21
Israel ten Benjamin Phung Mite Jiding Aholpeh U
1 Israel ten Mizpah a kihahselna khat aneiyun, “Eihon Benjamin phung mite pasal ho hi ichanu teu ipehlou diu ahi” atiuve.
2 Chuin Israel mipite chu Bethel’ah acheuvin Pakai angah nilhah geijin lungna tah leh lainatah in akapmun ahi.
3 Amaho apeng jah jengun, “O Pakai, Israel Pathen, Israel sunga i-atileh hitobanga hi lhunga hitam? Tun kaphung lah uva khat hi Israel a kon'in amangthah tai!” atiuve.
4 Ajing jingkah matah in mipi ten maicham khat asem’un pumgo thilto leh chamna thilto abol’un ahi.
5 Hijou chun ama hon aseijun, “Eihon Pakai angsunga Mizpah munna ikikhop uva chu Israel phunglah a koipen ahung panglou um am?” atiuvin ahi. Hiche pet a chu ama hon kihahselna gimnei tah ananei uva koi hileh ahung panglou chu thadoh jeng ding ahi ana tiu ahi.
6 Israel ten asopiu Benjamin dingin lunghemna aneiyun hitin aseijun ahi, “Tunin Israel phunglah a khat hi amahthah tai.
7 Eihon athimoh mi themkhat dinga hi aji diu iti ingaito peh diu hitam? Eihon la amaho kichenpi dinga ichanu teu ipeh louhel diu ahi, tia kitepna ineiyu ahitan,” akitito tauve.
8 Ama hon aseijun “Pakai anga Mizpah mun a ikikhop pet uva chu Israel phung holah a konna koipen ham ahung pang louva chu?” atiuve. Hiti chun ama hon Jabesh-gilead a kon'in koimacha ahungpang poi ti amudoh tauvin ahi.
9 Ajeh chu ama hon mipi ho chu asimtoh uleh Jabesh-gilead mi khatcha ana pang pon ahi.
10 Hijeh chun mipi chun ama hon gal-hat cheh 12,000 alhengdoh un Jabesh-gilead mite chu numei chapangho geiya gathat dingin asol’un ahi.
11 Ama hon aseijun, “Hitia hi nabol diu ahi, pasal ho jouse leh nungah pasal toh lumkhomsa jouse jong nahin suhmang sohkei diu ahi,” atiuve.
12 Ama hon Jabesh-gilead a chengho lah a chun pasal toh lumkhom khaloulai cheh nungah theng 400 ahin mu uvin amaho chu Canaan gam Shiloh mun’ah ahin puilut un ahi.
13 Israel khoppi pumpi chun Rimmon songpia kisel Benjamin mite athimoh ho kom'a chun chamna thulhut ding mi asol’un ahi.
14 Hiti chun Benjamin miho chu a inmun a ahung kileuvin chuleh Jabesh-gilead a kihinghoi numei 400 ho chu amaho jidingin apeuvin ahi. Ahinla numei ho chu amaho abonchauvin achangsoh jou pouvin ahi.
15 Mipi ho chu Benjamin dingin ana lunghem lheh jengun ahi, ajeh chu Pakaijin Benjamin chu Israel phung lah a akeh lhah ahitan ahi.
16 Hijeh chun khoppi lamkai ho chun, “Benjamin phunga numeiho lah athigam tan, tua amoh chengho jiding chu iti iholdoh diu hitam?” atiuve.
17 “Israel phungkhat chu moh manthah thei louding ahi. Benjamin phung chu ahung kidodoh theina ding lampi iholdoh diu angaije” atiuve.
18 Ahinlah eihon amaho jidinga achanu pipen pen chu Pathen sapset chan dinga kihahselna gimnei tah inabol’u ahijeh a chu amaho dinga ichanu teu ipethei pouvin ahi” atiuve.
19 Hiche jou chun ama hon kumseh a Shiloh munna Pakaiya dinga kut kibolji chu ahin geldoh un ahi. Hiche Shiloh hi Lebonah lhanglam, Bethel sahlam Bethel’a konna Shechem’a lamlen solama um ahi.
20 Ama hon numei changlou lai Benjamin mite chu aseipeh un, “Cheuvin lang lengpi leiya khun gakisellun lang,
21 Shiloh nungah ho khu laam dinga ahung potdoh tengu leh lengpi leiya kon'in hung lhaidoh unlang mikhatnin khat cheh gakimat uvin lang Benjamin gam na inlang uvah kipuilut unlang kichenpi uvin,” ati tauve.
22 Apateu ahilouleh asopi teuvin keiho kom'a ahung uva kiphinna ahung nei uva ahileh keihon amaho jah a, ‘lunghang hih un, amaho khu khoto jouvin, na chanu teu chu phalpeh jengun, keihon Jabesh-gilead ka suhmang uchun aji diu kamujou peh tapouve, chuleh nangho na nopna tah uva na chanu teu napeh u ahilou jeh in nakitep nau chu na sukeh deh pouve tiuving ting anajol lungdam nauvinge,” atiuve.
23 Hiti chun Benjamin mite chun aseipeh bangun ana bol tauvin, nungah ho chu alampet uchun mikhat in khat cheh akimat un aji dingin akilhoh doh tauvin ahi. Ama hon agam langa akileuvin akhopiu akisemphat un chennan anei tauve.
24 Hiche jou chun Israel mipite jong akipatdoh un ama insung leh aphung dungjuijin ama-ama in cheh a akile tauve.
25 Hichelai khanga chun Israel ten leng ana nei pouvin, mipi ho chun ama mitvet a dih asah dungjui cheh in ana chon’un ahi.