10
Jesus mtelꞌ son gal nzo ziꞌ men
1 Lo senꞌ mne jwanꞌ reꞌ, Jesus mblí tedib son gal nzo siꞌ xaꞌ, jwan' mtelꞌ Jesus chop chopa xaꞌ, sa kwiblo xaꞌ lo Jesus, ya xaꞌ reta yez nde reta tenꞌ nkelo Jesus ya Jesus.
2 Nde nchab Jesus lo xa':
—Gal' di's nin lo goꞌ, bro toz jwan' ngok, per lud xaꞌ nge sinꞌ lo neꞌy. Jwanꞌ nasa mna'b goꞌ lo xaꞌ nak xwanꞌ neꞌy sa telꞌ xaꞌ masra' men ke sin' lo jwan' ngok.
3 Naya wa goꞌ, nde bwiꞌ goꞌ nea, na ngetelꞌ goꞌ xaja mbakxilꞌ yenꞌ xij mbak be.
4 Nde naꞌwed goꞌ bed, naꞌwed goꞌ tmi, naꞌwed goꞌ tedib ned yayid goꞌ, nde naꞌyatod goꞌ todiꞌsno goꞌ men zyalꞌ goꞌ ned.
5 Senꞌ sin go' thi liz men, nerla mni goꞌ dyux lo xaꞌ, gus goꞌ: "Yalnabe'z chan' Dios xyo'b xis re men liz go'."
6 Nde tez yo ya nzo xaꞌ nabeꞌz nak, yalnabe'z ta ndano go' ya yanꞌ na lo xaꞌ, per tez nanabeꞌzta nak xaꞌ, bere yalnabe'z go' lo go'.
7 Nde byanꞌ goꞌ yo ya, wa goꞌ nde gu goꞌ jwanꞌ kwek xaꞌ lo goꞌ, tak xaꞌ nke sinꞌ ndablo yax ka xaꞌ. Nde na'yanta goꞌ xa'xa' liz men.
8 Senꞌ sin goꞌ thi yez tenꞌ wen nak xaꞌ lo goꞌ, bda goꞌ jwanꞌ kwek xaꞌ lo goꞌ.
9 Btodanꞌ goꞌ re men nayiz nzo yez ya nde gus goꞌ lo xaꞌ: "Le' yalnyebe' chan' Dios ndo sin gaxla lo goꞌ."
10 Per tez sin goꞌ thi yez tenꞌ na'tonzad xa' go', broꞌte goꞌ re ro ned ro nde gus goꞌ:
11 "Axta re yothi' yez goꞌ, jwanꞌ mke lad ni náꞌ, zib náꞌy sa go'jka mne, per wi' go' nea, leꞌ yalnyebeꞌ chanꞌ Dios mzin gaxla lo goꞌ."
12 Lipa' nin lo goꞌ senꞌ sin wiz nyaꞌb Dios kwent lo men, zyasa mas naro yalti par re xaꞌ yez reꞌ, ke par re xaꞌ yez Sodoma.
Jwanꞌ yate re yez nandla'd jwanꞌ narax
13 Nde nchab Jesus:
—¡Nalat toz yate goꞌ men yez Corazin! ¡Nalat toz yate goꞌ men yez Betsaida! Tak tez lo yez Tiro nde lo yez Sidon ngak re yalnaro ta ngok xij go' re', ne' pola ndlaꞌ xaꞌ jwanꞌ narax ndli xaꞌ nde ngok xaꞌ lar nabaꞌd nde ndob xaꞌ lo di lo ki sa loꞌ mzyeꞌ xgab xaꞌ lo Dios.
14 Jwanꞌ na senꞌ sin wiz nyaꞌb Dios kwent lo re men, mas naro toz nak yalti rid re goꞌ, ke re yalti rid re xaꞌ yez Tiro nde re xaꞌ yez Sidon.
15 Nde goꞌ men yez Capernaum, ¿Cho ndyak goꞌ na axta lo beꞌ xap Dios goꞌ? ¡Nakte, le' goꞌ yatu axta lo bel adi'!
16 Xaꞌ ntobnza xki's go', xaꞌ ya ntobnza xkiꞌs na nde xaꞌ jwan' ngotal go', xa' ya ngotal na nde ngotal xaꞌ Xaꞌ mtelꞌ na.
Mbere re son gal nzo siꞌ xaꞌ ta mtelꞌ Jesus
17 Senꞌ mbere re son gal nzo siꞌ xaꞌ jwanꞌ mtelꞌ Jesus, nale toz nzo lazoꞌ xaꞌ nchab xaꞌ:
—Xaꞌ Nyebeꞌ, axta re mbi narax nxobyeka ná' lo ndej ná' lea.
18 Jesus nchab lo xaꞌ:
—Mbwiꞌn maxuꞌ ngob lo beꞌ xaja thi mdi'ba.
19 Nde na ta yalne lo goꞌ sa tyobni goꞌ xis mbelꞌ nde xis mxub, nde xis re yalne chanꞌ re mbi narax, nde ngen kwan linoy goꞌ.
20 Per naꞌkonaled lazoꞌ goꞌ kwent nxoꞌbyek re mbi narax goꞌ, cheꞌla blo nale lazoꞌ goꞌ tak nzola le goꞌ lo beꞌ.
Nale nzo lazoꞌ Jesus
21 Zyasa hor yaga Mbi Nayon mbli ngo nale lazoꞌ Jesús, nde nchab Jesús:
—Tan dyux loa, Xud na, lu jwanꞌ nyebeꞌ lo beꞌ nde lo izyo, tak mkaꞌs la jwanꞌ reꞌ lo re xaꞌ nchak nde lo re xaꞌ nchen, nde mbloꞌ lay lo re xaꞌ nak xaja or bix, tamod mbli lay Xud na, tak ta ncholaꞌs la aka.
22 Tak Xud na mdaꞌ reta jwan' lon. Ngen cho nzolo cho nak Xin' Xa', benꞌta Xud Xa' mney, nde ngen cho nzolo cho nak Xud Xa', benꞌta Xin' Xa' mney, nde Xin' Xa' teja lo men jwanꞌ nchola's Xin' Xa' tej Xa'y.
23 Zyasa xata nchab Jesus lo re xin'te'd xaꞌ:
—Nabe'z toz nda re men jwan' ngwi' re jwan' ngwi' go',
24 tak lipa nin lo goꞌ, naꞌr toz profet nde nar toz xaꞌ ngok rey mda'bla's xaꞌ ngwiꞌ xaꞌ reta jwanꞌ ta ndowiꞌ goꞌ nde nangwiꞌd xaꞌy, mda'bla's xaꞌ ngon xaꞌ reta jwanꞌ ta nchon goꞌ, nde naꞌngonta xaꞌy.
Thi xaꞌ yez Samaria wen toz nak
25 Zyasa thi maestr nchak ley xkiꞌs Dios, ngwa lo Jesus, nde mnabdiꞌs xaꞌ, sa libe' xaꞌ Jesus, nchab xaꞌ:
—Maestr, ¿kwan ndablo lin sa kenon yalnaban adiꞌ?
26 Jesus mkab lo xaꞌ:
—¿Cho kwan ngeni ley chan' Moises? ¿Cho kwan ndlab la?
27 Zyasa leꞌ maestr nchak ley xkis Dios mkab:
—"Bkeꞌ lazoꞌa Dios Xa' Nyebeꞌ loa dib nzo lazoꞌa, kon dib yalnaban chanꞌ la, kon dib yalne chanꞌ la, nde kon dib xgab la, nde bkeꞌ lazoa ta men la xajka nkeꞌ lazoꞌa leꞌga lu."
28 Leꞌ Jesus nchab lo xaꞌ:
—Wen mkab la, bli re jwanꞌ reꞌ, kenoa yalnaban adiꞌ.
29 Per maestr nchak ley xkiꞌs Dios, ndyak xa' galꞌ ndo xa' nde nchab xa' lo Jesus:
—¿Cho nak ta men na sa?
30 Zyasa nchab Jesus:
—Thi mbiꞌ mbroꞌ yez Jerusalen ndala nda yez Jerico, nde mbroꞌ pla wanꞌ lo xaꞌ ned, mkib wanꞌ reta chanꞌ xa', axta xab xa' mkib wan', mdin wan' xaꞌ, tawen xa' xajaꞌ men nguja xa' mbla' wan' xa' nde nda re wan'.
31 Nde leꞌga ned ya ndarid thi nglweyꞌ, senꞌ mbwiꞌ nglweyꞌ nax xaꞌ ya tya, che' mbri'd nglweyꞌ tedib lad ro ned nde nda nglwey'.
32 Nde ned yaga' mbriꞌdndab tiba xaꞌ nak nak sin' lo yodo', nde senꞌ mbwiꞌ xaꞌ nax xaꞌ ya, taga' benꞌta mbwiꞌ xaꞌ lo xaꞌ che' mbyek xa' thib lad ro ned nde nda xaꞌ.
33 Per thi xaꞌ yez Samaria ndarid ned yaga' nde senꞌ mbwiꞌ xaꞌ nax mbi' ya, mblat lazoꞌ xaꞌ xaꞌ.
34 Mbike xaꞌ gax lo mbi', nde mtombi xaꞌ lad mbi', mblo xa' aseyt kon bina. Nde mchal xaꞌ lar lad mbi' tenꞌ nawiꞌ ya, zyaga mxap xaꞌ mbi' xis bur xaꞌ nde mbeꞌ xaꞌ xaꞌ thi yo tenꞌ mbed men nde mkenap xaꞌ xaꞌ.
35 Tedib wiz senꞌ mbroꞌ xaꞌ nda xaꞌ, mdaꞌ xaꞌ chop tmi plata lo xaꞌ nak xwanꞌ yo nde nchab xaꞌ: "Bkenap mbiꞌ reꞌ, nde tez masra' mbro'to jwan' mbli goꞌ, na yixa lo goꞌ senꞌ beren."
36 Zyasa nchab Jesus lo maestr nchak ley:
—¿Xa nya re yon xaꞌ reꞌ ngok ta men xaꞌ, tá mbro' wan' lon' ya?
37 Zyasa maestr nchak ley nchab:
—Xaꞌ jwanꞌ mblat lazonꞌ mbi' ya.
Jesus nchab lo xaꞌ:
—Bya nde tagaꞌ bli.
Jesus ngwa tna Mart nde Mari
38 Laja ndo Jesus ned, mzin Jesus thi yez lud, tya nzo thi ngol ndole Mart, ngol ya mdaꞌ liz naꞌ mbled Jesus.
39 Nde Mart ngeno thi bel naꞌ ndole Mari, nde Mari mdob lo Jesus ndoyon reta jwanꞌ ndej Jesus.
40 Per Mart, mas mbix rsin' naꞌ, zyasa nchab Mart lo Jesus:
—Xaꞌ Nyebeꞌ, ¿Cho nandlit la xgab ta mbla' bel na na thib na lo sinꞌ? Gus lo xa' sa ta' ya' xa' lon.
41 Per Jesus mkab:
—Sib la Mart, jwanꞌ toz ndlia xgab nde mbix la rsinꞌ la,
42 per nzo thita jwanꞌ mas nakinꞌ nde Mari mblí jwanꞌ na, nde ngen cho kiba lo xa'.