19
Nchol' xaꞌ lo beꞌ
1 Sen' mne mbin na nde mbwiꞌn jwan' na, mbin na nkebi mbez men toz tir lo beꞌ, nde nchab xaꞌ:
¡Li naronꞌ Dios! Naro nak Dios na', Xaꞌ ntola' na', yalne nde yalnaro nak chan' Xa',
2 tak gal' nde naxut nyaꞌb Xa' kwent,
nde mblo Xaꞌ ngol jwanꞌ ntho lad naꞌ lo pen,
ngol jwanꞌ ntokan men dib izyo kon re yalxkap,
nde mnaꞌb Dios kwent lo yaꞌ ngol sa kix ngol jwan' mbli ngol ta nguj reta men nak moz Dios.
3 Nde bere mbrez re xaꞌ tedib gob:
—¡Li naronꞌ Dios! Dib adiꞌ thiblaꞌ tyob sen ndoyol yez ya.
4 Nde re galbthap xaꞌ gox nde re thap xbi naban, mdoxub axta mdinꞌ lo xaꞌ izyo nde mni xaꞌ diꞌs wen lo Dios jwanꞌ ndob lo yasil tenꞌ nyebeꞌ Xaꞌ, nde mbez re xaꞌ:
—¡Ta naka! ¡Li naronꞌ Dios!
5 Zyasa tenꞌ ndo yasil ya mbyen mni thi xaꞌ nde nchab xaꞌ:
—Nabe'z mni go' lo Dios naꞌ, reta goꞌ jwanꞌ ndli sinꞌ lo Xaꞌ, reta goꞌ jwanꞌ nseb lazonꞌ Xaꞌ, reta goꞌ men bix nde men gox.
Rsyeꞌ chanꞌ Yalselyaꞌ chanꞌ Mbakxilꞌ yenꞌ
6 Nde mbin na thi bi xaja bi mbez men toza, xaja ndyez yoꞌ nzo toz nita, nde ta xa ndyez mdiꞌ ba, mbeza nde nchaba:
¡Li naronꞌ Dios! Tak Xwan' na' Dios Xaꞌ ngeno dib yalnyebeꞌ, nyebeꞌ!
7 Lyen naꞌ nde nale toz ko lazonꞌ nde gab naꞌ naro nak Dios,
tak mzin wiz selyaꞌ Mbakxilꞌ yenꞌ, nde mza' ak salꞌ Xaꞌ ndokwaꞌla.
8 Nde mda' Dios di's ngok mza' lar nakis ntak toz, lar nambi tir nde anta ndlyabel nya.
(Le' lar nakis ntak toza nak reta jwanꞌ galꞌ ndli reta men nayon ngete lo Dios.)
9 Zyasa ne anj lon:
—Pkeꞌ jwanꞌ re lo yeꞌs: “Nabeꞌz nda reta men jwanꞌ mbrez Xaꞌ ya lo rzyeꞌ chanꞌ yaltselyaꞌ chanꞌ Mbakxilꞌ yenꞌ.”
Nde negaꞌ anj lon:
—Re diꞌs reꞌ nak diꞌs lipa chanꞌ Dios.
10 Zyasa mdoxub na lo anj, sa li naron le anj per anj ne lon:
—Naꞌtyoxubta la lon, ben'ta lo Dios ptoxub, tak nogaꞌ na nak moz lo Dios, ta xa nak lu nde reta wes la nde ptanꞌ la jwanꞌ ta thiblaꞌ ndo lo re jwanꞌ gal' mblo' Jesús.
Tak re jwanꞌ gal' mblo' Jesús, ndli sa nchal len' lazo' re xa' ndej xa' xkiꞌs Jesús.
Xaꞌ jwanꞌ ndob way nakis
11 Zyasa mbwiꞌn ndoxal' lo beꞌ nde mbroꞌto thi way nakis, nde xaꞌ ndob way ndole, Xaꞌ Tibla' ndo nde Xaꞌ Li, tak galꞌ nyaꞌb xa' kwent nde galꞌ ngyo xa'.
12 Ngud lo xaꞌ ndyob xni xaja bela , yek xaꞌ ndob naꞌr toz koron, nde lad xaꞌ nge thi le xaꞌ jwanꞌ ngencho nye, benꞌta xaꞌ mney.
13 Nok xaꞌ thi lar dib ndo ren nde le xaꞌ nak: XKIꞋS DIOS.
14 Nde xis xaꞌ ndenke reta sondad jwanꞌ nzo lo beꞌ, ndob way nakis nde reta xaꞌ nok lar ntak toz, lar nakis nde nambi.
15 Nde ro xaꞌ, ndryoꞌ thi espad nale toz, sa espad ya keꞌ xaꞌy cho reta ned men nzo lo izyo, nyebe' xa' kon thi yakos yiꞌb. Nde lo' xa' yalnayi' chan' Dios lo reta men nzo xis izyo, xaja men ntiꞌ ub kon ninꞌ, sa koꞌ xaꞌ xyan chanꞌ Dios jwanꞌ ngeno dib yalnyebeꞌ.
16 Nde lad xab xaꞌ nde lad xku xaꞌ nge thi le xa' jwan' nchab: “Xaꞌ nak Rey lo reta rey nde Xaꞌ Nyebeꞌ lo reta xaꞌ nyebeꞌ.”
17 Zyasa mbwiꞌn ti anj ndoli lo wiz, nde ne mbrez anj lo reta ma' jwanꞌ nxyobi lo beꞌ, nchab anj:
—Deꞌ goꞌ nde pkata goꞌ lo rzyeꞌ ro jwan' ta' Dios,
18 sa wa goꞌ belꞌ re rey, belꞌ re xaꞌ nyebeꞌ lo sondad, nde belꞌ reta men jwanꞌ ne lazonꞌ, belꞌ way nde belꞌ re xaꞌ ndob way, belꞌ reta men one cho men nak moza o men na'nakta moza, one cho men bixa o men roy.
19 Zyasa mbwiꞌn maꞌ nathoz nya kon reta rey lo izyo reꞌ kon reta sondad rey, mdyop xaꞌ sa yo xaꞌ kon Xaꞌ ta ndob way nakisa nde kon re sondad Xaꞌ.
20 Nde mxen Xaꞌ maꞌ nathoz nya ya kon profet kwinꞌ, jwanꞌ ta mbli re yalnaro lo maꞌ nathoza. Nde por re yalnaro ya mkwinꞌno xaꞌ re men jwanꞌ ta mdob ben' maꞌ nathoza lad naꞌ nde ta mdoxub lo mnab chanꞌ maꞌ. Nde tata naban ma' nathoza kon profet kwinꞌ na', mblobi Xaꞌ xa' kon ma' ya lenꞌ tenꞌ nzi adiꞌ bel ndoyol kon azufre.
21 Leꞌ temas xaꞌ ya, nguj kon espad jwanꞌ ta ndryoꞌ ro Xaꞌ ta ndob way ya nde reta ma' nxyobi ya mze lenꞌ ma' lo mda maꞌ belꞌ reta xaꞌ ya.