20
Thi mil linꞌ
1 Xisa mbwiꞌn thi anj ndala lo beꞌ, nden lyab chanꞌ poz jwanꞌ naꞌngenta xanꞌ naꞌ nde kon thi kaden toz.
2 Anj ya mxen dragon, mbelꞌ ta nzola pol toza jwan' ndolegaꞌ maxuꞌ nde Xud yalkwinꞌ, nde mtobo anj maxuꞌ thi mil linꞌ.
3 Nde mblobi anj maxuꞌ lenꞌ poz jwanꞌ naꞌngenta xanꞌ naꞌ nde mtowꞌyo anj maxuꞌ nde mtob anj thi be' xis ney sa naꞌkwinꞌnotra maxuꞌ re ned yez axta kebeꞌ yaxob thi mil linꞌ. Senꞌ ngolo thi mil linꞌ ndablo xyak maxuꞌ sa ryo'te maxu' lud tyemp.
4 Xisa mbwiꞌn naꞌr yasil tenꞌ ndyob xaꞌ nyebe xaꞌ, nde lo re yasil ya ndob reta xaꞌ jwanꞌ mkayaꞌ yalnyebeꞌ sa nyaꞌb xaꞌ kwent. Nde nogaꞌ mbwiꞌn reta xbin re men jwanꞌ mpchoꞌ xaꞌ yek naꞌ tak mdej xaꞌ xkiꞌs Dios nde mdej xa' kwent chan' Jesus. Re xaꞌ ya namdoxubta xaꞌ lo maꞌ nathoz nya, neka lo mnab maꞌ nde neka mdaꞌ xaꞌ diꞌs mdob ben' maꞌ cholo xaꞌ o yaꞌ xaꞌ, mbro'xban xaꞌ nde mnabeꞌ xaꞌ thi mil linꞌ kon Crist.
5 Jwanꞌ reꞌ nak yalryoꞌxban ner. Per tedib ned re xaꞌ nguja, na'ryoꞌxbanta xaꞌ axta kebeꞌ yaxob thi mil linꞌ.
6 ¡Nabeꞌz toz nda re men jwanꞌ ryoꞌxban ner, re xa' ya nayon xa' lo Dios nde yalguj brop nalitra gan lo xaꞌ! Leꞌ xaꞌ ak nglweyꞌ Dios nde nglwey' Crist nde nyebeꞌ xaꞌ kon Crist thi mil linꞌ.
7 Senꞌ yaxob thi mil linꞌ, xyak maxuꞌ tenꞌ nzo nowꞌyo maxuꞌ,
8 nde ryoꞌte maxuꞌ sa yakwinꞌno maxuꞌ reta ned men nzo lo dib nax izyo. Nde yakwinꞌno maxuꞌ Gog nde Magog, sa thop xa' reta sondad xa' sa ke' xa' byo. Re sondad ya bro toz tir xaꞌ, xaja yux nzi ro nitta xaꞌ.
9 Nde dib nax izyo ryo' reta xa' nde dyop xa' dib nchek tenꞌ nzi re men nayon ngete lo Dios, men jwanꞌ nkeꞌ lazoꞌ Dios. Per Dios mtelꞌ bel mbroꞌ lo beꞌ jwan' thiptane mtolꞌ tir reta xaꞌ.
10 Nde mblobi anj maxuꞌ jwanꞌ ta mkwinꞌno reta mena tenꞌ nzi adiꞌ bel ndoyol kon azufre, tenꞌ nzola maꞌ nathoz nya kon profet kwinꞌ na. Nde tya rid xaꞌ pen, yalꞌ nde ndlyabe dib adiꞌ.
Dios nyaꞌb kwent tenꞌ ndob yasil nakis
11 Zyasa mbwiꞌn thi yasil ro toz nde nakis, tenꞌ ndyob xaꞌ nyebe xaꞌ nde mbwiꞌn Xaꞌ ndob lo neꞌy. Le' be' nde izyo mxonꞌ na lo Xaꞌ nde naꞌndlo'tray.
12 Xisa mbwiꞌn reta men nguj ndoli xaꞌ lo Dios, re xaꞌ ro nde re xaꞌ bix nde mxyalꞌ re libr, nde noga mxyalꞌ tedib libr, libr ya nak libr chanꞌ yalnaban. Nde mnaꞌb Dios kwent lo re xaꞌ nguja xata re jwanꞌ mbli xaꞌ ta xa ngeni lo re libr ya.
13 Nde nittoꞌ mdayaꞌ reta xaꞌ nguj jwanꞌ nzo lenꞌ ney, yalguj nde tenꞌ nzo re xaꞌ nguj mdaꞌyaꞌy reta xaꞌ nguj jwanꞌ nzo lenꞌ neꞌy, nde mnaꞌb Dios kwent lo thiba xaꞌ, xata nak reta jwanꞌ mbli xaꞌ.
14 Xisa yalguj nde tenꞌ nzo re men nguj mblobi xaꞌy tenꞌ nzi adiꞌ bel. Jwanꞌ reꞌ nak yalguj brop,
15 nde re xaꞌ jwanꞌ naꞌngazalta lenꞌ lo libr chanꞌ yalnaban, mblobi xaꞌ reta xaꞌ tenꞌ nzi adiꞌ bel.