15
Re gaz anj jwanꞌ ndeno lulka re gaz yalti
1 Nde mbwiꞌn tedibaꞌ yalnaro ro jwan' nzoyen men mbro'to lo beꞌ: gaz anj jwanꞌ nden lulka re gaz yaltiꞌ, kon re gaz yalti re' mbyal re xyan nzo lazo' Dios.
2 Nde mbwiꞌga na thi jwanꞌ nya xaja nittoꞌ nde xaja nya bidr nos bel, nde xis jwan'na ndoli reta xaꞌ jwanꞌ mbli gan lo maꞌ ta nathoz nya ya, lo mnab maꞌ, lo ben' maꞌ nde lo numbr le maꞌ, nde reta xaꞌ ya nden arp jwanꞌ mdaꞌ Dios lo xaꞌ.
3 Nde ncholꞌ xaꞌ di chanꞌ Moises xaꞌ nak moz Dios nde di chanꞌ Mbakxilꞌ yenꞌ, jwanꞌ nchab:
Naro nde nzoyen men nak reta jwanꞌ ndlia,
Dios Xaꞌ Nyebeꞌ, Xaꞌ ngeno dib yalne,
Nali nde galꞌ nak reta jwan' ndlia,
Lu Dios jwanꞌ nyebeꞌ lo reta yez.
4 ¿Cho xaꞌ naꞌzyebta lu, Dios Xa' Nyebe'?
¿Cho xaꞌ naꞌlinaroda lea?
Tak benꞌta lu nak Xaꞌ Nayon
nde reta ned men nzo lo izyo yeꞌd xa' nde tyoxub xaꞌ loa,
tak mbwiꞌ xaꞌ reta jwanꞌ galꞌ ndlia.
5 Xis re jwanꞌ na, mbwiꞌn mxyalꞌ yodonꞌ Dios ndob lo beꞌ, tenꞌ nzosaꞌ re jwanꞌ nge ley chanꞌ Dios.
6 Nde lenꞌ yodoꞌ ya mbroꞌte re gaz anj jwanꞌ ndeno re gaz yalti. Re anj ya nok lar wen nambi tir anta ndlyabel nya nde nzo thi sinch or, ro lazoꞌ xaꞌ.
7 Zyasa le' thib xbi naban na mdaꞌ lo re gaz anj ya, thiba kop or, se nzo yalnayiꞌ chanꞌ Dios, Xaꞌ jwanꞌ naban adiꞌ.
8 Nde lenꞌ yodoꞌ mzey nzo sen jwanꞌ ndryoꞌ lo xni nde yalne chanꞌ Dios, nde ngen cho ligan yote tya axta kebeꞌ mne mbriꞌd re gaz yalti jwanꞌ ndeno re anj ya.