☰ MASMUR 83
83
Amisye anajo inda be marovave Israel awa marova mai
1 Masmur Asap po ratoe. Ransyeran.
 
2 Amisy, vemo wimanin bayave nora,
sya Amisy, vemo Nyo rinaranivi vayave nora,
vemo winaneme kapan ti ntuna vayave inya.
3 Weye ndaen, Nya marova usea utararae,
vatano manuga mamuno Naije umaso mangkakeraive ware umarovave Nai.
4 Onawamo makari nsansinao ti wanyinyaube inda umarovave Nya kawasae mai,
manatantonave kakai raijo Nya vatano winanuga no maije mai.
5 Wo raura ware: ‘‘Wade ra wamo susye so raupaeta ra rakanive,
indamu tamo Israel ranaumbe akato inya.’’
6 Tugae, onawamo manuga mbe intabove to,
wo urairije raokaisy ware umarovave Winai.
7 Onawamo susyo Edom* muno susyo Ismael,† susyo Moab‡ muno susyo Hagar.§
8 Susyo Gebal,* Amon† muno Amalek,‡
Pilistea§ muno vatano ntuna munijo Tirus* raije rautan.
9 Umba Asyur† wanugande maijaro matavon,
indamu wo sopambe Lot apa susye mai.
 
10 Amisy, syare Winyo mangke rasakinavo mai maisyare Nyo vatano Midian mansao to wemaisy.‡
Umba maisyare Nyo Sisera muno Yabin§ yaubai no mana Kison wemaisy,
11 muno aya naite maubaisy no En-Dor,
weti awa koke ntuna vayave ti mandamisy no kopa we rai.
12 Muno awa akari usayae usye rai nao maubai tavon maisyare Oreb muno Seeb* yamaisy,
muno maisyare Sebah muno Salmuna† yamai tavon.
13 Awa ana udaura mare: ‘‘Wade ra wansisa ntantuna nande Amisye Apa kawasae Israel awa kopa raora,
indamu wamave rai.’’
14 Sya Amisy, syare Nyo mansavera maisyare anaingkainyo kupe nsaone wemaisy,
muno maisyare kapumo ovare damawisyamo nsaon tavone wemaisy.
15 Syare Nyo maupaeta ra makanive maisyare taname mo anate ranen ti mewene wemaisy,
muno maisyare ama vadurure mansanano unate rai janyi ti mangkudi wemaisy.
16 Maisyare omaisy, Nyo repe atutir indamu dijat po mangkat,
muno Nyo mapapabe irati ovaro maese ai indamu ujaniv.
17 Sya AMISY, koveamo Nyo awa tame ravera ngkakai,
indamu wo Nya vambunine raen, muno ude ubeaje Nai.
18 Koveamo usamane muno ujaniv ntoa nuge nuganui,
muno awa tame ngkakai ti wene mo maugav kobe.
19 Wirati wo raen ti wo naura ware Wibuinyirati AMISY,
Wibuinyirati Amisy Ntiti Rave wimbe akarive mine tename so rai.
* 83:7 Susyo Edom onawamo Esau apa susyo bakipambe nanawije, utantuna no Israel ama ranijo wanampui. Umarovave vatano Israel mai tutir. Kej. 36; Maz. 137:7; Amos 1:11-12 † 83:7 Susyo Ismael onawamo Ismael apa susye nao, utantuna no mana Yordan ama ranijo wanamuram. Kej. 25:12-16 ‡ 83:7 Susyo Moab onawamo Lot apa susye nao, utantuna no mana Yordan ama ranijo wanamuram no varoro wanampui. Umarovave vatano Israel mai tutir. Kej. 19:36-38; Bil. 22-24; Amos 2:1-3 § 83:7 Susyo Hagar onawamo Hagar ama susye nao, utantuna no mana Yordan ama ranijo wanamuram arono Saul be akarive Israel rai. 1Taw. 5:10, 19, 20 * 83:8 Susyo Gebal utantuna mararai no Mayano Nsakam rai, no Israel ama ranijo wanampui. Yosua 13:5 † 83:8 Amon onawamo Lot apa susye inta nanawije, utantuna no mana Yordan ama ranijo wanamuram, no Moab ama ranijo wanansai. Umarovave vatano Israel mai tutir. 2Taw. 20:10; Amos 1:13-15 ‡ 83:8 Vatano Amalek inta utantuna no mana Yordan ama ranijo wanamuram muno inta utantuna no Yehuda ama ranijo wanampui. 1Sam. 15:2 § 83:8 Pilistea utantuna no Israel ama ranijo varet, mararai no Mayano Nsakam. 1Sam. 4:1, 29:1 * 83:8 Munijo Tirus omamo kota no no Israel ama ranijo wanansai inta mije. Amos 1:9-10 † 83:9 Asyur omamo munijo manakoe muno mbambunin dave no Israel ama ranijo wanansai. 2Raj. 15:19 ‡ 83:10 Hakim 6-7 § 83:10 Yabin opamo akari titi munijo Kanaan, muno Sisera opirati be akarive naite mai. Hakim 4. * 83:12 Oreb muno Seeb: Hakim 7:23-8:3 † 83:12 Sebah muno Salmuna: Hakim 8:4-21
☰