30
David In Amalek Mite Asuhmang
1 Nithum jouvin, David le aloite ain’u Ziklag khopi agalhun phat un, Amalek miten Negev chule Ziklag ana sat uva, Ziklag khopi chu meiya ana halvam’u agatoh khauvin ahi.
2 Mihem khatcha that louvin, numei le chapang geiyin ana kaimang uvin ahi.
3 Chuin David le amihon thilsoh le akisuh chimit chu amu uva chule thilsoh ho amu phat uvin,
4 amaho hakan akap un, acholdeh chan geiyin akap un ahi.
5 David jiteni, Jezreel a konna Ahinoam chule Carmel a konna Nabal meithai, Abigail, teni jong chu akaimang lah uva chu jaotha ah ahi.
6 Hijeh chun, David jong alung himo behseh jengtan ahi, ajeh chu amite ho ji le chate ho jong ana kaimangu ahi. Ahinlah David in Pathen a kon'in thahatna akimu ben ahi.
7 Hijeh chun Abiathar in thempupa jah a, “Thempu von ompho chu neihin choipeh in,” ati. Hijeh chun Abiathar in hichu ahinchoi peh in ahi.
8 Chuin David in jong Pakai adongin, “Hiche Amalek mite hi anung’u del leng kaphah ding hinam?” atileh
Pakaijin ahin donbut in, “Henge, dellin, akaimangsa jouse jong nanung mukit ding ahi!” ati.
9 Hijeh chun David in mi 600 akigot in, Besor vadung ahungpha tauve.
10 Sepai 200 vang chu Besor vadung agalkai ding’u chu alel behseh jeh uchun, David chun amoh cheng mi 400 toh adeltou peh uvin ahi.
11 Ache uva ahile gamlah ah Egypt mite khat amandoh uvin David henga ahin kailut tauve. Ama hon neh ding changlhah phabep chule adon ding twi apeuvin ahi.
12 Chule theichangga a kisem changlhah lhon jong apeuvin aneh a adon jou phat in atha ahung hatdoh tan ahi. Ajeh chu an nelou twidon louva nithum le janthum jen kelthoh a um ana hitai.
13 Chuin David in, “Hoiya hungkon nahia, koimi nahim” tia adoh le,
“Keima Egypt mi gollhang kahin, Amalek mikhat soh kahi, nithum masanga pat a chu damlou kahi, ka dammo a kipat a ka pakai pan eidalhah ahitai.
14 Judah gamsung a Kereth mite gamsung’a Negev khopi, Caleb phung mite gamsung ka chomun, chule Ziklag khopi chu meiya ka hallhah uva hung kile kahiuve,” ati.
15 Hichun David in, “Hiche michom ho kom'a chu nei puilut thei ding ham?” tia adoh leh gollhang pan, “Keima neitha da a, chule kapu henga nei pehdoh kit louding’a, Pathen min’a nakihahsel leh keiman napui nange,” ati.
16 Hijeh chun David chu apuijin ahile ama hon Amalek mite ho chun Philistine gamsung le Judah gamsung’a konna achomdoh thilkeo simsen lou kipapina a golnop abol uva, muntin'a akithe thang uva, aneh pet u, adon pet u chule alam pet u atohkha tauvin ahi.
17 Chuti chun David le amiten anokhum un, jan khovah keiyin Amalek mite chu athat un ajing nilhum keiyin nilhangkai chan geiyin athat jingun ahi. Gollhang mi 400 sangong sang chunga touva ajamdoh ho tilou adangse vang athat sohhel'un ahi.
18 Amalek miten alahpeh jouseu chu David in abonchan a inneipi teni jaonan anung lahpeh kittai.
19 Imacha jong amangthah den aumpoi, aneo alen, chapa ahilou le chanu, abonchan akinung mu kittai.
20 David chun kelngoi hon le bonghon jouse jong abonchan anung lahpeh kit in, amiten ahin hoilut soh tauve. Hichun ama hon, “Hiche hi David in gal’a achomdoh ho ahi,” atiuve.
21 Chuin David chu chol behseh jeh a Besor vadunga kidalha sepai jani heng’a achen, David le aloi adang ho amu phat uvin ahung potdoh uvin, kipah le thanom tah in ahung lamto uvin ahi.
22 Ahin David mite lah a miphalou boina sem jeng mi phabep khat ho chun, “Hiche eiho toh kilhon khomlou ho hin hiche thilkeo kichomdoh hohi kilah thei pouvinte,” ahin tiuve.
23 Ahinlah David in, “Ahipoi, kasopi teho, hiche thilkeo chunga hin kilosepou hite. Aman damsel'a eiven uva, galte eijosah uva, ijakaija eikithopiu ahi.
24 Eihon hitia hi thu isei uleh kon nasei angai ding ham? Galkonpa chan jat chu thil ngahpa jong chang tei ding ahi,” tin ahin donbut in ahi.
25 Hiche nia kipan chun David in chonna ding dan ana sem in, tuni geiyin Israel sunga chonna dan in akimangtai.
26 Ziklag ahunglhun phat in, gal’a kihomdoh thilkeo phabep chu aloi agol Judaho athot in hitin aseiye, “Hiche thilpeh hi nangho ding ahi, Pakai dougal teho a kon ahi,” ati.
27 Athilkeo athot ho chu anoiya khomite ding hi ahi: Bethel, Ramoth-negev, Jattir,
28 Aroer, Siphmoth, Eshtermoa,
29 Jerah’meel mite khopi Racal, Ken mite khopi dung’a chengte,
30 Hormah, Bor-ashan, Athach,
31 Hebron chujongleh David le asepai te toh akilonna muntinna athot sohkei uvin ahi.