kiꞌ ruxlabꞌ, ma kukꞌam lo chomilaj kꞌaslemal chike. Chwach kꞌu waꞌ wa nimalaj chak re ri Dios, ¿china kachꞌijow uꞌanik?
17 Riꞌoj na kaqaꞌan ta pachaꞌ ri kakiꞌan jujun, ma e kꞌi ri kijalkꞌatim Ruchꞌaꞌtem ri Dios, xa kiꞌanom chꞌakabꞌal puaq che rutzijoxik; noꞌj ri kaqaꞌan riꞌoj chwach ri Dios y pa rubꞌiꞌ ri Cristo, e kaqatzijoj pa saqil wi ri Tzij uyaꞌom ri Dios chiqe.