5
Israel Mipi Jouse Chunga David Leng Ahi
1 Chuin Israel phung mijouse Hebron munna David kom'a acheuvin ahengah hitin aseijui, “Keiho hi nangma tahsa le thisan jeng kahiuve.
2 Achesa phatlai a Saul kaleng'u ahilai jengin jong Israel sepai te ana lamkai chu nangma bou nahi. Chule Pakaijin nahengah aseijin, ‘Nangma hi kami Israel te chingpa nahi ding ahi. Nangma hi Israel te lamkai ding nahi.” ’ atiuve.
3 Hijeh chun Hebron munnah ahitin ahi, leng David in Pakai masang le Israel upaho jouse masangah kitepna khat asem tan ahi. Chuin ama hon Israel mite chunga leng din thao anu tauvin ahi.
4 David in lengvai ahinpoh chun atahsa kum somthum alhing tan ahi, chule kum somli sung lengvai anapon ahi.
5 Chuin Judah mite chungah kum sagi le lhagup sung Hebron akon vai anahom in, chule Jerusalem akon'in Israel le Judah mite jouse chungah kum somthum le kum thum sung lengvai anahom in ahi.
David In Jerusalem Alah
6 Chuin David in asepai te alamkaijin Jerusalem lam'a Jebus mite toh kidou din ache tauvin, chule amaho hi agam a chengden mi mong-mong ho chu ahiuvin ahi. Chuin Jebus miten hitin David hengah ahin seiyui, “Nangho hiche mun ahin hunglut jou pouvin nate, mitcho le elbai ho jengin jong na deldoh jou diu ahi atiuve!” Ajeh chu amaho hi bitkeija umdan a kigel'u ahi.
7 Ahinlah David in khopi dettah Zion khopi chu alatan ahi, tunin hiche mun chu David khopi akiti tai.
8 Chuche aga bulu nikhou chun David in a sepai ho hengah hitin aseiye, “Keiman Jebus mi mitcho ho leh elbai ho chu kavet nompoi. Koi hileh aga bulu ding ho chu twilam apat khopi sunga lut diu ahi.” Hichu thu kisei abul ahi, “Mitcho ho leh elbai ho chu insung lut manlou maithei u ahi,” ati.
9 Hiti chun David in akulpiu chu a inmun in asemin chule David khopi asah tan ahi. Chule David in khopi sung chu achung langah ahin panin asung lang geijin akehlet ben ahi.
10 Hiti chun David jong ahung thahat cheh-cheh jengin ahi, ajeh chu Pakai Van Pathen sepai ten ama aumpi jeh u ahi.
11 Chuin Tyre gam'a lengpa Hiram in David hengah sottolle ho chu Cedar thingho, thingthem bol ho, song insathem ho chutoh asol than ama hon David leng inpi asahpeh tauvin ahi.
12 Hichun David in Pakaijin Israel mite jouse chunga leng dia atunna le ami Israel te khohsahna jalla alenggam phatthei aboh chu ahin geldoh tan ahi.
13 Hebron akon Jerusalem akichon doh jou chun, David in ajiding le thaikem ding akipui ben, chule ama hon chapa le chanu ahinbe peh un ahi.
14 Hiche ho hi David chapa te Jerusalem a peng ho min ahi: Shammua, Shobab, Nathan, Solomon,
15 Ibhar, Elishua, Nepheg, Japhia,
16 Elishama, Eliada, chule Eliphelet ahiuve.
David In Philistine Te Ajo
17 Chuin Philistine ten David chu Israel te leng dia thao akinu ajahdoh phat un, ama hon asepai te jouse chu David man din akigot sah tauvin ahi. Hinlah amaho ahungu chu David akiseipeh tan, hichun ama kulpidet lam'a ache tan ahi.
18 Chuin Philistine te jong ahung lhungun chule Rephaim phaicham lam geiyin akithe thang tauvin ahi.
19 Hichun David in Pakai adongin, “Keima kapotdoh a hiche Philistine mite hi kaga kisatpi ding ham? Nangman amaho chunga galjona neipeh ding ham?” ati.
Chuin Pakaijin David ahin donbut in, “Henge, chijengin. Keiman amaho khu nangma khut a kapeh tei ding ahi.” ati.
20 Chuin David in Baal–perazim lam ajonin hiche mun a chun Philistine te ajou tan ahi. Chuin David in hitin aseiye, “Pakai bol ahi!” aman kamelma jouse twi kithe thang bangin athe thang tan ahi. Hijeh chun aman hiche mun chu Baal–perazim asah tan ahi (hichu Pakaijin athethang, tina ahi).
21 Philistine miten hiche mun a chun amilimdoi hou chu adalhauvin, chule David le asepai ten amaho chu ala tauvin ahi.
22 Chuin phat chomkhat jouvin Philistine mite chu akile kit un, chule Rephaim phaicham geijin aga kithe thang kit un ahi.
23 Chule David in ipi kabol ding ham tin Pakai chu adong kit in ahileh. Pakaijin hitin ahin donbut in, “Jangkei a na cheuva naga bulu tah lou diu ahi,” “Hinlah anung lam uva kon na umkol diu chuteng poplar thing kom akon na bulu diu ahi.
24 Chule nang hon poplar thing chung lam'a mikijot kengto gin najah teng ule kiging sadem a naum diu ahi! Hichu Philistine mite chunga galjona nanei theina diuva Pakaijin na chungvum uva nalhonpi nau melchihna hi ding ahi.”
25 Hijeh chun David injong Pakaijin athupeh bang chun abollin, Philistine mite jouse chu Gibeon apat Gezer chan geijin athat gamtan ahi.