13
Jesús‑ni rigixxi'abie deki isia sá tse'e looba yotuha
(Mt. 24:1-2; Lc. 21:5-6)
1 Tti bedá Jesús‑ni ro'o yotuha nna ttu ka benne rudhetinieha nna ree bie:
―¡Maestru, biyúruga, aníliruba anka ka íyya kua‑ni lhe aníliruba anka ka yo'o‑ni lhe!
2 Jesús‑ni nna bekabie geni, ree na:
―¿Si gwa rilenlu ka yo'o xeni sia nii? Ka nuní tse'e loobakana. Niruba ttu íyya gekani laa eya'anna iki luesini; iyábakana itampabakana.
Jesús‑ni rigixxi'abie gasina aka atti lanila lhuxa yiesi lo yu‑ni
(Mt. 24:3-35, 42-44; Lc. 21:7-36; 17:22-24)
3 Tti do Jesús‑ni iki i'iya ata daa ka ya olivuha daka ata yeki lo yotuha, la'ania nna sun labe unnaba tisa Pedro‑ni lhe Jacobo‑ni lhe Juan‑ni lhe Andrés‑ni lhe, rákane:
4 ―Utixxi'en ri'itu, ¿nuka aka nu ralu‑na lhe bí aka kini unna liina deki chi dabiga aka nu ralu‑na?
5 Jesús‑ni nna bekabie, ree kana:
―Gwaluyú gele bittu tsia lele ge ka nu ruin lekani,
6 kumu ixe ka nu isia uinkana ttisidiba netiba nuha ankakana, nianna tti innákana: “Neti ankaa Cristu.” La'ania nna ixeba ka benne dhi yiekana.
7 ’Atti unale deki chi yu'u ka yiesi ritilha len luesikani lhe daa tisa deki ruin ka yiesi itilha len luesikani lhe, bittu gasinle kumu teeki aka aníha. Ttaka labí chi bisia ura lhuxa yiesi lo yu‑ni la'ania,
8 kumu ka yiesi elha‑na ebi'i noo luesikani ttilhakana lhe ka nu rinnabia‑na ebi'i noogaba luesikani, lhe anágaba gattibani yiesi lo yu‑ni ixú lhe isiagaba ubina lhe. La'ania nna si dhuloruba ka benne uyúke elha disa.
9 ’Lebi'i nna gwaluyúla gele, kumu teeki taga'akana le lo ka uxtisi lhe ukulhagabakana le lhe'e ka yo'o ata rudhetiri'i ka tisa ge Tata Do Yebáha lhe axtala arlo ka nu rinnabia xeni tatso dúkana le delo ni'a kia, kini aníha nna lebi'i kixxi'enle kana kia.
10 Ttaka atti lanila lhuxa yiesi lo yu‑ni, teeki chadhi ka tisa ge Tata Do Yebáha lhe'e iyába ka yiesi se'e itúba yiesi lo yu‑ni.
11 Tti udaxxukana le nna saga'akana le arlo ka uxtisiha, abittu uchacha ikile bixa innále looraha. Suna gwalekabiba tisa ute Espíritu ge Tata Do Yebáha len lebi'i, kumu laa lebi'iga nuha innele, Espírituha‑ba nuha inne.
12 La'ania eyeki ka benne ebi'i noo luesike. Ka nu raka betsikaniha utekana ka betsikaniha lasi ná ka nu uttikana ka nuha, lhe aníha‑gaba uin ka xxudiha len ka xi'inkaniha. Ka xi'inkaniha nna eyekikana ebi'i nookana ka xxudikaniha nna uinkana kini gatti ka benneha.
13 Lebi'i nna iyába ka benne utía di lekani le delo ni'a ge ria lele neti. Ttaka benne dhaabie dhu tsitsie lo neda kia axtaliba ganna chi uluxa iyá nu akaha, benneha gwalábe.
14 ’Ttaka lebi'i isia sá ganna chi ilenle aka ttu nu tuttíruga satsa ata labí dina akana, delába ge nu satsa utixxi'a profeta Daniel‑ni. (Ata rulabale ka tisa‑ni, gwalutte da nu rákana.) Ganna chi ilenle aka nu satsaha, la'ania nna ka nu se'e daka Judea‑ni teeki uxunnikana tsapikana iki ka i'iya sia niha,
15 nna nu dona iki yo'o geniha abittu eyadina, lhe nigaba eta'ana lhe'e yo'oha saleana ttu bixa,
16 lhe nu dia lhe'exxiha bittu eyyana lhe'e yo'o geniha saxxína jabana geniha.
17 ¡Gwalíchiru le ka benne nuila ata nuja xi'inke la'ania, lhe denke ka nuto rasi lhe!
18 Gwalinnaba len Tata Do Yebáha ki abittu aka nuní tti raka idilhaha,
19 kumu elha disa tsitsi nuha uyú ka benne lhe'e ka sáha, ttu elha disa nu labí chi uka itú uleki Tata Do Yebáha yiesi lo yu‑ni, la'anialiba nna aka nuha lhe nigaba labíru aka luesi elha disaha nu si daa lhe.
20 Kumu Tata Do Yebáha, ganna ttixka abíba odatsie ka sáha, la'ania nna niru ttú benne labí lhaabie, iyábake gattike. Ttaka lee odatsie ka sáha kumu de rakanie ge ka benne chi bekwebie.
21 ’Ganna nuxa gana le la'ania: “Gwalulanniruga, ne benne anka Cristuha du nii”, o si innána: “Gwalugíaruga, ne bie du naa”, abittu tsia lele ge nu inná aníha.
22 Kumu isia ka nu labí gwalí ankakana Cristu lhe isia ka nu labí gwalí ankakana profeta ge Tata Do Yebáha nna uinkana ka milagru lhe uinkana ttu bixa nu dika ebanani ka benne geni. Aníha uinkana kini dhi yiekana ke. Gaxa axtala ka benne chi bekwe Tata Do Yebáha ki akake gebie, axtala ka benneha dhi yiekana ki tsia leke gekani.
23 Laxkala lebi'i gwaluyú gele. Nnannali chi rigixxi'ania le iyá nu aka la'ania.
24 ’Iki de chi ute ka sá tti uyú ka benne elha disaha, la'ania nna echulha lo tatubisa‑na nna nanto beo‑na nna labíru ku'ubie xiani.
25 Ka beli sia gwetsáha nna iginnibakana lo yu lhe adíru ka nu ra xxeni lekani se'e gwetsáha igubigabakana.
26 La'ania nna neti benne daya yebáha, iláni ka benne neti dedáya yebáha lhe'e beaha ra tsitsi lasia lhe raka lhalhaba xiani kia lhe.
27 Nianna tti idhelhaa ka anjeli kiaha itú tte yiesi lo yu‑ni, axtaba ata riluxa yebáha lhe axtaba ata riluxa yiesi lo yu‑ni lhe. Idhelhaa ke kini tsiake ottupake ka benne chi bekwe Tata Do Yebáha.
28 ’Gwalutte dáruga ge ya higuha. Nuha ganna chi renettu ka lo náni lhe reria ka lhaga geni lhe, la'ania nna chi yule deki chiba dabigana eta'a iyya.
29 Anágaba lebi'i ganna chi ilenle aka nu chi ria‑ni, la'ania nna chi yule deki chi tteba dabiga esiaya.
30 Netiru ria, atti isia sá aka iyá ka nuní, ka benne se'e nnanna labí chi uttike la'ania.
31 Yebáha lhe yiesi lo yu‑ni tse'e loobakana, ttaka ka tisa chi ria‑ni teekiba aka nu ra ka benne‑ni.
32 ’Ttaka la sá lhe la ura aka nuha, lanú nu yuna, ni ka anjeli ge Tata Do Yebáha yuke lhe nigaba neti benne ankaa Xi'inieha a yua, sunruba Tataha yue.
33 ’De nuha nna gwaltse'e tsitsi lhe gwaltse'e ubeda lhe [gwalinne len Tata Do Yebáha lhe] kumu lebi'i labí yule nukaxa aka nuha.
34 Gwaluni attiba beni ttu benne birie die idittu nna bedha'ane yo'o geeha len ka nu reni lo sina geeha. Ttu ttu ka nuha begwebie kana sina ralhakana uinkana, nna nu ridú ridhalina lhe rodheana ro'o yo'oha nna ree nuha: “Ulanni tsitsilu ro'o yo'o kia‑ni kini anuttu nu ga'a.”
35 Laxkala lebi'i gwaltse'e ubeda kumu labí yule nukaxa esia xxana yo'oha, si esie chi dia ralha o esie riluela, o esie atti chi ribesi ka chinka‑na lhe o si esie tti chi daa tsani lhe,
36 kini ni kina ttu nnelaba esie nna etexxake le te'adhile.
37 Nu xpeya le‑ni, nunígaba upeya iyá ka benne: ¡Gwaltse'e tenná!