20
Israel ten Benjamin Mite Douna Gal Abol
1 Hiche jouhin Israel chate jouse Dan apat Beersheba, chuleh Gilead gam chan geijin ahung kikhom uvin, mikhat seh-seh tobangin lungkhat tah in ading khom’un ahi. Mipite chu Pakai angsung'ah Mizpah munnah akikhom sohkeiyun ahi.
2 Israel phungho jouse leh mipi ho jouse lah a lamkaiho chu Pathen mite kikhopna achun apangun chule chemjam lamthei sepaiho chu 400,000 alhingun ahi.
3 Alangkhat ah Benjamin mite chun Israel phung dang ho jouse chu Mizpah a akikhom tauve tichu ajatauvin ahi. Hichun Israel mipi chun hitobang thil melse tah hi iti hung kipat ham tin adong tauvin ahi.
4 Ajinu athapeh pau Levi pa chun ahin seitai, “Ka thaikemnu le keima hi jan-geh dinga Benjamin mite khopi Gibeah a kache lhon'in ahi.
5 Hiche jan chun Gibeah mite chun kagena inchu aumkim vellun keima tha ding eigouvin ajonan ka thaikemnu hi jan khovah in kichepnan aneiyun amanu athilo tai.
6 Hijeh chun keiman ka thaikemnu tahsa hi boh somle bohni kaso’a Israel phung som le phungni hi kahin thot ahi. Ajeh chu hiche mite hin melsetah a hitobang gitlouna hi atohdoh u ahi.
7 Tun nangho nabon chauvin Israel mipite jousen iloding natiuvem gel tauvin,” ati.
8 Hichun mipite chu aboncha uvin thakhat tah in adingdoh sohkeiyun asam tauve, “Eiho koimacha in na ikile theilou diu ahi!
9 Amavang eihon tua hi Gibeah mite hitia hi igabol diu ahi, koipenin ikisatpi masat diuham vang isan diu ahi.
10 Iphung jouse uva hi som lah a khat cheh galsat ho neh le chah thah le a pang ding, adangsen Gibeah chunga hi phu ilah tei diu ahi, ajeh chu Benjamin mite hin Israel insunga hibang tah a hi jumna atohdoh u ahitai” atiuve.
11 Hiti chun Israel pumpi chu abonchauvin akilungkhat un hiche khopi sat dingin akikhom soh tauvin ahi.
12 Israel ten Benjamin mite kom'a chun thupole ho asol’un amaho chun, “Itobang lom'a nangho hin hitobang thilse hi na boldoh uhitam?
13 Gibeah khoa konna hitobang mi engse miphalou ho chu neihin pedoh un keihon amaho chu that uving ting Israel lah a thilse hi suhthengna nei uvinge” atiuve.
Ahinlah Benjamin ten anahsah pouvin ahi.
14 Hiche enghotna chun amaho akhopi cheh uva kon'in Gibeah munnah Israel sat dingin ahung kikhom tauvin ahi.
15 Abonchauvin chemjam lamthei cheh s26,000 alhingun amaho chu Gibeah ahunglhung tauvin ahi. Amaho hi khopi sunga ana umsa thepna giltah nei mi 700 aum’un ahi.
16 Benjamin lah a thepna giltah nei sepai 700 ho hi aveilanga chatloh cheh ahiuvin, amaho hin songsena bom'a song apeijuleh samjang jeng jong sepkhel louhel cheh ahiuve.
17 Israel langa Benjamin galmiho simlouvin chemjam kichoija galsat theicheh 400,000 alhingun ahi.
18 Gal kisat masangin Israel te chu Bethel’ah acheuvin Pathen aga dongun, “Benjamin mipite khu gasat dinga koiphung pen kache masat diu ham?” atiuve.
Pakaijin ahin donbutnin “Judah masa ding ahi” ati.
19 Hijeh chun Israel te chu matah in athouvun Gibeah kom'ah panmun asem tauve.
20 Hijou chun Benjamin mite chu sat dingin Gibeah ana jon tauvin ahi.
21 Ahinlah akhopiu ngah a pang Benjamin galmi ho chu ahung potdoh un hiche nichun gal kisatna mun a chun Israel te 22,000 athat tauvin ahi.
22 Ahinlah Israel te chu khat le khat akitil touvin animasa a akisatnau mun ma-ma achun pan alakit tauvin ahi.
23 Ajeh chu amaho ana cheuva Bethel’a Pakai angsunga nilhah geija gakap uva hitia hi Pakai agadoh u ahi, “Keiho kache kit uva Benjamin tehi kagasat kit diu ham?” aga tiuve.
Pakaijin “Cheuvin lang amaho khu gaki satpi kitnun” atipeh in ahi.
24 Hijeh chun amaho ajing chun apotdoh kitnun Benjamin mite chu aga kisatpi kit un ahi.
25 Ahin Benjamin mite chun chemjam choija galsatje them cheh Israel te chu 18,000 ana that kit’un ahi.
26 Hiche jeh chun Israel te abonchauvin acheuvin Bethel’ah anngol pumin nilhah geijin Pakai angah agakap un ahi. Ama hon Pakai angah pumgo thilto leh chamna thilto jong abol'un ahi.
27 Israel te chu Pakai kom'ah acheuvin “I-kati diu hitam?” tin aga dongun ahi. ( Hichelaiya chu Pakai Kitepna Thongkong chu Bethel munna uma ahi
28 Chuleh Aaron thempupa tupa Eleazer chapa Phinehas chu thempu hija ahi.) Israel ten Pakai adongun keihon kasopi teu Benjamin mite hi kasat kit dingu ham ahilouleh kasatda diu hitam?” atiuvin ahi.
“Jingleh che kitnun Keiman amaho khu nangho khutna ka pehdoh ding ahitai,” tin Pakaijin aseijin ahi.
29 Hijeh chun Israel te Gibeah kimvel jouse ah chun chaang apang tauvin ahi.
30 Amaho chu anithum channin akondoh kit un, chule masanga apansatna mun uvah chun apansa kit un ahi.
31 Benjamin mite chu amaho kisatpi dinga ahung kondoh phat un akhopi uva kon chun atoldoh tauvin ahi. Hiti chun amasa ana bolna bang-bangu chun Israel te chu tollhang leh lamlen chungah, khat chu Bethel lang jotna khat chu Gibeah langa akinungle nau munnah mi somthum athat tauvin ahi.
32 Hichun Benjamin sepai ho chun, “Eihon amasa a bang-bang chun ijoukit tauve” tin asam’un ahi. Ahinla Israel te chu jam ding chuleh Benjamin mite chun ahindel diu, chujongleh hitia chu akhopi uva konna potdoh sahna ding thilgon anagon masat u ahi.
33 Israel te sepai abulpi ho chun Baal-tamar ahunglhun phat un galsatna dingin panmun ahin latoh tauvin ahi. Langkhat ah Israel te Gibeah lhumlam'a ana kisel ho chu galsat din akiselna uva kon'in ahung chomdoh tauvin ahi.
34 Israel sepai lah a galsatna thempen ho chu mi sangsom Gibeah khopi nokhum dingin asollut tauvin ahi. Gal kisat chu akhoh lheh jengin Benjamin ten amanthahna diu ahilam akihet pouvin ahi.
35 Hiti chun Pakaijin Israel mite chu Benjamin mite chungah gal ajosah in hiche nikho chun Israel ten Benjamin sepai te chemjam'a galsatje them cheh 25,100 athatnun ahi.
36 Hichun Benjamin ten gal alel diu chu akimuchet tauvin ahi.
Israel te chun Gibeah nokhum dinga changpanga akoihou chu akisonpi jeh un Benjamin sepai hoa kon chun anung chonun ahi.
37 Hijou chun ana changpang ho jouse chu muntin'a kon'in ahung potdoh un khopi sunga um jouse chu athat tauvin ahi.
38 Ama hon ana kihoutoh masat nau dungjuijin khopi sunga chun meikong khu lentah agah kondoh sah tauvin ahi.
39 Israel ten hiche meikhu chu amu phat un, amaho ahung kileheijun Benjamin sepai te anokhum tauvin ahi.
Hiche achun Benjamin gal-hang hon Israel te somthum athat’un ahileh “Eihon ina kisatto nau masa tobanga chu tua jong ijokit u ahitai” tin kholhang asam tauvin ahi.
40 Ahinlah Benjamin sepai ho chu akinung hei uva avet uva ahileh khopi sung muntinna konna meikhu kitungdoh jeng chu amu uvin ahi.
41 Israel mite chu akinung heijun akisatpi tauvin ahi. Hiche phat chun Benjamin mite chun amanthahna diu chu ahunglhunga ahitai ti ahedoh tauvin ahileh atija lheh tauve.
42 Hijeh chun akinung heijun Israel mitea kon chun ajam’un gammang lah adel tauvin ahi. Ahinla ajamdoh jou pouvin ahi, chuleh akhopi vella konna hungdoh ho jong chu aban thagam tauvin ahi.
43 Israel miten Benjamin mite chu aum kimvel’un, chuleh adellun Gibeah solanga aphapa uvin ahi.
44 Hiche ni chun Benjamin mite lah a gal-hatpen ho 18,000 athat tauvin ahi.
45 Ahoidoh ho chu gammang le Rimmon songpi bel dingin ajam tauvin ahi, ahinla Israel ten amaho lah a 5,000 chu lampiah athatpa tauvin ahi. Ama hon adelpeh kit nalaijun Gidom kom'ah 2,000 anathat kit nalaijun ahi.
46 Hiche nikho chun Benjamin phungmi chemjam mangcha a galsat hat cheh 25,000 athiuvin,
47 Amoh cheng mi 600 chu Rimmon songpi langah ajamlut un hichea chun lha li sungin achengun ahi.
48 Chuleh Israel te chu ahung kile uvin khopiho sunga cheng jouse ahin bantha uvin, mipi ahin gancha ahin amu amangu chu abantha soh jengun ahi. Ama hon ahunglut lutnau khopi jouse jong chu ahin ban hallhah jengun ahi.