29
Philistine Ten David Apaidoh U
1 Muntin'a Philistine sepaiho Aphek a akikhom khom’un, chule Israel te sepai chu Jezreel twinah phung mun’ah akikhom uve.
2 Philistine lamkai hon asepai te jakhat loi, sangkhat loijin akhen'un alamkaiyun, David chule a sepai te Achish lengpa kom langa akijot un ahi.
3 Ahinlah Philistine gal lamkai hon, “Hebrew mite ho hiche a hi ipi bolla hiuvem?” atiuve.
Chuin Achish in, “Hiche pa hi David, Israel mite lengpa Saul sohpa chu ahi. Ama hi akum kum’a keitoh umkhom kahi lhon'in, ahunglhun nia kipat tuni chan geiyin athepmona imacha kamupoi,” ati.
4 Ahinla Philistine lamkaiho chu alunghang un, “Na khopi pehna achun nungsol tan! Ama keiho toh galsat in konkhom thei pouvinte, ama galsatna mun’ah kilehei henlang Philistine mite eihin le sat kit uhenlang, eiho luchang hijatpi hi kipoh henlang apupa toh kicham kit taleh, hiche tilouva aman thilpha abolthei ding adang ipi uma na ngaitom?” atiuvin ahi.
5 Hiche David kitipa hi hilou ham? Mihon la abol uva,
‘Saul in mi asang asang athat in,
David in mi sangsom som in athat’e, tia kisei chu?” atiuve.
6 Hichun Achish lengpan achaina in akouvin David jah ah, “Pakai hingjing min'a kasei ahi, nangma keidin nakitah lheh jengin ahi. Keima gellin nang toh gal'a ikon khom ding ham kanati ahin. Ajeh chu nahung lhun tilla kipat in tuni chan geijin na suhkhel imacha kamupon ahi. Ahivanginla Philistine lamkai len dang hon nangma toh gal isat khom diu hi, anom pouvin ahi.
7 Lungset tah in achung uva lung nommo louvin, lungmong in inlam'a kile kit tan,” ati.
8 Hichun David in, “Ipi kanabol khel'a hitobang thil soh ham? Na sohpa keima chunga hi ipi lunglhai louna na mudoh a ka pakai le ka lengpa toh, galmi ho kasat khom theilou hitam?” ati.
9 Ahinlah Achish in, “Keima tah mudol in, nangma hi Pakai vantil bangin nadih lheh jenge, ahinlah Philistine gal lamkai hon gal nasat khompi ding akichauvin ahi.
10 Hijeh chun, jingkah matah tengleh kithou vinlang namite ho jouse toh nei dalha tauvin,” ati.
11 Hiti chun David le aloite ho akigong’un, Philistine gamsung adalha tauvin ahi. Hiche phat chun Philistine sepai hon Jezreel ajon tauvin ahi.