9
Jwan' li re thib sen xinꞌteꞌd Jesus
(Mt. 10:5-15; Mr. 6:7-13)
1 Zyasa mthop Jesus re thib sen xin'te'd Jesus, nde mdaꞌ Jesus yalne nde yalnyebeꞌ lo re xa' sa koꞌte xaꞌ re ned mbi narax nzo lazo' men nde sa todanꞌ xaꞌ re men nayis.
2 Nde mtelꞌ Jesus xaꞌ sa yatej xaꞌ di's wen chanꞌ Dios nde ya todanꞌ xaꞌ re men nayiz.
3 Nde nchab Jesus lo xaꞌ:
—Nawed go' nek thib jwan' nakin' go' ned, nawed go' yaga, neka bols, neka jwan' wa go', neka tmiꞌ, neka chop ned lar.
4 Nde one cho yo sin go', tyata byan' goꞌ axta senꞌ ryoꞌte goꞌ yez ya.
5 Nde yez jwanꞌ naꞌtad ten' kwed goꞌ, broꞌte goꞌ tya nde bzib goꞌ yothiꞌ ni goꞌ, sa nye xaꞌ ke narax mbli xaꞌ.
6 Zyasa mbroꞌ re xaꞌ, nde nda xaꞌ reta yez, nda tej xaꞌ diꞌs wen chanꞌ Dios nde nda todanꞌ xaꞌ re men yis.
Herodes nchola's nye nyen' cho nak Jesus
7 Senꞌ mbin rey Herodes reta jwanꞌ ndli Jesus, anaꞌnye xaꞌ kwan li xaꞌ, tak cho men mbez mbroꞌxban Juan.
8 Nde cho men mbez Elias mbroꞌto nde cho men mbez nzo cho thi profet ngo pola, mbro'xban.
9 Per Herodes nchab:
—Leꞌga na mnibeꞌ mchoꞌ yek Juan. ¿Choga xaꞌ taja nchona ndej mena?
Jwanꞌ nasa ncholaꞌs Herodes wiꞌ xa' Jesus.
Jesus mdaꞌ jwanꞌ mda gayꞌ mil men
10 Senꞌ mbere re apost Jesus, mdej xaꞌ reta jwanꞌ mbli xaꞌ lo Jesus. Zyasa xaꞌta mbeꞌ Jesus xaꞌ thi tenꞌ nagan lad yez Betsaida.
11 Per senꞌ mne re mena, mdoke xaꞌ xis Jesus, nde ndyen Jesus mbwi' Jesus xa'. Mbloꞌ Jesus xkiꞌs Dios lo xaꞌ nde mtodanꞌ Jesus re men nayiz.
12 Nde senꞌ ndozyela izyo, mbike re thib sen xin'te'd Jesus lo Jesus, nde nchab xaꞌ lo Jesus:
—Gus lo re men sa ya xaꞌ re yez bix, nde re ranch nzi gax re' sa kwanꞌ xaꞌ tenꞌ ryoꞌxkwen xaꞌ nde kwanꞌ xaꞌ jwanꞌ wa xaꞌ, tak ncheꞌya ngen kwan nak.
13 Zyasa nchab Jesus lo xaꞌ:
—Pta' goꞌ jwanꞌ wa xaꞌ.
Le' re xa' mkab:
—Ngenta kwan nak benꞌta gayꞌ pan nde chop mbel ngeno náꞌ, o ¿nakinꞌ yatiꞌ náꞌ jwanꞌ wa re men toz re?
14 Nde lo re xaꞌ biꞌ, mer ti gayꞌ milka xaꞌ. Zyasa Jesus nchab lo re xin'te'd Xa':
—Gus go lo re men, sa tyob xaꞌ por choꞌpsiga xaꞌ.
15 Nde tamod mbli re xin'te'd Jesus, mdob xa' reta men.
16 Nde mxen Jesus re gayꞌ pan nde rop mbel, mbwiꞌ Xa' lo beꞌ, mdaꞌ Xa' dyux lo Dios, mblirol Xa'y nde mdaꞌ Xa'y lo re xinꞌteꞌd Xa', sa kiꞌd xin'te'd Xaꞌy lo reta men.
17 Reta men mda axta ploja mze lenꞌ xaꞌ, ngolo mda xa', re xin'te'd Jesus mthop xaꞌ thib sen chokwid jwanꞌ mbroꞌxob.
Pedr mdej Jesus nak Xaꞌ mtelꞌ Dios
18 Thib wiz senꞌ xaꞌta nge todi'sno Jesus Dios, nde no re xin'te'd Xa' nzi tya, zyasa mnabdiꞌs Xa' lo re xin'te'd Xa' nchab Xa':
—¿Cho xa' nak na mbez men?
19 Le' re xa' mkab:
—Pla xaꞌ mbez lu nak Juan jwan' ngole men, pla xaꞌ mbez lu nak Elias, nde pla xaꞌ mbez lu nak thi profet ngo pola nde mbroꞌxban.
20 Zyasa nchab Jesus:
—Mbay goꞌ, ¿Cho na, ndyak go'?
Le' Pedr mkab:
—Lu nak Crist, Xa' jwan' mtelꞌ Dios.
Jesus ndej le' Xa' gaj
21 Per Jesus mnibe' lo re xin'te'd Xa', sa ngen cho lo gab xaꞌ jwanꞌ reꞌ,
22 nde nchab Xa' lo xaꞌ:
—Le' Xin' Mbi', nakinꞌ ridndaꞌb bro toz yalti nde reta men kotal men Xa', re xaꞌ gox jwanꞌ nyebeꞌ nde re nglweyꞌ jwanꞌ nyebeꞌ, nde re maestr nchak ley, kuj xaꞌ Xa', per yaxob son wiz ryoꞌxban Xa'.
23 Nde nchab Jesus lo reta xaꞌ:
—Tez cho goꞌ, nchola's tyonke xis na, bkalo go' lo re jwan' ndyen goꞌ li goꞌ, bta'ya' lazo' go' rid go' pen reta wiz xaja men ne' kruza nde ptonke goꞌ xis na.
24 Tak re xaꞌ ngenap lazon', xaꞌ ya che' ta'b xa' yalnaban xa', le' re xa' ta'ya' lazon' kwent chan' na, xaꞌ ya ligan yalnaban.
25 ¿Tak cho sinꞌ liy lo thi men, li men gan reta jwanꞌ lo izyo reꞌ, tez leꞌga leꞌ men ndyab men nde nge tolux men lazoꞌ men?
26 Tak tez cho goꞌ ndyolaꞌs kwent chan' na nde kwent chan' xki's na, noga Xin' Mbi' tyola's Xa' nye Xaꞌ go', senꞌ ye'd Xa' kon yalne chanꞌ Xa', kon yalne chan' Xud Xa', nde kon yalne chan' re anj nayon.
27 Nde lipa nin lo goꞌ, nzo pla men jwanꞌ nzi ncheꞌ ya, nagajta xaꞌ axta kebe' wiꞌ xaꞌ xamod nak tenꞌ nyebeꞌ Dios.
Mzyeꞌ nya Jesus
28 Senꞌ ngok xonka wiz nchab Jesus jwanꞌ reꞌ, ngwa Jesus thi yek yiꞌ, sa todiꞌsno Jesus Dios, nde mbeꞌ Jesus Pedr, Juan nde Jakob.
29 Nde laj ndotodiꞌsno Jesus Dios, mzyeꞌ nya lo Jesus, nde xab Jesus anta nakis tir ngok nde anta ndlyabel nyay.
30 Nde mbroꞌto chop xaꞌ bi' ndotodiꞌsno xa' Jesus, rop xaꞌ ya nak Moises nde Elias,
31 mzalꞌ xni ndlyabel xaꞌ, nde mdodiꞌs xaꞌ kwent chan' yalguj jwanꞌ nakla rid Jesus yez Jerusalen.
32 Nde Pedr, Juan nde Jakob, jwanꞌ toz ncho mkalꞌ lo xaꞌ, per mbrena xaꞌ, mbwiꞌ xaꞌ xni ndlyabel chanꞌ Jesus nde xni chan' rop xaꞌ jwanꞌ nzino Jesus.
33 Nde laj ndya rop xaꞌ ya, Pedr nchab lo Jesus:
—Maestr, ¡Wenka nzi náꞌ ncheꞌya! Sa toxkwaꞌ náꞌ son ramad; thiba kaa, thiba ka Moises nde thiba ka Elias.
Per Pedr naꞌnyeda kwan li ta nchab Pedr.
34 Nde laj ndotodiꞌs Pedr, mbla thi xkow mkot reta xaꞌ, nde laj nzo xaꞌ lenꞌ xkow, mzyeb xaꞌ.
35 Nde lenꞌ xkowa mbyen thi diꞌs nchab:
—Xaꞌ reꞌ nak xinꞌ na, Xaꞌ jwanꞌ nkeꞌ toz lazo'n, bxoꞌbyek goꞌ Xaꞌ.
36 Senꞌ mne mbyen diꞌs ya, thib Jesus ndo. Nde ngen cho lo mdej xa' jwan' mbwi' xa' dib tyemp mkete Jesus lo izyo.
Jesus ntodan' thi mbyo nzo mbi narax nzo lazon'
37 Nde tedib wiz, senꞌ mbere xaꞌ yek yiꞌ, bro toz men mbyeꞌd wiꞌ lo Jesus.
38 Xij re men ya nzo ti xaꞌ biꞌ, ne mbres:
—Maestr, nyaꞌb na loa, bwiꞌ xinꞌ na, tak thib nyar ngenon,
39 nde thi mbi narax ndyen or, ndliy mbezyaj or, ngobiy or izyo, nde ndryoꞌ psinꞌ ro or, ntotiy or nde naꞌlaꞌdey or.
40 Mna'bla na lo re xin'te'd la sa koꞌte xaꞌ mbi narax nzo or, per naꞌndlid xaꞌ gan ndroꞌtey.
41 Jesus mkab nchab:
—¡Goꞌ nak tib ned men nandlid lazon' Dios nde men xkap nak goꞌ! ¿Axta plopa nakinꞌ ketenon goꞌ, nde xek na goꞌ? Deꞌno xinꞌ la ncheꞌ ya.
42 Laj ndo bike mbyo gax lo Jesus, mbli mbi narax ngobi mbyo izyo nde mtotiy mbyo; per Jesus mbrezno mbi naraxa, mtodanꞌ Jesus mbyo nde mda'ya' Jesus mbyo lo xud mbyo.
43 Nde reta men nzoyen xa', mbwiꞌ xa' yalnaro chanꞌ Dios.
Jesus ndej tedib gob le' Xa' gaj
Laj nzoyen re men re jwan' ndli Jesus, Jesus nchab lo re xin'te'd Xaꞌ:
44 —Jwin bin goꞌ jwanꞌ reꞌ nde naꞌyajtey yek goꞌ: Le' Xin' Mbi' tayaꞌ xa' Xa' lo re men sa kuj men Xa'.
45 Per naꞌngyenta xaꞌ jwanꞌ nchab Jesus lo xaꞌ, tak teraꞌ taꞌ Dios lo xaꞌ, sa yen xaꞌy; nde nzyeb xaꞌ nyaꞌbdiꞌs xaꞌ kwan ta nchab Jesusa lo xaꞌ.
¿Choꞌ xa' mas ntak?
46 Zyasa re xin'te'd Jesus tolo mbez xaꞌ lo ta xaꞌ nyen' cho xa' mas ntak xij xaꞌ,
47 per Jesus mnela cho xgab ndli xaꞌ. Zyasa mto Jesus thi or lud lo Jesus,
48 nde nchab Jesus lo xaꞌ:
—Cho xaꞌ wen ngwi' or lud reꞌ por len, xa' ya wen ngwi' xaꞌ na, nde xa' wen ngwi' na, xaꞌ ya wen ngwi' Xaꞌ jwanꞌ mtelꞌ na. Tak xaꞌ jwanꞌ mas lud ntak xij goꞌ, xaꞌ ya nak xa' mas ntak.
Xaꞌ nanixinta xis Jesus kon Jesus ndo xaꞌ
49 Zyasa nchab Juan lo Jesus:
—Maestr, mbwiꞌ náꞌ thi xaꞌ kon lea ngego'te mbi narax nzo lazo' men nde mka náꞌ di's li xaꞌy, tak nangeted xaꞌ kon naꞌ.
50 Jesus nchab lo xaꞌ:
—Naꞌkad goꞌ diꞌs li xaꞌy. Tak xaꞌ nanaraxta nye naꞌ, kon naꞌ ndo xaꞌ.
Jesus mtokox Jakob nde Juan
51 Senꞌ ndosin gaxla wiz ndya Jesus lo beꞌ, mtoli xgab Xa' ya Xa' Jerusalen.
52 Mtelꞌ Xa' pla xaꞌ ndasiblo, sa ya kwan' xaꞌ yo tenꞌ kwed Jesus yez jwanꞌ nax lo xyon Samaria;
53 per re xaꞌ yez Samaria naꞌndaꞌd xaꞌ tenꞌ kwed Jesus, tak mne xaꞌ leꞌ Jesus nda Jerusalen.
54 Lo mne rop xa' nak xin'te'd Jesus Jakob kon Juan jwan' na, nchab xa' lo Jesus:
—Xaꞌ nyebeꞌ, ¿Cho ncholaꞌs la nyaꞌb náꞌ, ryoꞌ ki lo beꞌ sa luxa reta xaꞌ, xa mbli profet Elias?
55 Per Jesus mbyek mbwiꞌ lo xaꞌ nde mtokox Jesus xaꞌ:
—Goꞌ ba naꞌnyed go' cho men nak goꞌ.
56 Leꞌ Xin' Mbiꞌ nandeda sa lux Xaꞌ xbin men, leꞌ Xaꞌ nde sa tolaꞌ Xaꞌy.
Nde nda re xaꞌ tediba yez.
Xaꞌ jwanꞌ nchola's tyonke xis Jesus
57 Laj ndo xaꞌ ned, thi xaꞌ biꞌ nchab lo Jesus:
—Xaꞌ Nyebeꞌ, na tonkyeꞌn xis la a ploja ndaa.
58 Jesus mkab lo xaꞌ nchab:
—Re mbeꞌd ngeno maꞌ len' ke tenꞌ ncho maꞌ nde re mbin ngeno maꞌ lye'd maꞌ, per Xin' Mbiꞌ na'ngenod Xa' liz Xa'.
59 Nde nchab Jesus lo tedib xaꞌ:
—Ptonke xis na.
Per xaꞌ ya mkab:
—Xaꞌ Nyebeꞌ, nerla pta' di's ngolo mkas na xud na.
60 Jesus mkab nchab lo xaꞌ:
—Blaꞌ re xaꞌ nguja, ka's xa' tha'bol xa', le' lu wa tej xkiꞌs Dios lo re men.
61 Nde tediba' xaꞌ nchab lo Jesus:
—Xaꞌ Nyebeꞌ, na tyonkeꞌ xis la, per ptaꞌ diꞌs nerla nda tne ney lo re xaꞌ liz na.
62 Jesus nchab lo xaꞌ:
—Thi men jwan' ngele yogon nde ngwi' xa' a lad xis xa', nalid sin' xa' ten' nyebe' Dios.