8
David Sepai ten Gal Ajo
1 Hiti chun David lengpan Philistine mite dia akhopiu lenpen Gath khopi chu gal in alatan, hijeh chun Philistine mite chu ajou in chule asunem sohtan ahi.
2 Chule David chun Moab mite jong gal’in akisatpin ahileh ajou kit in, amite chu asimtoh chet in, hichun abonchan tol'a alupsah sohkeiyin, hiti chun agol'in akigol sah sohkeiyin, hiche golni channa geiya kigol ho jouse chu tha din thu apen, ahin adangse vang chu ahing hoiyin, hiche ahinghoi ho chengse vang chu David dingin soh in apang sohkei tauve.
3 David chun Euphrates vadung geija agam akehlet nom jeh in achepeh in Zobah lengpa Rehob chapa Hadadezer jong gal’in akisatpin ahileh ajou kittai.
4 Hadadezer khut a kon'in David chun sakolkang 1,000 le sakol touthem mi 7,000 amanin, chule kenga galbol sepai 20,000 aman e; chujongleh sakol kangtalai 100 kai ding tilou adangse chu akeng atanboh peh sohkei tan ahi.
5 Damascus apat Areamea te chu Hadadezer lengpa kithopi dia ahung uchun, David in mi 22,000 athat un ahi.
6 Chujouvin David chun Aramea gamsunga Damascus khopia jong sepai hon khat atousah tan ahi; hiti chun Aramea mite jong chu David soh ahiuvin, don le kai ima apeji uve. Hitobang hin David chu agalkon na chan'ah Pakaijin galjona apejingin ahi.
7 Hadadezer sepai te manchah sana ompho jouse chu David in alan Jerusalem a ahin polut sohkeiyin ahi.
8 Hichun Hadadezer khopi te ni Tebah le Berothai a kon'in jong David chun sum-eng tamtah jong ahin chom doh kit in ahi.
9 Chuin Hamath lengpa Toi kitipan jong Hadadezer sepai te abonchan David in gal in akisat pin ahileh ajou tai, ti ajah doh phat in,
10 Toi lengpan jong achapa Joram chu David lengpa kom'a salam bolgunset din asoltan ahi. Ipi jeh-inem itileh David chun Hadadezer kitipa gal a akisatpia ajo jeh ahi; ajeh chu Hadadezer hin Toi lengpa akisatpi jing jeng anahi. Joram hin dangka le sana chule sum-eng ahin pohpeh in ahi.
11 Hichun David in Joram thil hinpoh chengse chu alan aman achomdoh namtin vaipi a konna gal ajo tengleh akilah dangka le sana jouse pumin Pakaiya athenso tha tai.
12 Hiche thil ho hi Edom, Moab, Ammon, Philistia, chule Amalek—chule Zobah lengpa Reboh chapa Hadadezer chapa a konna achom doh chengse jong ajaovin ahi.
13 Chuin ahung kile kit lamin jong chikhuh phaicham a Edom mite mihem 18,000 ahin that pa kit in ahileh David chu aminthang cheh tan ahi
14 David chun Edom gamsunga jong sepai atousah in, hijeh chun Edom mite jong abonchauvin David soh ahisoh tauve. Hitobang tah hin David chu gal a konna chan a Pakaijin gal ajosah sah jeng tan ahi.
15 David chun Israel pumpi chunga lengvai anapon, chule amite adin apha le adih jeng anabol in ahi.
16 Zeruiah chapa Joab chu sepai lamkaiyin ana pangin, Ahilud chapa Jehoshaphat chu leng thuchingin ana pangin ahi.
17 Ahitub chapa Zadok le Abiathar chapa Ahimelech chu thempun ana pang lhon'in ahi; chule Seraiah kitipa chu lekha sunin ana pangin ahi.
18 Jehoiada chapa Benaiah chu lengpa vengbit ho lamkaijin ana pangin; chule David chapa teho chu thempu ho lamkaijin apang uvin ahi.