Exodus
19
God annyutpan wulatpiyi wu pata Israel arrarrkpi
17 Awaningan Moses awunimirtpujpany kirrk pata Israel arrarrkpi, awunimalkpanyka tuka kunak awaning nuyu ja awanartpanyjilin God. Malany awuranka amalkpany awulangaling tuka wunimi waryat ta wungurlaj Sinai.
18 La tukapa ta waryatparyat ta wungurlaj Sinai nakapa angalakpuyantiny kirrk kungany murnin ja Kiwken God ilatpanka algaj yungku mata malangung ilangaling tuka waryatparyat. La mata kungany malangaling kurr kapin kampuwarawn mata karrkpin mira kamalangali kurr manjat, la pata wigarra yirrk pata arrarrkpi awulililmikpinang mira.
19 La awalyungan mata trumpet manginkangung mira muj manginkangung mira ta karrkpin. Malany Moses inilakajpuning parak la yamin God inilakpangungka kapin marrarawk inginkangung.
20 Nungpakapa la ja Kiwken ilatpanka tuka waryat-paryat ta wungurlaj Sinai; yurrng tuka waryat-paryat ilangaling.
21 La ja Kiwken iminy nuyu Moses, “Ngawu, anngarukinaga yurrng.” La yarukiny parak ja Moses la ja Kiwken iminy nuyu, “Ankatpanyi warak anpuntangkatpanyi pata arrarrkpi marnti awingka awurlge-purulga tuka kapurntulku nganpayanyjing nakapa la amajung pata wigarra.
22 La puka pata kawuyama ngartu, ngapi ta Nguken, pata kamalkpa ngartu wanyji, wemin akutju, awangulinngulin kirrk angkanatpiyu ta wungurlyak marnti ngawunpu.”
23 La Moses iminy nuyu ja Kiwken, “Naka marrik kiki ami la awaruki tuka waryatparyat ta Sinai pata arrarrkpi la nuyi wiyu anminy ngarru ngarrapurntulkuny marrik muj nganti yaruki la ngarrungpanatpiyu nyunyuk ta waryat-paryat.”
24 Makiny la ja Kiwken iminy nuyu, “Anpalatpa warak kayirrk la kutpanarukinka nuyi la Aaron. La yunyi kawaga pata kawuyama ngartu la pata wigarra yirrk pata arrarrkpi nakapa yunyi kawurlgen-purulga tuka kapurntulku nganpuyarruga marnti ngawunpu.”
25 Pa Moses ilatpan parak tuka arrarrkpi awaning la annyunman kirrk pu ta iminy nuyu ja Kiwken.