12
Tu una' kwa'n michob aseit ni' Jesús
(Mt. 26:6-13; Mr. 14:3-9)
1 Nzhak jwalt zixo'p ngubizh par gal lani Pask, orze' ngwa Jesús tu yezh kwa'n lë Betania, plo nzho Lásaro, miyi' kwa'n mile' Jesús nguruban ze'.
2 No ze' mizuxkwa' bixa' tu kwa'n ndaoxche' bixa' kun Jesús; lë' Mart mizhine lo bixa', no nu Lásaro nak tu rë xa' nzob lo mes par gao xche' kun Jesús,
3 orze' nguzen Mari pas garol litr aseit kwa'n viv kwa'n lë nardo, no dox tsake, no nix nixla'i; orze' michob una'i ni' Jesús, no kun yich yek una' mitsibizh una'i, mbaino dub le'n yo' ze' mixla'i.
4 Orze' lë' Judas Iscariote, xa' nak tu rë men che'n Jesús, no xa' re' xa' kwa'n chi Jesús par gat Me, orze' nzhab xa':
5 ―¿Chon nangado nits nax re' kwa'n tsak dimi kwa'n nile' men gan chon gayo' ngubizh zhi'n, par ngaga'z dimi re' ka' rë men yent kwan nzhap?
6 Per gat lë't por nilats laxto' Judas rë men prob nzhab Judas kure', sino por lë' xa' niguchao' dimi kwa'n nigan, no nu niliwa'n xa'i,
7 kuze' nzhab Jesús:
―Bila' chob una' re'i ni'n, lë' xa' kinuchao' aseit re' par zhë or ga'ch da.
8 Rë men prob, zilita' yo bixa' xid go, per na gat lë't dubta' nzon kun go.
Midi'zh bixa' nu Lásaro gut bixa'
9 No dox nayax men Israel mbin, lë' Jesús nzho yezh Betania, kuze' ngwa bixa' ze', per gat lë't nab Jesús nzhatsi' bixa' ma, nu par ne bixa' Lázaroi, xa' mile' Jesús, nguruban ze',
10 orze' lë' rë ngulëi' xa' nile' mandad lo más rë ngulëi', mia'n bixa' di'zh nu Lásaro gut bixa',
11 porke por xa' re' namás, dox nayax men Israel ngwayila Jesús.
Jesús nguio yezh Jerusalén nela tu rey ga'
(Mt. 21:1-11; Mr. 11:1-11; Lc. 19:28-40)
12 Nayax men ngwa lani yezh Jerusalén, no xtu riyë'l mbin men lë' Jesús nzhazhin la yezh re',
13 orze' ngwakinez bixa' Me, micho' bixa' la che'n ya yin par ndi'x bixa'i nez plo ded Jesús, no nguruzhië bixa' naye, nzhab bixa':
―¡Guzh go nazhon Dios! ¡No wen nzha xa' mixë'l Dios nak rey lo rë men Israel!
14 Orze' mizhë'l Jesús tu burrit, no nguzob Me tich ma, nela nzobni' ka lo Yech che'n Dios:
15 Nazhebt go men yezh Sion;
biwi' go, lë' rey che'n go nzë,
nzob xa' tich tu burrit.
16 Or galo laka, nanganut laxto' rë men che'n Jesús kwa'n ngok re', per or nguruban Jesús, orze' miza' bixa' kwent, lë'i ngok porke lë'i nzobni' la lo Widi'zh che'n Dios kwa'n zak Jesús.
17 No rë men kwa'n une, or mile' Jesús nguruban Lázaro le'n ba', kidi'zh bixa'i xid men rë kwa'n ngok,
18 kuze' nguro' nayax men yezh Jerusalén par ngwakinez bixa' Jesús por mile' Jesús tu kwa'n nagat ne men,
19 orze' nzhab rë men fariseo lo wech bixa':
―¡Biwi'u, yent kwan gak le' be par ka'n be lo men! ¡Yub ka bixa' nzhakë tich xa' ba'!
Kikwa'n pla rë men grieg Jesús
20 Xid rë xa' nzë lani Pask kwa'n gal yezh Jerusalén, nu pla men grieg nzë xid rë men ze'.
21 Nguzubi rë men grieg re' lo Lip, xa' nzë yezh Betsaida kwa'n ña'n lazh men Galilea, par mina'bdi'zh bixa' lo Lip, nzhab bixa':
―Lë' go, ¿xmod le' no ne no Jesús?
22 Mbaino ngwayab Lipe lo Ndrés, orze' rop bixa' ngwayabe lo Jesús,
23 orze' nzhab Jesús:
―Ngol la or libe' men cho ka nak Xga'n Dios, Me nu nak tu men yizhyuo.
24 Walika kwa'n nin lo go, chi lë' tu lazh triu nayo lo yuo no chi nayao' yoi, nalënte, mbaino naza'te; per chi yao' yoi no lëne, orze' lë'i za'.
25 Men xa' naban xigab yek yizhyuo re', lë' xa' yitlo lo Dios; per xa' naban xmod nzhakla Dios yizhyuo re', xa' ze' ban kun Dios par dubta'.
26 Chi nzho cho go nzhakla gak men da, naki'n yi'dkë go ticha; no plo yo'n, nu go yo ze'; no cho go nile' zhi'n da, lë' Xuza Dios di'zh wen por go ze'.
Midi'zh Jesús xmod gat Me
27 ’No dox nakwan nizi da nal re'; ¿no kwan gapa nal? ¿Chi zapa?: “Xuza, gulo' Go da lo rë kwa'n nazhe'b re'.” Per na nane ka, por rë kure' ka nzhala yizhyuo re'.
28 Xuza, bile' go par di'zh men, dox nazhon go.
Lë'chi mbin rë xa' nzhin ze' tu widi'zh kwa'n nguro' lo yibë', nzhab se':
―Lë'da mile lai, per lë'da lei xtu wëlt, lë' men di'zh nazhon da.
29 No rë xa' mbin kure', rë xa' nzhin ze', nzhab: “Nguzi' kure'”, no más bixa' nzhab: “Ka tu ganje.”
30 Orze' nzhab Jesús:
―Gat lë't par da mbin go widi'zh re'; par go kai,
31 mbaino nalse mizhin la zhë, gab Dios xmod gak kun rë men yizhyuo re'; no nalse lë' Dios kutin xa' nile' mandad yizhyuo re'.
32 No na, or kë' bixa' da lo krus, orze' kwantsa men kana par da.
33 Kure' midi'zh Me par nzhab Me xmod gat Me,
34 orze' nzhab rë men:
―No nane, lë' lo ley nzobni': “Lë' Krist nayot gat, lë' Me ban par dubta'.” No, ¿chon nidi'zhal, lë' Xga'n Dios Me nu nak tu men yizhyuo, naki'n kë lo krus? ¿No cho nak Xga'n Dios xa' kize'tal re'?
35 Orze' nzhab Jesús:
―Stubi nzo Me nak Ki re' kun go, per kaxche'p nzo Me re' kun go. Kuze' guzë go lo biani che'n Me lë'ga nzo Me kun go; napa zë go lo nakao, porke xa' nizë lo nakao, nanet xa' plo nizë xa'.
36 Wayila go Me nak Ki re' lë'ga' nzo Me kun go, par gak go men che'n Me, xa' nzhin lo biani.
No or milox midi'zh Me widi'zh re' lo rë men Israel ze', nguibchi Me lo bixa'.
Por chon nangayilat rë men Israel Jesús
37 No ter nayax kwa'n nazhon milu' Jesús lo rë men Israel, per ni se' nangayilat bixa' Jesús,
38 par ngok ka kwa'n mizobni' Isaías lo yech, kwa'n nzhab:
Dios da, ¿cho ngwayila widi'zh che'n be,
no cho lo milu' go yalnazhon che'n go?
39 Kuze' nangakt ngayila bixa'i, porke nu se' mizobni' Isaías lo yech:
40 Dios mile' nagakt lu'i lo go,
no nu mile' Dios, ngok nad laxto' go;
par nagak ne goi, no par nayila goi kun dub laxto' go;
par ngayëk go lon, orze' ngache'n rë kwa'n nzë'b xki go,
no rë kwa'n nzadkë tich go.
41 Mikë' Isaías widi'zh re' porke lë' Dios milu' la rë yalnazhon che'n Jesús, mbaino rë kwa'n le' Me.
42 No ter se' unkë lo yech, per nayax men Israel ngwayila bixa' Jesús, haxta nu pla rë xa' nzo lo bixa' ngwayilai, per nangadi'zht bixa'i lo rë men porke nizheb bixa' lo rë men fariseo, napa' kutin rë xa' re' bixa' le'n yo' plo nitse'd bixa' widi'zh che'n Dios,
43 porke rë xa' ngwayilai re', más ño laxto' bixa' ya'n bixa' wen kun men, ke par ya'n bixa' wen kun Dios.
Widi'zh che'n Jesús kube' kwan nak men
44 Orze' midi'zh Jesús naye:
―Rë xa' ñila da, gat lë't nab da ngwayila xa'; nu Xuza Me mixë'l da, ngwayila bixa'.
45 Or nzon xid go, nak nela yub Xuza, Me mixë'l da, nzo kun go.
46 Na nak Ki lo rë men yizhyuo re'; xa' yayila da, nakizëtra' xa' lo nakao,
47 no cho xa' nzhon widi'zh da, per gat nile't xa' kwa'n nzhapa, nana'bta kwent lo bixa', porke gat nzhalta par kobe'n kwan nak men yizhyuo re'; nab tsa nzhala par kon men lo rë kwa'n nazhe'b kwa'n nzadkë tich men.
48 Men xa' nzhab yent kwane rë kwa'n nidizha, nzho ra' cho kobe' (wi') kwan nak xa', lë' rë widi'zh da kobe'i, or zhin zhë gab Dios xmod gak kun kad men.
49 Porke gat lë't por xigab yeka kinin kure', lë'ka Xuza Dios ne lon kwan ñal dizha, no kwan ñal lun.
50 No nanen, lë' widi'zh che'n Xuza Dios, nile' niban men par dubta' lo Dios. Kuze' nidizha lo go, rë kwa'n mile' Xuza mandad gon go.