9
1 Mbay le' re gon ta ndyop kayaꞌ re men nayon chanꞌ Dios, naꞌnakinꞌtra' keꞌn jwanꞌ reꞌ lo goꞌ,
2 tak nzoloa na wen nak xgab goꞌ. Jwanꞌ nasa nale toz nzo lazoꞌn mdej na goꞌ lo re wes nzi lo xyon Macedon, nchab na, leꞌ re wes nzi lo xyon Akaya axta linꞌ mbriꞌda nzisaꞌla xa'. Senꞌ mbin reta xaꞌ jwanꞌ reꞌ, mdob nale lazoꞌ xaꞌ taxa li xaꞌ.
3 Jwan' nasa mtel na re wes re' lo goꞌ, sa naꞌakte benꞌ diꞌs re jwanꞌ wen ta mni náꞌ xis goꞌ. Nde jwanꞌ xa niga na, thibla' ptosaꞌ goꞌ,
4 tak yoloa tyonke pla wes Macedon xis na nde yosiꞌb xaꞌ goꞌ nandosaꞌd goꞌ. Jwanꞌ na li ryoꞌyantho náꞌ lo mdob toz náꞌ xgab náꞌ kon goꞌ, nde naꞌngetejta na yantho jwanꞌ ryoꞌ goꞌ.
5 Jwanꞌ nasa mnaꞌb toz na lo re yon wes sa nerla yatwiꞌ xaꞌ nyenꞌ xa nzi goꞌ, nde laꞌsto xaꞌ goꞌ sa yolo dyop gon jwanꞌ mkeꞌyek goꞌ zyaya. Nde gon ta nzisaꞌla taꞌ goꞌ aka dib nzo lazoꞌ goꞌ, naꞌakte jwanꞌ ngenabeꞌ náꞌ lo goꞌ.
6 Ptelaꞌs goꞌ jwanꞌ reꞌ: Men jwanꞌ ngo lud bin, tagaꞌ lud jwanꞌ thop xaꞌ; leꞌ men ngo bro bin, tagaꞌ bro jwanꞌ thop xaꞌ.
7 Thib thiba goꞌ, ptaꞌ goꞌ jwanꞌ xa nziꞌb lazoꞌ goꞌ; na'konabilta lazo' go' ta' go'y, nekla tak mbez men taꞌ goꞌy, tak Dios, nkeꞌ lazoꞌ Xaꞌ men jwanꞌ nale nzo lazonꞌ ndaꞌy.
8 Nde naro toz nak Dios sa li Xaꞌ yaꞌr reta ned yalwen jwanꞌ ndaꞌ Xaꞌ lo goꞌ, sa thiblaꞌ keno goꞌ reta jwanꞌ nakinꞌ goꞌ nde keno goꞌ bro toza, sa laꞌsto goꞌ men lo re sin' wen,
9 jwanꞌ xa nchabka lo xkiꞌs Dios:
Mdiꞌd xaꞌ re chan' xa', mda' xa'y lo re men prob,
thiptane nchanꞌ reta jwanꞌ galꞌ ndli xaꞌ.
10 Nde Xa' jwan' ndaꞌ mbis nxenꞌ re men ngo bin nde Xaꞌ ndaꞌ jwanꞌ ncha men, Xa' yaga taꞌ lo goꞌ reta jwanꞌ nakinꞌ goꞌ sa xyen chenꞌ goꞌ nde xyen reta yalwen ndli goꞌ.
11 Tamod sa keno goꞌ reta ned jwanꞌ, nde toyal taꞌ goꞌy dib nzo lazoꞌ goꞌ. Nde lo ta telꞌ goꞌ gon we náꞌ lo re wes, jwan'na li sa re xaꞌ taꞌ dyux lo Dios.
12 Tak gon ta telꞌ goꞌ lo re wes, naꞌnakte benꞌta laꞌstoy xaꞌ lo jwanꞌ nakinꞌ xaꞌ, noga liy sa taꞌ toz xaꞌ dyux lo Dios.
13 Reta xaꞌ li naro le Dios lo kayaꞌ xaꞌ gon ta telꞌ goꞌ, tak jwan' re' ndloꞌ xa nxobyek goꞌ diꞌs wen chanꞌ Jesucrist nde xa dib nzo lazoꞌ goꞌ ndli goꞌ wen lo xaꞌ nde lo reta men.
14 Tagaꞌ dib nzo lazoꞌ xaꞌ nyaꞌb xaꞌ lo Dios por goꞌ, lo ta mbloꞌ Dios yalwen toz tir chanꞌ Dios lo goꞌ.
15 ¡Dyuxkix toz Dios por yalwen jwanꞌ mdaꞌ Dios nde naꞌngentra' diꞌs par ryo'xkana!