14
Di ncholꞌ re thib ayoꞌ nzo choꞌ pthap mil men
1 Xisa mbwiꞌn, leꞌ Mbakxilꞌ yenꞌ ndoli yek yiꞌ Sion nde nzino Xaꞌ thib ayoꞌ nzo choꞌ pthap mil men, nde cholo reta men ya nge le Mbakxil' yenꞌ nde le Xud Xaꞌ.
2 Nde mbin na ti bi lo beꞌ xajaꞌ ndyez bro toz nita, xaja ndyez thi mdiꞌ toza, nde xaja ndyez tenꞌ nzi bro toz men nzi ke' arp.
3 Nde ncholꞌ xaꞌ thi di kub ngoꞌ tenꞌ ndob Dios, tenꞌ nzi re thap xbi naban nde tenꞌ nzi re xaꞌ gox. Nde ngen cho li gan teꞌd di ya, benꞌta re thib ayoꞌ nzo choꞌ pthap mil men jwanꞌ mxi' Jesuscrist xij re men lo izyo mbli gan mte'da.
4 Re xaꞌ re' mkenap lazoꞌ xaꞌ, nangoxnod xaꞌ ngol, nambi tir xaꞌ nde ngetenke xaꞌ xis Mbak Xilꞌ yen' ploja nda Mbakxilꞌ. Xaꞌ ya mxi' Dios xij re men lo izyo xaja' nak jwan' yon ner ta nda' men lo Dios, nde xa' nak par Dios nde par Mbakxilꞌ yenꞌ Dios.
5 Nek thib di's kwinꞌ nambroꞌd ro xaꞌ, nambi tir ndo xaꞌ lo Dios.
Jwanꞌ nchab re yon anj
6 Tagaꞌ mbwiꞌn tedib anj ndoxobi rol beꞌ, anj ya ndeno diꞌs kub chanꞌ Jesucrist jwan' na'luxta, sa tej anja lo reta men jwanꞌ nzo lo izyo, lo re ned yez, lo re ned bin men, lo re ned men ni xaꞌxaꞌ diꞌs nde lo re xa'xa' reta ned men.
7 Nde ne mbez anj:
—Pseb lazoꞌ goꞌ Dios, nde bli naro goꞌ le Xaꞌ, tak se mzin hor nyaꞌb Xaꞌ kwent lo reta men. Ptoxub goꞌ lo Xaꞌ jwanꞌ mdoxkwaꞌ beꞌ nde izyo, Xaꞌ mdoxkwaꞌ nittoꞌ nde reta tenꞌ ndobyalꞌ nit.
8 Xis anj ya ndanke tedib anj nde nega' mbrez anj:
—Se mblux yez ro, yez Babilonia, mbluxa tak mtokil' la reta ned men nzo lo izyo, sa mbli men reta ned yalxkap xaja nak men ngu' nit xtusa.
9 Xis rop anj ya ndenke tedib anj, nde ne toz mbez anj:
—Tez cho xaꞌ tyoxub lo maꞌ nathoz nya nde lo mnab chanꞌ maꞌ nde taꞌ xaꞌ diꞌs ke benꞌ maꞌ cholo xaꞌ o yaꞌ xaꞌ,
10 le' re xa' ya ridka yalti toz lo yaꞌ Dios, nathoz toz tyak xa' lo xyan nzo len' kop jwan' nak yalnayi' chan' Dios, rid xaꞌ yalti kon bel nde azufre lo re anj nayon chanꞌ Dios nde lo Mbak Xilꞌ yen' chan' Dios.
11 Nde thiblaꞌ ndob sen tenꞌ nzo xaꞌ lo pen adiꞌ , nekla yalꞌ nde nekla ndlyabe na'ryoxkwenta xaꞌ lo pen, re xaꞌ ta mdoxub lo maꞌ nathoz nya nde lo mnab maꞌ o xa' mdob beꞌ nge le maꞌ lad naꞌ ya.
12 Jwan' nasa nche' ndlo' xa xek re men nayon ngete lo Dios, re xaꞌ jwanꞌ nxoꞌbyek re yalnyebe' chanꞌ Dios nde re xaꞌ ndli lazonꞌ Jesús.
13 Zyasa mbin na thi bi mbroꞌ lo beꞌ nde ney lon:
—Pkeꞌ jwanꞌ reꞌ lo ye's: “Xata naya nabeꞌz nda re men jwanꞌ gaj, men jwan' ndli lazon' Dios.” Ta naka, nchab Mbi Nayon, ryoꞌxkwen xaꞌ lo reta rsinꞌ xaꞌ, tak reta jwan' wen mbli xaꞌ tibla' ndonoy xa'.
Dyop jwan' ngok izyo
14 Zyasa mblit na lon nde mbwiꞌn thi xkow nakis lo beꞌ, nde xis xkowa ndob thi xaꞌ nya xaja nya Xinꞌ Mbiꞌ. Ndob thi koron or yek xaꞌ, nde nden xaꞌ thi yi'b nale ndyop kosech.
15 Nde lenꞌ yodoꞌ mbroꞌ tedib anj nde ne mbrez ánj ya lo Xaꞌ jwanꞌ ndob xis xkowa:
—Bxen yi'b nalen la nde bthop trig jwanꞌ ngok lo izyo, tak ngola beꞌy nde ngolay.
16 Zyasa Xaꞌ ta ndob xis xkowa mxen Xaꞌ yi'b nale nde mblit Xaꞌ reta trig jwan' ngok lo izyo.
17 Xisa mbroꞌ tedibaꞌ anj lenꞌ yodoꞌ jwanꞌ ndob lo beꞌ taga' ndena' thi yi'b nale.
18 Nde ten' ndob altar mbroꞌ tediba anj jwan' nyebeꞌ lo bel nde ne mbrez anj lo anj jwanꞌ ta nden yi'b nale ya nde nchab anj:
—Bxen yi'b nale nden la nde pchoꞌ re rayex ub jwanꞌ nzo lo izyo, tak nguy ley.
19 Nde anj ya mxen yi'b nalen naꞌ nde mchoꞌ anj reta ub jwanꞌ ndo lo izyo nde mblo anja lenꞌ thi jwanꞌ ro ten' nzo xyan chan' Dios sa tya tiꞌy.
20 Nde mtiꞌ xaꞌ ub lad le ro yez, nde tenꞌ mtiꞌ xaꞌ ub tya mbroꞌ ren, nde ren jwanꞌ mbroꞌ tya ngwapa xaja ndab gap ro waya nde mxyoy mzina axta son ayoꞌ kilometro.