8
Jwanꞌ yon par re men yez Dios
1 Wes na, ptan na, ncholaꞌs náꞌ tej náꞌ lo goꞌ xa mbroꞌto yalwen chanꞌ Dios lo re men yodoꞌ jwan' nzi lo xyon Macedon.
2 Tak tenyega ne mxakno xaꞌ re yalti jwanꞌ mbriꞌd xaꞌ thibka nale toz nzo lazoꞌ xaꞌ, nde tenyega tyak men prob toz xaꞌ, per dib nzo lazoꞌ xaꞌ mdaꞌ xaꞌ re jwanꞌ, xajka men rika xaꞌ.
3 Nde mnepa na dib nzo lazoꞌ xaꞌ mdaꞌ xaꞌ jwanꞌ xa mbli xaꞌ gan, nde axta mbri'dbe' mdaꞌ xaꞌy.
4 Nde mnaꞌb toz xaꞌ lo náꞌ sa taꞌ náꞌ diꞌs no xaꞌ laꞌsto re men yez Dios, ta ndoriꞌd yalti.
5 Nde mbli xaꞌ masraꞌ re jwanꞌ naꞌndlit náꞌ xgab li xaꞌ, tak nerla mdayaꞌ lazoꞌ xaꞌ lo Xa' Nyebe' nde tagaꞌ mdayaꞌ lazoꞌ xaꞌ lo náꞌ, mbli xaꞌ jwanꞌ xa ncholaꞌs Dios.
6 Jwanꞌ nasa mnaꞌb toz náꞌ lo Tit sa tolo xa' yalwen jwan' mdobte ner xaꞌ xij goꞌ.
7 Tak ta xa ndryo'xoꞌb goꞌ lo reta jwanꞌ, lo jwanꞌ ndlipa lazoꞌ goꞌ, lo re diꞌs, lo yalnchak, lo ta nawe nzo lazoꞌ goꞌ ndli goꞌ sinꞌ lo Dios nde lo ta nkeꞌ lazoꞌ goꞌ náꞌ; tagaꞌ ndablo ryo'xoꞌb goꞌ lo yalwen re'.
8 Jwanꞌ reꞌ na'nakte jwan' nyebe'n li go', benꞌta jwanꞌ ncholas na, yolo goꞌ xa naxalꞌ nak lazoꞌ tedib ned wes, nde toyal loꞌ goꞌ nyenꞌ cho liga nkeꞌ lazoꞌ goꞌ.
9 Tak mnela goꞌ xa wen nak Jesucrist Xaꞌ Nyebeꞌ, Xaꞌ rik Xa' per sin' ngok prob Xa' lo nkeꞌ lazoꞌ Xaꞌ goꞌ sa yolal go' men rik lo ta ngok prob xaꞌ.
10 Lo jwan' re'ya toyal tej na lo goꞌ jwan' ndablo li go', tak jwanꞌ reꞌ naka yalwen lo go', jwan' mdote ner goꞌ, naꞌnakte benꞌta mthop goꞌy, noga dib nzo lazoꞌ goꞌ mbli goꞌy, axta lin' mbri'da.
11 Nde naya ta xa nawe mdobte goꞌ neraꞌ, tatka bli goꞌy, dib nzo lazoꞌ goꞌ ptaꞌ goꞌ jwanꞌ nchal lo goꞌ.
12 Tak tez dib lazo' men ta' men jwan Dios nkayaꞌ jwanꞌ ndaꞌ men a xa nchala lo men, tak Dios naꞌnyaꞌbta jwanꞌ naꞌngenod men.
13 Naꞌnit na jwanꞌ reꞌ, sa nale' yoy lo tedib ned xaꞌ nde leꞌ goꞌ lyato lo yalti,
14 naꞌnakte jwanꞌna, cheꞌla sa thita lal keno goꞌ re jwanꞌ. Naya goꞌ ngeno jwanꞌ nakinꞌ tedib ned xaꞌ nde yeꞌ wiz xaꞌ keno jwanꞌ nakinꞌ goꞌ, tamod sa thita lal keno go' re jwanꞌ,
15 xa nchabka lo xkiꞌs Dios: "Xaꞌ jwanꞌ mthop broy, naꞌndroxoꞌbtay lo xa', nde xaꞌ jwanꞌ mthop luda, ngola."
16 Dyuxkix Dios, tak leꞌga xgab ta ndlin ngwiꞌn goꞌ, xgab yaxa mtob Dios lazoꞌ Tit ngwiꞌ Tit goꞌ.
17 Tak liga mkaya' Tit xko'x, per noga ndyen toz xa', dib nzo lazoꞌ xaꞌ mbro' xa' sa ndatwiꞌ xaꞌ goꞌ.
18 Nde mtelꞌ náꞌ ti wes nda kon Tit, ti wes jwanꞌ jwin toz ndli sinꞌ ndatej xaꞌ diꞌs wen chanꞌ Jesucrist nde reta yodoꞌ wen ngwiꞌ men xaꞌ.
19 Nde naꞌnakte benꞌta jwanꞌ reꞌ, noga re men jwanꞌ nzi re yodoꞌ mblí xaꞌ wes reꞌ sa tyonke xaꞌ xis náꞌ, li xaꞌ kompay we náꞌ gon reꞌ, ndli náꞌ jwanꞌ reꞌ tak nxoꞌbyek náꞌ Xaꞌ Nyebeꞌ nde loꞌ náꞌ ke dib nzo lazoꞌ goꞌ mthop goꞌ gon reꞌ.
20 Nde naꞌncholaꞌsta náꞌ ni men narax xis naꞌ lo ta nthop naꞌ bro toz gon.
21 Nchal náꞌ naxut li náꞌ reta jwanꞌ, nde naꞌnakte benꞌta lo Xaꞌ Nyebeꞌ noga lo reta mena.
22 Noga mtelꞌ náꞌ tedib wes nda kon xaꞌ, ti wes jwanꞌ naꞌr toz gob mbloꞌ xaꞌ lo náꞌ ke ngol xgab xa', nde cho letla lo ta jwin nzolo xaꞌ goꞌ mas nale nzo lazoꞌ xaꞌ nda xa'.
23 Leꞌ Tit, nak ti mbiꞌ nsalꞌtan nde thita ndli náꞌ sinꞌ sa ndlaꞌsto náꞌ goꞌ, leꞌ rop wes ta ndanke xis Tit, nak xaꞌ men mtelꞌ re yodoꞌ nde nak xaꞌ men ndloꞌ yalnaro chanꞌ Jesucrist.
24 Jwanꞌ nasa, pkeꞌ lazoꞌ goꞌ re yon wes, sa loꞌ goꞌ lo re men nzi re yodoꞌ ke liga nkeꞌ lazoꞌ goꞌ xaꞌ nde liga re jwanꞌ ta nxyalꞌno náꞌ goꞌ.