4
Ishbosheth Kitha
1 Chuin Saul chapa Ishbosheth in Hebron munna Abner thi chung chang ajah chun ahansanna jouse abeitan chule Israel pumpi jong kichat nan adim tauvin ahi.
2 Tun Ishbosheth in sepai gallamkai Rimmon chateni Baanah le Recab chu aneijin, amani chu Benjamin phungmi Beeroth a cheng ahilhon e. Chule tun Beeroth khopi chu Benjamin te gamsung ahitan ahi.
3 Ajeh chu Beeroth mi mong-mong ho chu Gittaim ah ana jamlut un, tuni geijin khopem mi bangin acheng tauve.
4 (Chuin Saul chapa Jonathan in chapa khat aneijin amin Mephibosheth akiti e, chule ama hi aneova pat elbai ahi. Jezreel a konna Saul le Jonathan gal mun'ah athi tai tithu ahung chun ama kum nga bou ahi nalaijin ahi. Hitobang thusoh chapangpa jenle nun ajahdoh phat in ama chu aman in ajampi tan ahi. Hinlah amanu akinoval jeh in chapangpa chu akheh sah tan ahileh ama chu akeng ahung bai tan ahi).
5 Nikhat chu Beeroth akon Rimmon chapa teni Recab le Baanah chu Ishbosheth in'ah sun in agache lhon'in ahileh amapa chun sun kichol anabol in ahi.
6 Chuin kotngah a pangnun, chang ana sep in ahileh a imut sophat in ana imulha tan ahi. Hijeh chun Recab le Baanah jong chun amanu chu akalchuh lhon'in achepai lhon tai.
7 Insung alut lhon'in ahileh Ishbosheth lupna chunga analup amu lhon tan ahi. Hichun anailut lhon'in avolih lhon'in alol atanpeh lhon tan ahi. Chujouvin alu akichoi lhon'in Jordan phaicham geijin jankhovah hellin ajam lhon tan ahi.
8 Chuin Hebron alhun lhon'in Ishbosheth lu chu David ape lhon tan ahi. Chuin lengpa hengah apeng jah jeng lhon'in, “Ven!” hiche hi nagalmi nangma that dia kigo Saul chapa Ishbosheth luchang ahi. Tunin Pathen'in ka pakai lengpa dingin Saul le a insung mite chungah phu alatan ahi.
9 Ahin David in Recab le Baanah jah ah hitin aseijin, “Ka Pathen, kagal mite jouse a kon eihuhdoh pa minna kasei ahi.
10 Khatvei mikhat in 'Saul athitai,' tin kakom'ah ahung seiye, amapa chun keima dia thupha hinpo dan a kigel hinte. Hinlah keiman ama chu kapui in Ziklag munnah kaga that tan ahi. Hichu ama dia ahin thupoh man a kapeh ahi.
11 Akhuti leh keiman kho hepha louva a insunga alupna a lumpa that migilou ho chu ichan geija kipaman kapeh ding hitam? Keiman ama thisan phu hi kalahda a leiset chunga jong ka suhmang da lhon ding ham? ati.
12 Chuin David in amani that din agollhang ho chu thupeh aneijin, chule ama hon jong abol tauvin ahi. Chuin ama hon akhut, akeng atanpeh un atahsa chu Hebron twikul kom'ah akhai tauvin ahi. Chujouvin Ishbosheth lubuh chu achoi un Hebron mun'a Abner lhan ah chun avui tauvin ahi.