Nongan Yut iratuluwiy
Yut
Nongan imu
Nongan ratuluwiy iye, ara iya harong o tehe 2 Pita. Nongan aro pakipwai kiya kili hu ndramira Ngindrai para hu mbuna kahilingi nongna hu ndramat hu mwisnani nongan hiyan. Nongan ratuluwiy, ara ipa toro, “Ngindrai kiniyki kultuw handra para lohongai ndrisiyon isa kili worou ndramiran, pe kinlahi ndramat hamou kisuluyani nongan para hu melit mepo tupwotisingi lohongarou iya aliy, ara pwi.” (ita ndromwayan 3)
1
1 Yo Yut ndramat hamou para poya mbulya Yesu Kristus yo nali Yamis hamou. Yo uratuluwi nongan isa kili wawu mepo Ngindrai Tamarou iyoh wawu pe ndriyan kinmbulihi wawu, pe ipwokere wawu hiyan para akaro ata Yesu Kristus.
2 Koisirai, ndriya wayis pe namiliwai, ara kihon kiro kili wawu.
Pakut mwomwan pe korahu ndramat mepo hukowu ta Ngindrai
3 Wawu kowase, ndriyo itine para kuratuluwi nongan para Ngindrai kisopwat worou iyawule ko tapeh, hapeko uhingorowei tehe andre kuratuluwi nongan para kirakelehani wawu kiya lohongai ndrisiyon mepo Ngindrai kiniyki pwen kinna kili hu masih mepo hu ndramat haiyan.
4 Yihu ndramat hayah hu kansa kokohe ko mwalinga wawu, hu mepo pwayan kinpwai pwen koluw kinna para andre hu kakuni kora mwomwan tahu. Yihu ara hu ndramat hu konho haiyani Ngindrai pwi, pe hu pakarawani nongan para pahas ta Ngindrai torou, pe husuluyaniy iya kultuw pwassin. Pe hupa hu kowu tehe Yesu Kristus, ara yiy King pe Yapan.
5 Wawu kanpahasaniy hu melit masih aro topwei, hapeko nakupwai paiwe kisa kili wawu tehe porosih, ara Yapan ara iwiri ndramiran hu husa mawen Yisip, hapeko iya mulan, ipwalngani hu mepo hu kanpwotisingi lohongahu pwi.
6 Pe hu angelou ara hu konto hu ndrohonokuhu para mbulen mepo Ngindrai iykiy iya kili hu para pwoke nopwaran ita aliy, ara pwi, hapeko hu kantali ndrohonoku hu mbukenan ara—hu angelou ara, ara iyki hu huya nondriya kol lokuhan, pe iwasitiriyi hu iya hu malikei hayen mepo andre kinto-kinto para andre hu karo tine mbulmara nongan kiro mwonen Lang namandran para tamwanye.
7 Pwen hu para Sotom pe Komorrah, pe hu kol ngawan masih mepo hurakaiyani kol malkol ara, ara huho ndruwa kultuwaye hu angelou hu kanmbusiy. Pe huro ndruwa hu kultuw pwassin pe hu kultuw para pilah, pwen hu andre karayah pwahanou para andre koro nimei tehe andre kawiri ngandran, pe kakuni kora mwomwan kiro mwan mepo andre kinto-kinto.
8 Pwen tehen tora ko, hu ndramat hukowu ta Yapan aro, ara huwiri pwoke iyau nihinih tahu, pe hu mbusi hu kultuw pwassin iya nombuwehu mbukenan. Pe hu ndrihisani pwoke nopwaran ata Yapan, pe hu ngara kapwasimiri hu angelou manonowahu para kol paingan yang.
9 Hapeko konan angelou ihohin mepo Maikel, ara irakokowai iyasura sinai pe hilu liuliu iya nombuwe Mose, pe kinwong mwomwan pe kiniyki nopwaran kinna kili yiy pwi, hapeko ipa, “Yapan kipomate wou!”
10 Hapeko hu ndramat iye huro rasusut nongan iya melit masih mepo hu kowu iya aliy, pe lohongahu kinileu kinna aliy pwi. Yihu ara tehe hu kan mepo lohonga hu pwi, pe ngara hu koro ndruwa namiliwa nombuwehu ko. Pwen kultuwayi hu iye—ara andre kipwalngani hu.
11 Toimwa hu! Yihu hondruwa kultuwayi Kayin; pe huhumbuh para hu koho ndruwa kultuw mwomwan ata Palaam para hukiyingurani hu para kapo singayai. Pe huho ndruwa kultuw para lowani ata Korah, pwen Ngindrai andre kinpwalngani hu.
12 Hu ndramat toro, ara nondriya hu yon namandran para namiliwai tawawu, ara yihu tehe kas. Pe hu namnam sura wawu tehe hu, ara hiyan o—hapeko hu ara tehe hu ndramat para pwokereya sipsip mepo ngara hu kalohongani ndriya hu mbukenan. Pe yihu ara tehe kokom mepo mbulou aliy pwi, pe nohai iro hiliy iya isa, pe tehe hu kei kanlolihu mangondrohu, pe hu kanmang pe mbuwahu pwi—pe tehe hu kanmat maporolusap.
13 Pe yihu ara tehe nowei para ndras ita rambumbusau mambusasen, kultuw mwomwan ara hu konho masi para kambusiy pwi, pe yihu tehe hu piriy mepo ngara hu kayos o mwaihei, paratesah, Ngindrai kinmwaniyani kol lokuhan masih ta hu para hu kaya aliy, pe andre hu koro ara lang masih.
14 Pe ndraye Atam ara iya matne andrtisap, pwen irayah Enok, pe yiy iwong iya nongna hu poropet iya kili hu ndramat aro ipa, “Akanimei, Yapan andre kisa kiyapolo hu angelou haiyan tan tasopou pe tasopou,
15 para kaiki korahu ndramat masih. Pe andre kipwaingani hu kultuw mwomwan masih ta hu ndramat masih mepo kultuwayi hu mwomwan, pe hu ngara kambusi hu kultuw mwomwan kiya sai handra-handra, pe hu nongan masih mwomwan mepo hu ndramat para pakut mwomwan ngara kawong annan.
16 Yihu ndramat aro ngara hu kakokou soyon, pe karasusut nongan, pe ngara hu koro ndruwa namiliwai para hu pakut mwomwan tahu mbukenan; pe hu ngara kayungurani nongan pe kasikiye hu mbukenan, pe ngara hu kapwahihiri lohonga hu ndramat para hukapo hiyan kiyau aliy.
Akoro tine pwokeyan
17 Hapeko wawu kowase, wawu kalohongani nongna hu aposel ata Yapan Yesu Kristus torou mepo koluw hu kanpwai.
18 Hupwai isa kili wawu toro, “Lang nakiya komunmun, ara andre hu ndramat para pwasimiri hu ndramat andre kasarayah, pe andre hukoro ndruwa namiliwai pwassin para nombuwehu mbukenan.”
19 Yihu ndramat tora, ara andre hu kaiki mwalinga hu ndramat hurokum, pe andre hu koro ndruwa lohonga ndramat, pe Mwoiwan Haiyan ara kinto kili hu pwi.
20 Hapeko wawu kowase, akamandra kiya lohongai ndrisiyon haiyan tawawu, pe akoro tohun kiya pwoke ta Mwoiwan Haiyan.
21 Pe akoro namiliwai ta Ngindrai pe akoro longe koisirai ta Yapan Yesu Kristus torou para kiyki taleh kisa kili wawu mepo andre kinto-kinto.
22 Pe koyum kisikirani hu mepo hu ngara kahandrundru.
23 Pe hu mepo hutora mwan, ara akasopwat hu pe alohihu kasa mawen, pe akayingani koisirai kiya kili hu kiya polo nohowai—pe akoro mawen kultuw pwassin tehe kas ippai iro koyau, pe hu kultuw mepo andre kimbusi wawu kayos kiya aliy.
Totohun para kahari ngala Ngindrai
24 Ngindrai mepo ilahi para kiponokulani wawu para andre akanyos pwi, pe andre kiyki wawu akaya mbulmaran manonowan, pe mwomwan mbuna kiro kili wawu, hapeko pwesai namandran opu—
25 yiy ara Ngindrai hamou opu Sopwat torou, pwen tuka hari ngalan, yiy ihohin, pwoke pe pwoke nopwaran ara atan, mepo iyau kili Yesu Kristus Yapan torou. Pe yiy ara lang kinsarayah mapu, yiy ara iripo. Pe andre kinto-kinto. Ndrokonan!