7
David Dinga Pathen Kitepna
1 Leng David aleng inpia aum chun Pakaijin akimvel a agal mite jouse a kon'in kicholdona apetan,
2 chuin lengpan Themgao Nathan kom'ah hitin aseijin, “Ven, Keima cedar in hoitah sungah kachengin, ahin Pathen Thingkhong chu ponbuh sungah aum jing nalaiye!” ati.
3 Chuin Nathan in lengpa chu adonbut in, “Chetan nangman nalunga umcheng chu gaboldoh tan, ajeh chu Pakaijin nangma naumpin ahi,” ati.
4 Ahin chuche jan ma chun Pakaijin Nathan hengah aseijin,
5 “Chenlang kasohpa David khu gaseipeh tan, 'Hiche hi ahi Pakaijin aphondoh chu: Nangma hi nahim keima chenna ding insa ding chu?
6 Keima in’a kacheng khapoi, Israel mite Egypt gam'a kahin puidoh nikho apat tuni chan geijin. Amavang ponbuh le Houbuh a keima kaum jingin hiti chun munkhat akon munkhat ah kakichon jingin ahi.
7 Keima Israel mite toh hoilai mun a kache nau hijongleh, khatvei jeng jong Israel phung lamkai chule kami Israel te chinghoi ho jah ah, “Ipi dinga keima chenna ding Cedar in hoitah neisahpeh lou uham? tin kana phun khapoi.'”
8 “Tun chenlang gasei tan kasoh David hengah, “Pakai van janel in hitin aseiye: Keiman nangma hi hamhing lah a kelngoi nachinna akon kami Israel te lamkai dinga kalhen nahi.”
9 Nangma hoilai mun nachena hijongleh keiman kahin lhonpi jingin, chule nagal mite jouse namitmu tah in kasumang tai. Chule tua hi keiman leiset chunga mi minthang khat banga namin kakithan sah ding ahi!
10 Chule keiman kami Israel te achenna diu mun khat kapeh ding, hiche mun a chu boina umlouva dettah a kaphudet diu ahi. Achesa a banga migilou nam miten asuhboi thei tahlou diu ahi.
11 Kami Israel te chunga vaihom dia thutan vaihom ho kalhen nikhoa pat ana chuti ahi. Chule keiman nagal miteu jousea kon choldona kapeh diu ahi.
Chukalval'in, Pakaijin aseijin aman nangma In khat nasah peh ding–leng insung katun doh peh ding ahi!
12 Ajeh chu nangma nahung thia chule napu napa tetoh nahung kivui jou teng, keiman nangma chilhah, na taiguiya peng mong-mong khat kahin tundoh ding, chule keiman alenggam chu ka thahat sah ding ahi.
13 Ama chun keima min'a in khat asah ding chule keiman alenggam chu atonsot a kasuhdet peh ding ahi.
14 Keima ama pa kahi ding chule ama kachapa hi ding ahi. Ijem tia achonset khah tah leh, mipa khat in acha abolna banga keiman ama chu kamoljol'a kasuhdih a kasuhgim ding ahi.
15 Ahin ka mihepina Saul chunga kalah manga, na mitmua kon katol mang banga ama chunga vang kalah mang louhel ding ahi.
16 Chule na insung le na lenggam chu imatih channa kamasanga um jing jeng ding, chule nalaltouna chu imatih channa bitkeicha um jing ding ahi,” ati.
17 Hijeh chun Nathan Themgaopa chu David hengah akinung len Pakaijin gaova aseipeh cheng chu agaseipeh tan ahi.
David Kipana Taona
18 Chuin leng David chu Pakai angsung'ah alut in chule atou in atao tan ahi,
“O thaneipen Pakai, kei koi kahi a, ka insung hi ipi hija hichan geija neihin puilhung ham?
19 Chule tunjong thaneipen Pakaijin, ima jouse chungvum in nasohpa lenggam hi atonsot a peh ding nati e! Hiti monga hi mijouse toh na-na kitep mong hinam? O thaneipen Pakai.
20 “Keiman nahenga ipi kaseibe ding ham? Thaneipen Pakai, Nangman nasohpa hi itobang kahi nahesoh nai.
21 Ajeh chu nangman na kitepna bang le nangma lungdei bangin thil jouse hi loupi tah in nabollin chule nasohpa neihet sah sohtai.
22 “Iti loupi nahi tam, O thaneipen Pakai! Nangma bang koima aumpoi. Chule keima hon nang tobang Pathen dang kana jakha hihhel uve.
23 Leiset chunga hi namdang nami Israel te tobang umkha em? Namdang ho hi ipi hiu ham O Pathen, nangman asoh channa uva kon namite dia nahuhdoh mong em? Nangman namite Egypt akon nahuhdoh chun nangma min na suloupin ahi. Chule nangman bolmo kidang loupi tah na bollin namdang te leh a pathen hou chu namite masanga kon na delmang sohhel'e.
24 Chule nangman Israel mite chu imatih channa namite din nasemin, chule nangma, O Pakai a Pathen'u nahitai.
25 “Chule tun, O Pakai le ka Pathen, keima nasohpa kahi; nangma na kitepna bang chun keima leh ka insung chungah bol tan. Chule atonsot a um jing din na kitepna chu phutdet tan.
26 Chule namin imatih chanin jaum hen khuti leh mijousen seijun tin, 'Van Sepai te Pakai chu Pathen chu Israel te Pathen ahi!' Chule nasohpa David insung chu na masangah imatih chanin um jing hen.
27 “O Van Sepai te Pakai, Israel te Pathen, keiman hiche taona neina ding hin hansanna kanei e ajeh chu nangman hiche ho jouse hi nasohpa hengah na phongdoh in, hitin naseiye, ‘Keiman nangma ding leng In ka sahdoh peh ding nahi nati!’
28 Ajeh chu nangma Pathen, Thaneipen Pakai nahi. Na thusei ho adih sohkei in, chule hitobang thilpha jouse hi nasohpa din nakitem e.
29 Chule tun, nasohpa insung phatthei boh ding hi nangma lunglhaina hihen, khuti leh atonsot a nangma angsunga kaum jing thei diu ahi. Ajeh chu nangma thaneipen Pakaijin naseijin, nasohpa phatthei boh ding nati chu, atonsot-atonsot a phattheina ahi.”