62
Syanave Amisye Ai, weamo rino mariraave
1 Masmur Daud po ratoe. Nto irati Yedutun ai, wepirati akari po vatano matayao ukiny maugavo ransyerane rai ai.
2 Amisye obo pirati syararaijo Ai, weamo sya jugara no saumane rai,
Wepirati Po inapaya irati sya marova mai.
3 Amisye obo Pirati maisyare unato oram inamamavube rai ti ripaya marova aneme rai,
Opamo maisyare yano oram ntiti mo inayan kijani ti sya marova wo inapinde jewen.
4 Inya, wea tenambe wamarovave rinaija ntoa nandui rati umba wasaneme mpayawa?
Wapo inanepatija ngko to, syare ikakai vayave kobe.
Sya vambunine mewen to, maisyare usuko marir muno yano mare mbari kobe.
5 Wenawamo ubekedaije mamo ta ware wo sya tamo ntiti rapinde,
wenawamo ta ubekero waarurijabea.
Wenawamo mawa mamo mo kove ranajo,
weramu mansanuga ma kakai mi wo ranajo.
6 Amisye obo Pirati syararaijo Ai, weamo sya jugara no saumane rai,
weye obo Pirati syanave tindimuve Ai, weamo rino mariraave.
7 Amisye obo Pirati maisyare unato oram inamamavube rai ti ripaya marova aneme rai,
Opamo maisyare yano oramo ntiti mo inayan kijani ti, sya marova wo inapinde jewen.
8 Amisye Wepi Po rinapaya irati sya marova mai,
muno Wepi bewaramo sya tame ntiti.
Amisye Opirati darino rinaora, muno Opamo maisyare unato oram inamamavube rai.
9 Inya, sya kawasae weap, syare wapanave tugaive Amisye Ai masyote anteter,
muno anakotaro rui vayave wadantotobe no wasanuga raneka no Amun,
weye Amisye Opirati darino wansaora.
10 Vatano awa tame maje nanawamo maisyare ovar bayave weti wansaroro mai kakai,
vatano wakokoe titi nanawamo awa vambunine mamo aarurijate bo ma ti wansaroro mai kakai.
Ranivara vatano maisyare so nanawamo awa vambunine rataunamo maisyare ovar bayave,
weye awa vambunine inta no mai ra wo kove raunande ramu.
11 Vemo wasaroro romano wapo vatane mantitidi rai indamu wo raunande rai jinya,
vemo wasanaveano ananugo wapo rantauno vatane maora rai nora.
Ranivara wapa ananuge nseo ti manui rave kobe,
weamo vemo wasanuga no obo rai jinya.
12 Syo Amisye anauno payaode intabo,
omamo manuije inta mi syo ranauno Ai to:
Tugae, Amisy Wibuiny irati mbambunin dave,
13 muno tugae, Akoe, Winya muinyo no tawane manya tutir.
Nyo kakai, kove, rasakinav akananto vatane nanentabo mai mamaisyo awa ana udave rai.