11
Ngut Lásaro
1 Ngol tu zhë, ngokne tu miyi' xa' lë Lásaro, no yezh Betania nzë xa' kun Mari no Mart, bizan xa'.
2 Mari una' ze' michob aseit ni' Jesús no mitsibizh una'i kun yich yek una'.
3 Rop una' re' nak bizan Lásaro, mixë'l biuna' razón lo Jesús, nzhab bixa':
―Lë' go, lë' xa' nichë'l go ze', nzhakne.
4 No or mbin Jesús kure', nzhab Me:
―Yalyizh re' nale'te gat Lásaro par dubta', sino lë'i zu' par ne men, xmod nak yalnazhon che'n Dios, mbaino yalnazhon che'n Xga'n Me.
5 No dox nazhi' Jesús Mart, no Mari, mbaino Lásaro.
6 No or mbin Me, lë' Lásaro nzhakne, ngulëz Me xchop ngubizh plo nzo Me,
7 no or nded rop zhë ze', orze' nzhab Jesús lo rë men che'n Me:
―Cha'o nzha be xtu wëlt lazh men Judea.
8 Orze' nzhab rë men che'n Me lo Me:
―Maestr, nal laka ngokla rë men Israel xa' nzho ze', ngut bixa' go kun ke, ¿no nal xtu wëlt nzhakla go ya go ze'?
9 Orze' nzhab Jesús:
―¿Chi gat lë't tu dusen or kinu tu ngubizh? No tu xa' nizë or zhë, ni por más nayachint xa', porke ñani plo nizë xa',
10 per xa' nizë lo nakao, lë' xa' yachin, porke gat kinut xa' biani.
11 No nu nzhab Jesús:
―Lë'da nzhalixche Lásaro, xa' nichë'l be ze', lë' xa' naxnaa.
12 Orze' nzhab rë men che'n Me:
―Lë' go, chi lë' xa' naxnaa, lë' xa' yak ka orze'.
13 Nzhab Jesús kure' por ngut Lázaroi, ter mile' rë men che'n Me xigab, naxnaa ka Lásaro,
14 orze'se tuli nzhab Jesús:
―Lë' Lásaro ngut,
15 no nizak laxto'n por gat nzon ze', más wene par go, par más yila go da. Nal cha' go, nzha be lo xa'.
16 Orze' lë' Max, xa' nidi'zh men kwach ze', nzhab xa' lo más rë men che'n Jesús:
―Cha'o nzha be, par nu be gat kun lë' xa'.
Jesús nak Me, nile' niruban men
17 No or mizhin Jesús yezh Betania, nzha la tap ngubizh di miga'ch Lázaro.
18 No yezh re' ña'n paste chon kilómetro di yezh Jerusalén,
19 no nayax men xa' nzë lazh men Judea ngwatswi' bixa' ma Mart kun Mari, par tsiyal bixa' laxto' rë una' re' por yalnawin che'n bizan bixa'.
20 Or mbin Mart, lë' Jesús nzhazhin la gax ze', orze' nzhakinez una' Jesús, mbaino lë' Mari mia'n yo'.
21 Nzhab Mart lo Jesús:
―Lë' go, chi ngak re' nzou, nangatta' bizana,
22 per ter gat nzou orze', lë'da nane ka, lë' Dios le' rë kwa'n na'b go lo Me.
23 Orze' nzhab Jesús:
―Lë' bizanal ruban ka.
24 Orze' nzhab Mart:
―Na nane ka, lë' bizana ruban zhë lult, or ruban rë men ngut, yizhyuo re'.
25 Orze' nzhab Jesús:
―Na nile niruban men, mbaino nilen, niban men dubta' kun Dios; no xa' yila da, ter ngut la xa', lë' xa' ruban ka,
26 no rë xa' naban nalre', mbaino ñila bixa' da, nayot gat xa' par dubta'. ¿Chi ñilal kure'?
27 Orze' nzhab Mart:
―Na ñila ka Go. Go nak Krist, Xga'n Dios, Me nak di'zh yi'd yizhyuo re'.
Mbi'n Jesús ro' ba' che'n Lásaro
28 No or milox midi'zh Mart kure', orze' miëk una' lizh una', no xla'n ngurezh una' Mari bël una', par nzhab una':
―Lë', lë' maestr nzo re', kibezh Me lu.
29 No or mbin Mari kure', tuli ngwa una' lo Jesús.
30 No lë' Jesús stubi nagat yo Me ro' yezh, ñë'dzë Me plo ngwakinez Mart Me,
31 no pla rë men Israel xa' nzhatsiyal laxto' Mari ze', or une bixa' nzha Mari, nu bixa' nzhakë, mile' bixa' xigab pas ro' ba' nzha una' re', nzhayo'n una'.
32 Or mizhin Mari lo Jesús, tuli nguzuxib una' lo Me, no nzhab una':
―Lë' go, chi ngak nzo go re', nangatta' bizana.
33 No or une Jesús nzho'n Mari kun rë men Israel xa' nzë kun lë' una', orze' dox gat lë' mizi Jesús, mbaino miwin laxto' Me,
34 orze' nzhab Jesús:
―¿Plo mika'ch go xa'?
Nkab bixa':
―Al re'i, wi'gole.
35 Orze' mbi'n Jesús,
36 no kidi'zh rë men Israel xa' nzhin ze':
―Biwi'ule, tatu nazhi' xa' Lásaro.
37 Per más bixa' kidi'zh:
―Xa' ba' mile' ngwani lo tu xa' dizde or ngol nikal-lo; ¿taxa, chi nangakt ngale' xa' tu kwa'n par nangatta' Lásaro?
Nguruban Lásaro
38 Orze', xtu wëlt dox gat lë't mizi Jesús, no nguzubi Me haxta ro' ba' che'n Lásaro, le'n tu ba' kwa'n nak pura ke, mbaino nayao' ro'i kun tu ke ro,
39 no nzhab Me:
―Gure go ke ba'.
Per nzhab Mart bizan yinto' re':
―Lë' go, guzhë nila' xa' re', porke nzha la tap ngubizh miga'ch xa'.
40 Orze' nzhab Jesús:
―Lë'da ni la lol, chi lë'l yila da, lë'l ne yalnazhon che'n Dios.
41 Ngure bixa' ke orze', no miwi' Jesús al ya' lo yibë', nzhab Me:
―Xuza, kinin xkixal por mbinal kwa'n mina'ba lol.
42 Na nane ka, rë or nzhonal kwa'n nina'ba lol, per por rë xa' nzhin re' kinin kure', par yila bixa', Lu ka Me mixë'l da.
43 No or milo'x midi'zh Me kure', orze' naye nzhab Jesús:
―¡Lásaro, gurutin ba'!
44 Nguro' xa' ngut re' le'n ba' orze', dub xa' narël lar, mbaino nali'b ya' xa' no ni' xa', no nayao' lo xa' kun xtu lar, orze' nzhab Jesús:
―Bixëk go xa' no bila' go bi xa'.
Mia'n di'zh rë xa' nak zhi'n gut bixa' Jesús
(Mt. 26:1-5; Mr. 14:1-2; Lc. 22:1-2)
45 Kuze' nayax men Israel xa' ngwakë tich Mari, ngwayila bixa' Jesús, or une bixa' kure',
46 per zipla bixa' ngwayab lo rë men fariseo rë kwa'n mile' Jesús,
47 orze' migan rë ngulëi' ro xa' nile' mandad lo más rë ngulëi', kun rë men fariseo par mikan bixa' rë jwes, xa' más nile' mandad, orze' nzhab bixa':
―¿Xmod le' be nal? ¡Dox rë kwa'n nazhon kile' mbe ba'!,
48 no chi la' be, lë' rë men yila miyi' ba', orze' lë' rë men Roma, xa' nak zhi'n xid be, yi'dchil yado' che'n be mbaino lo'x bixa' rë men lazh be.
49 No xid rë xa' nzhin ze', nzho tu ngulëi' lë Caifás, xa' nak ngulëi' ro li'n ze', orze' nzhab xa' re':
―Rë go, yent kwan nane go,
50 ¿chi gat nile't go xigab, más wen gat tutsa men ke par lox rë men lazh be?
51 Per Caifás nangadi'zht xa' kure' por mis xigab yek xa', sino ke Dios mile' nzhab xa'i, por nak xa' ngulëi' ro li'n ze', kuze' nzhab xa', naki'n gat Jesús par nalox rë men Israel,
52 no gat lë't par nalox nab rë men Israele, nu par nalox rë men che'n Dios xa' nzhin dub yizhyuoi, nes par gak bixa' tutsa ben men.
53 Orze', dizde zhë ze', nguzublo kikwa'n rë men Israel ze' mod gut bixa' Jesús.
54 Kuze', nangakizëtra' Jesús xid rë men Israel xa' nak zhi'n ze', sino ke nguro' Me lazh men Judea, nzha Me tu yezh kwa'n lë Efraín, kwa'n ña'n gax le'n yuo bizh; ze' mia'n Me kun rë men che'n Me,
55 no xplatsa ngubizh jwalt antis di gal lani Pask che'n rë men Israel, kuze' rë men yezh Israel, nzha bixa' yezh Jerusalén par mbe bixa' lo Dios antis de gal lani, nela xmod nzobni' lo ley ga'.
56 Dub nzhin rë men ro' yado', ze' kikwa'n bixa' Jesús, kidi'zh bixa' lo wech bixa':
―¿Chi neuse, pas nayi'dt miyi' ze' nal lani re'?
57 No lë' rë men fariseo kun rë xa' nzo lo rë ngulëi', mia'n bixa' di'zh, chi tu men ne Jesús, naki'n yayab xa'i lo rë men xa' nzo lo más rë men par yatsen bixa' Jesús.