6
Rusëdnëꞌ Jesús ca ral‑laꞌ gáclenruꞌ bunách
1 Gnëꞌ caꞌ Jesús:
―Gul‑güíꞌ ládxiꞌliꞌ gac gdu ca rej ládxiꞌliꞌ‑nëꞌ Dios, cugunzliꞌ lë ni laugac bunách quië laꞌleꞌi ca naꞌ runliꞌ. Chquiꞌ runliꞌ cni, cutu bi gunnëꞌ queëliꞌ Xuzruꞌ Dios zoëꞌ yehuaꞌ yubá.
2 Catiꞌ bi unödzjuꞌ qui nu bi ryadzj, cutu gunuꞌ ga glaꞌ lahui lë naꞌ runuꞌ ca tunëꞌ bönniꞌ tuꞌluíꞌz tsahuiꞌ cuinquëꞌ ga nac lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, lencaꞌ ga nac lu yëꞌy. Cni tunëꞌ quië laꞌgúꞌu lequëꞌ yöl‑laꞌ ba bunách. Le nactë rëpaꞌ lbiꞌiliꞌ, caꞌz nac yöl‑laꞌ ba gataꞌ quequëꞌ.
3 San liꞌ, catiꞌ bi unödzjuꞌ qui nu bi ryadzj, cutu caꞌ guꞌu latj gnözi nitú bunách.
4 Naꞌa, lë naꞌ unödzjuꞌ, bagachiꞌz ral‑laꞌ unödzjuꞌ, atiꞌ Xuzruꞌ Dios, Nu rleꞌi ca naꞌ runuꞌ bagachiꞌz, Lëꞌ ubiꞌë quiuꞌ.
Rusëdnëꞌ Jesús ca ral‑laꞌ ulidzruꞌ‑nëꞌ Dios
5 Gnëꞌ caꞌ Jesús:
―Catiꞌ ulidzliꞌ‑nëꞌ Dios, cutu gunliꞌ ca tunëꞌ bönniꞌ tuꞌluíꞌz tsahuiꞌ cuinquëꞌ, le taꞌdzág ládxiꞌquëꞌ taꞌzuinëꞌ tuꞌlidzëꞌ Dios gap nac lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, len gap nac lu yëꞌy quië laꞌleꞌi lequëꞌ bunách. Le nactë rëpaꞌ lbiꞌiliꞌ, caꞌz nac yöl‑laꞌ ba gataꞌ quequëꞌ.
6 San lbiꞌiliꞌ, catiꞌ ulidzliꞌ‑nëꞌ Dios gul‑tsáz lidxliꞌ len gul‑séyj yuꞌu. Gul‑lidzëꞌ Dios gnábiliꞌ‑nëꞌ Xuzruꞌ Dios, zóalenëꞌ lbiꞌiliꞌ ga naꞌ zoaliꞌ queëzliꞌ, atiꞌ Xuzruꞌ Dios, Nu rleꞌi ca runliꞌ bagachiꞌz, Lëꞌ ubiꞌë queëliꞌ.
7 ’Catiꞌ ulidzliꞌ‑nëꞌ Dios cutu gunliꞌ laꞌ yëꞌy laꞌ leyz ca naꞌ tunëꞌ bönniꞌ cunúnbëꞌquëꞌ Dios, le táquinëꞌ huayönnëꞌ lequëꞌ Dios le tuꞌlidzëꞌ laꞌ yëꞌy laꞌ leyz.
8 Cutu gunliꞌ ca naꞌ tunëꞌ lequëꞌ. Xuzruꞌ Dios, zíꞌatël catiꞌ ziꞌa gnabliꞌ, chnözcznëꞌ yuguꞌ le ryadzj queëliꞌ.
9 Qui lë ni naꞌ, ral‑laꞌ ulidzliꞌ‑nëꞌ Dios gnaliꞌ cni:
Xuz netuꞌ, zuꞌ yehuaꞌ yubá,
Gac zxön lauꞌ.
10 Gda gna bëꞌu luyú ni.
Ben ga gac luyú ni ca rdzag ladxuꞌu Liꞌ ca rac niꞌ yehuaꞌ yubá.
11 Benn le gágutuꞌ naꞌa dza.
12 Bnit lau netuꞌ le cunác bentuꞌ lauꞌ Liꞌ
Ca runtuꞌ netuꞌ, runít lautuꞌ caꞌ nup bi tun queëtuꞌ.
13 Cutu guꞌu latj siꞌ bëꞌ netuꞌ tuꞌ xöhuiꞌ,
San buslá netuꞌ lu naꞌ nu ruaꞌ döꞌ,
Le naqui quiuꞌ ga rna bëꞌu, len yöl‑laꞌ uná bëꞌ, len yöl‑laꞌ ba.
Cni rë́ꞌnituꞌ gactecz. Caꞌ gac.
14 ’Chquiꞌ unít lauliꞌ lzaꞌliꞌ, nup tuaꞌ döꞌ queëliꞌ, unít lahuëꞌ caꞌ lbiꞌiliꞌ Xuzruꞌ Dios, zoëꞌ yehuaꞌ yubá.
15 Chquiꞌ cutu unít lauliꞌ lzaꞌliꞌ, cutu unít lahuëꞌ lbiꞌiliꞌ Xuzruꞌ Dios ca nac dul‑laꞌ runliꞌ.
Rusëdnëꞌ Jesús ca ral‑laꞌ gunruꞌ gubás
16 Gnëꞌ caꞌ Jesús:
―Catiꞌ gunliꞌ gubás, cutu gunliꞌ bayechiꞌ lauliꞌ ca tunëꞌ bönniꞌ tuꞌluíꞌz tsahuiꞌ cuinquëꞌ, le tunëꞌ bayechiꞌ lauquëꞌ quië láquibeꞌi bunách tunëꞌ gubás. Le nactë rëpaꞌ lbiꞌiliꞌ, caꞌz nac yöl‑laꞌ ba gataꞌ quequëꞌ.
17 San lbiꞌiliꞌ, catiꞌ gunliꞌ gubás, gul‑páꞌ icjliꞌ len gul‑quíb lauliꞌ,
18 cui láquibeꞌi bunách runliꞌ gubás. Bagachiꞌz ral‑laꞌ gunliꞌ gubás, atiꞌ Xuzruꞌ Dios, zóalenëꞌ lbiꞌiliꞌ ga naꞌ zoaliꞌ queëzliꞌ, Lëꞌ ubiꞌë queëliꞌ.
Yehuaꞌ yubá ral‑laꞌ utubruꞌ yöl‑laꞌ tsahuiꞌ queëruꞌ
19 Gnëꞌ caꞌ Jesús:
―Cutu utubliꞌ yöl‑laꞌ tsahuiꞌ luyú ni, ga ni tuꞌtöbaꞌ lei bëldauꞌ qui, atiꞌ rac ditj, len ga ni taꞌyáz gban, taꞌbanëꞌ.
20 San gul‑túb yöl‑laꞌ tsahuiꞌ niꞌ yehuaꞌ yubá, ga niꞌ cutu lutöbaꞌ lei bëldauꞌ qui, len cutu gac ditj, len ga niꞌ cutu laꞌyáz gban cutu laꞌbanëꞌ.
21 Ga niꞌ dë yöl‑laꞌ tsahuiꞌ queëliꞌ, niꞌ güiꞌ ládxiꞌliꞌ gdxinliꞌ.
Le rguꞌu yeníꞌ icj ládxiꞌdauꞌruꞌ
22 Gnëꞌ caꞌ Jesús:
―Yöj lauruꞌ nac ca tu le rguꞌu yeníꞌ icj ládxiꞌdauꞌruꞌ. Qui lë ni naꞌ, chquiꞌ yöj lauliꞌ nac dxiꞌa, gdútëliꞌ tsëpliꞌ yös yeníꞌ.
23 Chquiꞌ yöj lauliꞌ cutu nac dxiꞌa, gdútëliꞌ nachul‑liꞌ. Qui lë ni naꞌ, chquiꞌ yeníꞌ zoalen lbiꞌiliꞌ nuhuöác le nac chul, szxö́nitër nachul‑liꞌ.
Dios len dumí
24 Gnëꞌ caꞌ Jesús:
―Nutu nu gac gun xchinquëꞌ chop xanëꞌ, le uzóëꞌ tslaꞌl tuëꞌ atiꞌ yetúëꞌ naꞌ gdxiꞌinëꞌ, o ugáꞌnlenëꞌ tuëꞌ, atiꞌ yetúëꞌ naꞌ ubíj ladxëꞌë. Cutu gac gunliꞌ zxön Dios lencaꞌ dumí.
Dios run chiꞌë nup náquigac queëꞌ
25 Gnëꞌ caꞌ Jesús:
―Yetú caꞌ rëpaꞌ lbiꞌiliꞌ: Cutu cöꞌliꞌ baguíꞌi niꞌa qui le gáguliꞌ o niꞌa qui le guiꞌjliꞌ, yuguꞌ le nabániliꞌ, o niꞌa qui lariꞌ gáculiꞌ. Záquiꞌtsquir yöl‑laꞌ naꞌbán queëliꞌ ca le gáguliꞌ, atiꞌ nactër lsacaꞌ gdu ca nayáꞌ nabinliꞌ ca lariꞌ gáculiꞌ.
26 Gul‑yú ca rac quecbaꞌ bguindauꞌ taꞌzubaꞌ luzxbá. Cutu caꞌ taz tuꞌzoabaꞌ, len cutu taꞌlapbaꞌ, len cutu tuꞌtubbaꞌ ga bi laꞌguꞌbaꞌ quecbaꞌ, san Xuzruꞌ Dios zoëꞌ yehuaꞌ yubá, rugáguczëꞌ lecbaꞌ. Záquiꞌtsquirliꞌ lbiꞌiliꞌ ca yuguꞌ bguindauꞌ naꞌ.
27 ¿Nuzxa caz bönniꞌ nutsëꞌë ladjliꞌ gac gunëꞌ ga soëꞌ gbanëꞌ yetú dzaz le rböꞌë baguíꞌi quië gac cni queëꞌ?
28 ’¿Bizx quië rböꞌliꞌ baguíꞌi niꞌa qui le gáculiꞌ? Gul‑yutscaꞌ ca rac quegac yöjdauꞌ röꞌgac ladj guixiꞌ ca taꞌzxö́n. Cutu tun dxin len cutu tun du lariꞌ.
29 Nedaꞌ rëpaꞌ lbiꞌiliꞌ, Salomón, bönniꞌ niꞌ gna bëꞌë, zal‑laꞌ szxöni gutaꞌ queëꞌ yöl‑laꞌ tsahuiꞌ, lariꞌ gucuëꞌ cutu gnaꞌtër lach ca rnaꞌgac yöjdauꞌ naꞌ.
30 Dioscz runëꞌ lach yöj guíxiꞌdauꞌ röꞌgac ladj guixiꞌ, le nacuáꞌ naꞌa dza, atiꞌ cxö huidzj laꞌyegui lu guiꞌ. Chquiꞌ cni ruiꞌ ladxëꞌë yöj guíxiꞌdauꞌ, runëꞌ leygac lach, szxö́nitër gunëꞌ caꞌ queëliꞌ, curéjlëꞌliꞌ‑nëꞌ gdu ládxiꞌliꞌ.
31 Qui lë ni naꞌ, cutu cöꞌliꞌ baguíꞌi, cugnaliꞌ: “¿Bizxa gágutsatuꞌ?” o “¿Bizxa guíꞌjtsatuꞌ?” o “¿Bizxa lariꞌ gácutsatuꞌ?”
32 Bunách yödzlyú ni taꞌbö́ꞌ baguíꞌi niꞌa qui yúguꞌtë lë ni, san zoëꞌ Xuzruꞌ yehuaꞌ yubá, atiꞌ Lëꞌ nözcznëꞌ naquíniliꞌ yúguꞌtë lë ni.
33 Naꞌa, gul‑güíꞌr ládxiꞌliꞌ gna béꞌinëꞌ lbiꞌiliꞌ Dios, len gunliꞌ le nac dxiꞌa lahuëꞌ Lëꞌ, atiꞌ Lëꞌ cuꞌë xnöz queëliꞌ yúguꞌtë lë ni.
34 Qui lë ni naꞌ, cutu cöꞌliꞌ baguíꞌi niꞌa qui le ral‑laꞌ gac cxö huidzj, le huac güiꞌ ládxiꞌliꞌ cxö huidzj le gac queëliꞌ dza naꞌ. Tu tu dza lac le ral‑laꞌ güiꞌ ládxiꞌliꞌ dza naꞌ.