84
Bekero to no Yavaro Amisy
1 Nto irati akari po vatano matayao ukinye maugavo ransyerane rai ai. Mamaisyo ransyeran ‘‘Gitit’’ rai. Masmur vatano susyo Kora wo ratoe.
2 Wakoe, reama AMISY, vatane manayanambe Nya ntuna ri rai weye ngkov dave.
Tugae AMISY, Akari Titi naito munijo ntiti pi Winy!
3 Tugae, inanuga ntove rave AMISY Nya Yavare ama wanijate rai.
Inanasine tename so ranayanambe,
nggwain Amisy aijaseo titive, Wepirati Amisy noa pitawabe.
4 Umba insani pisye po apa ene ranari
muno insani pisawane apave ene rai
indamu apa tuvane utantuna rai,
mararai no tewa oram anakotare rameseo AMISY Ai rai.
Tugae, AMISY, Akari Titi naito munijo ntiti pi Winy!
Winyirati sya Akari Titi muno sya Amisye pi Winy.
5 Kove ngkov irati vatano utantuna no Nya yavare rai mai,
masyote yanteter wo nararimbe tutir.
6 Kove ngkov irati vatano nanawirati awa vambunine nsawa Nai mai,
nanawirati ubeker wuruta ubeaje Nai no Unato Sion.
7 Arono wanya kaivo ngkanembe raita,
AMISY Po mana ami raveti ntatipu rai.
Muno maruge makare mo kove raugavo kaivo ngkanene we rai.
8 Wenanao wanya wiridi uta, ubambunin dave kobe,
weti uta nanta no Amisye Amun no Sion.
9 Sya AMISY, Winyirati Akari Titi naito munijo ntiti,
syare namarikoame rasakinavo sya ana danajo rai.
Winyirati Amisy reama aneno Yakop beaje Nai,
syare Nyo inaraniv mavabe sya ana danajo ore rai.
10 Amisye Winy, syare Nya kove rarorono reama akari titi mine so ai, wepi teto reansaora,
muno wepirati vatano Nyo atayao be akari titive reansai.
11 Masyote intabo rino natavon no Nya yavar,
omamo ngkov akato irati masyote pakoe ta na no varoro kaijinta.
Sya bekere mamo syare tuna tawan no sya Amisye Apa Yavare ama unsanda akoe indamu syo rayaranande,
omamo ngkov akato irati rino no vatano wonae Amisye Ai awa yavar.
12 Weye AMISY Opamo wama Amisy Po wansayaranande,
Wepirati muinyo wansai muno Po wansaijaseo kovo ntiti rai,
AMISY Opamo bekobe irati vatano beto Aije ai.
13 Tugae AMISY, Winyirati Akari Titi naito munijo ntiti,
kove ngkov irati vatano napirati panave Naije ai.