20
1 God inginkan tukapa ta ngaralk nuyu la iminy:
2 “Ngapi ta Nguken nuwurru God ta kurrunmalkpany jalaga tuka kutpaning Egypt tuka kurruntuwutakangung la kutjamangung mira.
3 Ngapiyu parang kutpalangali iwarruj ngartu la ja jara ja god naka makiny yunyi kuti iwarruj nuyu.
4 Yunyi kurrakula yurnu ta nuwurru wiyu ja kerra yurrng la wumarrk kerra la ja kerra tuka wupaj kanyu wumarrk tuka kunak, naka yunyi kurrakula yurnu.
5 Yunyi kutawarnukpun pu la kutangali iwarruj pu murnin ngapi ta Nguken nuwurru God ngangartjintun la ngalangalingur. Ngapi ngawunpanawun pata nganparnama la pata kamin wawupawu, arntulyak ta ngawunpanawun.
6 La ngapipa ngawunpanukiki ta ngawunmiyarma pata wigarra yirrk pata ngantumiyarma. Arntulyak mira ngawunpanukiki ta ngawunpamiyarma pata ngantumiyarma kamartukpun ngartu ta wulatpiyi.
7 Yunyi ngarrunparnangajpun ta ngangurlaj God warrwak la nungmurrunti kutpin murnin ngapi ta Nguken nuwurru God ngiwanawun ja arrarrkpi ta nungpakapa kimin.
8 Kurrungpurrun ta ngurrij ta kurrungaka wirrngak nungpakapa kurrungpanatpi ta wungurlyak.
9 Malany nuwurri kurrungatpi ta wurrkamaj yurnu la arakap ta ngurrij ta kutjama.
10 La ta arakap ta ngurrij naka kurrungpaka wirrngak la takapa ta ngapi ngartu ta Nguken nuwurru. Takapa ta ngurrij marrik muj ja kutjamang, nuyi la pata anpunmalkpangung, la pata kawuyama nuwurru arrarrkpi la warramumpik, la pata pulikang nuwurru, la pata tumariyirrk pata tuwulwarak pata kutpani, marrik muj ja kutjamang.
11 Nungpakapa kutpanamin murnin ngapi ta Nguken ngayamangung wurrkamaj yurnu la arakap ta ngurrij ngunguliny yurrng la wumarrk la kurrula nginguliny la ja ilinyjinyut imun nginguliny awk. La ta angmalkpanyka nungmatpa ngurrij ngungakangung wirrngak. Makiny la ngapi ta Nguken ngaminy takapa ta nungmalal ta ngurrij ta kurrungpaka ngurrij la kurrungpanatpi muj ta wungurlyak.
12 Kutpamartukpun pu pata kurruntumalkpangung la pata awalkpangung nuwurru nuyu ja kutpawarlkparrakanmin tuka kunak ta kurrunung ta Nguken nuwurru.
13 Yunyi kutpunpun iwularr pata wera pata arrarrkpi.
14 Yunyi kutpunma wumpulaj pata warramumpik pu pata wera pata arrarrkpi kapin warramumpik akutju yunyi kinyji wumpulaj arrarrkpi.
15 Yunyi kuti wumpulaj.
16 Yunyi kurrima lagarr nuyu numatpa arrarrkpi.
17 Yunyi kurrartayan pirij ta kurrampalk nuyu numatpa arrarrkpi la yunyi kurrinyayan pirij nuyu jita warramumpik la yunyi kutpunayan pirij pata kawuyama nuyu arrarrkpi la warramumpik la pulikang nuyu la purni nuyu la ja kunuka awk ja kinnyatpi awk yunyi kurrayan pirij nuyu.
18 Awaningan wigarra yirrk pata arrarrkpi awalyungan iwaning turuy la mata trumpet manginkangung awalyungan la angpayawng marrarawk iminy maru la mampayawng mata kungany mamajpungkinang tuka waryatparyat nakapa amurtpiny kirrk awulililmikpinang warak awulangaling.
19 Aminy nuyu Moses, “Nuyi wiyu kuwalakula ngarru la ngatpanalyu nuwu la God yunyi ngarrunilakajpun marnti ngatpajung.”
20 La Moses awunilakpany, “Yunyi kutpurtpin. God ilatpanka kiwnmakpenju nuwurru nuyu ja kurrungpawurrun kurriwamurtpa akut marrik kutpi ta nungmurrunti.”
21 Parangapa la awulangaling warak pata arrarrkpi la yanatju Moses imalkpany parak wanyji tuka kapin wungany wurlmutpurlmut kirrk tuka God ilangaling.