Kristus iyingani nongan kokohon Yohanes iratuluwiy
Nongan kokohon
Nongan imu
Hu ratuluwi puk iye, ara iro mwonen hu ndramat huro pwalngani hu Kristen, paratesah, hu Kristen ara hu ngara kapwotisingi lohongai tahu tehe Yesu Kristus ara yiy Yapan tahu. Puk iye, ara andre kipwokeyani lohongai ndrisiyon tahu Kristen, pwen pe andre hu nopwaran kinramari hu pwi.
Puk iye, ara iwong iya hu nongan pwandritiye para hu melit soyon, andre karayah kamulan. Matisan hu Kristen para lang ara, ara hupahas iya nongan pwandritiye aro, hapeko hu ndramat hukowu ta Ngindrai ara pwi. Pe ndroiyi nongan pwandritiye aro, ara ipa toro, Yesu Kristus ara yiy Yapan, pe iyau pwoke tan opu, Ngindrai andre kipwalngani hu ndramat hu humwisnani yiy pe andre kipwalngani Sinai i. Pe iro mwonen Yesu imbusi mbulyan iya hapwen, pwen Ngindrai andre kirapasa hu ndramat mepo huro tine pwokeyan iya lohongai ndrisiyon tahu, pe hu kantaliy pwi. Yihu andre koropolo Ngindrai pe andre hu kankuni nopwaran pwi, paratesah, Ngindrai andre kimbusi hu melit masih karayah howen.
1
Ndroiyi Nongan
1 Nongan iye ara nongan kokohon ta Yesu Kristus, mepo Ngindrai iykiy iya kili Yesu para kipwainganiy kiya kili hu ndramat para poya mbulyan iya tesah mepo andre kindrou pwi kirayah. Pe ipwandrisa angelou tan isa pe imbusi nongan iye isa ngawan kili ndramat para poya mbulyan Yohanes.
2 Pe itiyani melit masih kinnimei, mepo nongna Ngindrai, pe titiye ta Yesu Kristus.
3 Ngindrai andre kiyki lomwes kiya kili yiy mepo kinime hu nongan utiyaniy iya nongna poropet iye. Pe lomwes kiya kili hu mepo hu hilingiy pe huwiriy iya ndriya hu tesah mepo kanratuluwiy ita aliy, paratesah, lang ara kinsa pakeh.
Yohanes iratuluwi nongan iya kili hu hurokum andrtoyoh
4 Yo, Yohanes, uratuluwi nongan iye iya kili hu mepo hurokum andrtoyoh ita nondriya kol namandran iya Esiya: Ngindrai para koluw, mahapo, pe andre kisa kamulan, iyasura hu mwoiwan andrtimou mepo hu tora mbulmara ndrohonoku pwanpwan para king tan, ara andre hu kaiki pahas pe ndriya wayis tahu kisa kili wawu.
5 Pe Yesu Kristus mepo malohongan ndrisiyon ara ngara kipwokeyani nongan, yiy ara ndrohan iyau kimat, pe yiy iramwaitini hu pohon tahu king masih para kol pwan.
Pe ndriyan imbulihi worou pe ndreyen, ara isurahi hu pakut mwomwan torou masih iyau.
6 Pe imbusi worou tuho pahandran tehe yiy king, pe imbusi worou turayah hu pris para kambulyani mbulya Taman Ngindrai. Pe andre kahari ngalan pe pwoke ara atan mepo kinto pe kinto! Ndrokonan.
7 Akanimei! Yiy itapo isa iyasura hu kokom,
pe mara ndramat masih andre kanime yiy,
hu mepo hussi yiy, ara andre hu kanime yiy i,
paratesah, tunan yiy opu, pwen hu ndramat masih para kol pwan, ara andre hu karang malihu.
Pwen andre kirayah tehen aliy! Ndrokonan.
8 Yapan Ngindrai ipa, “Yo Alpa pe yo Omeka, yo para mahapo, koluw, pe andre kusa. Yo Ngindrai Pwokeyan Masih.”
Hamou tehe Noru Ndramat
9 Yo, Yohanes, mepo nali wawu, pe tususuye iyawule, pe tunan Yesu ko, tukuni nopwaran, pe tuwayis pe tupwokeyani rou, pe tumbusi mbulen para Kingtom ta Ngindrai. Pe koluw uro mbuson para Patmos, paratesah, iya nongna Ngindrai, pe iya titiye ta Yesu.
10 Iro mwonen Lenge Yapan, pwoke ta Mwoiwan Haiyan ara isa ndrito, pe uhilingi mbulukoyu hamou iwayeh pwokeyan iya, iyau te ndruwo tehe ndrah sih,
11 mepo ipa toro: “Aratuluwiy tesah animei kiya puk maiye, pe arapayaniy kiya kili hu Kristen mepo hutora rokum manandritoyoh: Kiya Epesus, Smirna, Perkamum, Tayatira, Sartis, Pilatelpiya, pe Layotisiya.”
12 Pe urapaiwani yo para kunime mbulukoyu yiy iro wong isa kili yo ara, pe iro mwonen urapaiwani yo, unime mwan makakahu andrtoyoh mbusiy iyau pat kolt.
13 Pe mwalinga mwan ma kakahu ara, ara hamou tehe Noru Ndramat, kinsuluye yiy kinna koyau niwen iya toton iya ndrikan, pe kondrei kolt irakaiyani wiyineren.
14 Payan pe kompayan ara pallen tehe yomwu sipsip, pe pallen tehe koh, pe maran, ara ngannganan iya tehe mwan iroholulun.
15 Ndrikan ara pipiryan iya tehe pat prons mwan iro iyat ndroho mwan namandran, pe mbulukoyun ara tehe ngasa ndran huro tah.
16 Pe iro niman mot, ara imbultuwe hu piriy anandrtoyoh huro aliy, pe iyau pohon isa ngawan ara semen hapai maran malsai. Pe mbulmaran, ara ngannganan iya tehe mwandrai ising pwokeyan iya.
17 Pwen iro mwonen unime yiy, ara uyos uya ndrikan tehe ndramat kinmat. Hapeko iyki niman mot isa ndrito pe ipa, “Mbuna anoh! Yo ara Umu, pe yo ara Mulan para melit masih.
18 Yo kunmat pe kunsatine, hapeko mahapo urupo mwalen kunto pe kunto, pe urupo Mwalen Lang Masih! Pe yo ara umbultuwe hu ki para kimat, pe ta hu ndramat suw.
19 Aratuluwi tesah annimei, melit mepo andre kirayah mahapo, pe melit mepo andre kirayah kamulan.
20 Nongan kokohon para piriy manandrtoyoh annime mepo iro nimo mot, pe mwan makakahu anandrtoyoh, ara iye: Piriy manandrtoyoh, ara hu angelou manandrtimou para rokum manandrtoyoh, pe mwan makakahu, ara hu mepo hurokum manandrtoyoh.”